1 Corinth vene 2

Keriso satauro ikoko reyadi di sina

1 Kamini usika ourena, na ya rofu negasa Sei di sui ago[a] bi diya ago buni buni o mokena vabara dudu ninegau reyaka. 2 Adina yi fogori amegasa beika yokoi de mokeyaka, idu Iesu Keriso ma ini satauro ikoko reyadi mina maka mokeyaka. 3 Ye yasa amegasa yau nisi ori resi tururu tora regamaka.[b] 4 Resi nai sina ma nai ago bi diya[c] mokena vabara di niguba regika ago dudu niyaka, idu Vima ma ini vava di oteimana ago dudu, 5 ye yi mokena vari gira aena bi diya amiye di mokena vabarari aebigedi, idu Sei di vavari aebigedi.

Sei di mokena vabara

6 Ye tora niyadi vene rofu mokena vabara oteimasifa, idu bi diya gua ari di o ini ourefeidena vene di mokena vabara—bi uroro rebigo. 7 Idu sui ago dudu Sei di sui nina mokena vabara nisifa; mina Sei yaku senagi senagi oma ma kono rina koderi uni vabara dada mokeyo. 8 Gua ari di ourefeidena vene yokoi mina toto, adina diba niyagadu vonisi, bi vabara nufa Varika amiye satauro ikoko de reyagadu. 9 Idu bura reyo kana:[d]

“Beika amiye yokoi di ne yaku vena de reyo ma anema yaku neidena de reyo,

ma beika amiye di ukari mokena de reyo,

mina bi beika Sei yaku ina uka madedi vene ina rofu dogo reyo.”

10 Idu[e] Sei yaku ini Vima dudu mina una rofu moi ogau riyo. Adina Vima yaku beika baika tau noibanu maina rei mona redo, Sei di sui nina mokena di moka ka. 11 Adina amiye di vima ini ideri amedo, ina maka iniye ini mokena diba. Ye makai Sei di Vima yaku maka Sei di mokena diba nido. 12 Kamini una bi mina kono di mokena de moiyafa, idu Vima kaere bi Sei di, mina moiyafa, ye beika baika davana nufa de, bi Sei una maro, mina diba nigedi dada.

13 Ma beika ago una yaku nisifa, mina bi amiye di mokena vabara dudu de oteimaradi, idu Vima[~6~] dudu, ye makai Vima di ago rama bi Vima nufa vene rofu[~7~] nirorotari resifa. 14 Kamini Vima de nufa amiye bi Sei di Vima bi beika baika asanu de rego, adina ina rofu bi forovai rena ago; diba nigi anua rego, Vima dudu maka diba nigi dada. 15 Vima nufa amiye yaku beika baika tau noibanu di rama veifatedo, idu amiye yokoi yaku veifatei mona de rego.

16 “Adina kaere yaku Varika amiye oteimagi

bi ini mokena diba niyo?”

Idu, una bi Keriso di mokena moiyafa.[~8~]

<- 1 Corinth vene 1 1 Corinth vene 3 ->