Islael lavedi kau natuna aluwina a voiye bi a lauduneye

1 [a]Sauginemo lava a kita te Mousis oyamo i miyamiya gulata ba tedi Elon lisinemo ai ḡemotidi bi a giuwena gado, “Niga olotona Idipmo i kapotiyovoda bi mote ta sibe te tana bai lisinemo i tubuḡa. Taunana aubaina tada maso maimaituwa te voiye bi i lau etadoliyeda.”

2 Kamaina bi Elon i giuwedina gado, “Mwanemwanemi, natunatumi oloolotodi bi waiwaivinidi beyedimo beya komakoma goldimo voivoiyedi ko kaikamakamaḡedi bi ko natomedi lisigumo.”

3 Kamaina bi lava matabudi beyedimo beya komakoma a kaikamakamaḡedi bi Elon a vite. 4 [~2~]Kamaina bi tana gold i legaudi te i gabu waiwelowelodi te kau natuna aluwina i voiye. Laḡannemo lava matabudi koikoitauna a kitakita ba a binauna gado, “Oo, mani Islael, niga maimaituwana taunana Idipmo i kapotiyovoda!”

5 Laḡannemo Elon lava edi yasisi i kitakita ba koikoitau matanemo olta i voiye bi lava i giuwedina gado, “Bokina ba Bada* Niga ḡome ba waidiboḡemo Bada isana i vato yababe. Tedi edi koikoitau a voivoiyena lisinemo a soi. ena soi ta voiye.”

6 Bokina olaolalemo lava edi sewasewa ḡamoḡamo ani gabuḡosa bi musala wainuwaḡemota aubaidi a natomedi. Kamaina bi a miya a kani, a tego bi a tegobu'uwa te a kauwa yabayababa.

7 Kamaina bi noke oya dabanemo Bada, Mousis i giuwena gado, “Kwa munaḡa makai, lava Idipmo kuna ka kapotiyovodina ba kauwa gebogebo otidi sa voivoiyedi. 8 Tagu eta kauwa e wailovedina a pale bi tabudiḡa sa nawanawa. Tedi taudiḡa edi koikoitau kau aluwina goldimo a voiye bi sa laulauduneye bi lisinemo sa laulausewasewa. Tedi a giu te mba maimaituwana taunana Idipmo i kapotiyovodi.”

9 Bada, Mousis i giuwena gado, “Niga lavedi e kita kauwedi te nopodi ḡaiḡaidi. 10 Mousis kwa kita kamaḡegu bi egu medi ya yovo lisidimo bi yà ḡosa kovidi. Bi tagu kaka yà voiyem te em tubulelesa sa wapa bi em dam dididiga ya tubuḡa.”

11 Bi geḡa te Mousis, Bada, ena Maimaituwa i waibaḡa vavasaḡena gado, “Aee, Bada, niga tam em lava otidi, em ḡailisimo Idipmo kuna kapotiyovodi. Taunana aubaina mote kuma medi bi kuma ḡosa kovidi. 12 Bamoda kwa ḡosa kovidina ba Idip lavedi giudi sa vaiye bi sa giuna gado, ‘Egula, niga lavedi edi Maimaituwa noḡota gebogebona noponemo i saḡa, te i kapotiyovodi bi i nawedi kalakalalelemo bi i waipeki kovidi.’ Taunana aubaina medi kwa kaisako bi nuwam kwa vitale bi mote kuma ḡosa kovidi. 13 [~4~]Tam isammo sauga bagibagina Eiblaḡam, Aisik bi Deikap lisidimo kuna voivoiyena taudidi kwa noḡotidi. Tedi lisidimo niga mainana kuna giu, ‘Tagu kaka emi tubulelesa wapawapa otidi, yà vitemina maibena kipola galewemo. Bi kota kuna giu te niga doḡana matabuna temi yà vitemi te emi tubulelesa sai taniwage.” 14 Kamaina bi Bada ena noḡota i vitale bi Islael lavedi mote i waipekidi.

15 Ḡome Mousis ḡakima tabetabedi labu i avala bi i yovo munaḡa oya pakanemo. Bi mba ḡakimidi kalodimo bi taulidimo Maimaituwa ena waiḡake i gilumidi. 16 Niga ḡakimidi tabetabedi labu ba Maimaituwa nima otinemo i voiyedi bi i gilumidi.

Elon Islael lavedi i wai wavudi

19 Laḡannemo Mousis oyamo i munaḡa yovo ḡalavumo nuwana tava ba koikoitau kau natuna goldimo a voivoiyena a bigabigaye i kitedi. Ḡome i medi gulata bi ḡakima tabetabedi labu i ava'avalana, i pwalaḡedi bi ai dou kivikividi. 20 Tana koikoitauna i vai bi kaimo i gabu, i dougudaguda te i waila kovu bi gaubemo i ḡini yovoḡe, i gwadai bi Islael lavedi i lau egelidi te a tego.

21 Ḡome tana Elon i giuwena gado, “Niga lavedi bai kauwinemo nuwam a liuwe bi kunai aninedi te niga gebona dididiga a voiye?”

22 Bi Elon ena giu i waimunena gado, “Aee egu bada, lisigumo kuma medi. Niga lavedi edi yawasana ba tam kuna sibe, tedi gebo voiyena lisidimo ba i tekateka. 23 Tedi niga mainana a giuwegu, ‘Niga olotona Idipmo i kapotiyovoda bi mote ta sibe te tana bai lisinemo i tubuḡa. Taunana aubaina tam maso maimaituwa aubaida kuna voiye te i lau etadoliyeda.’ 24 Taunana aubaina tagu e giuwedina gado, ‘Mabai beyakomakoma goldimo voivoiyedi lisimimo ko kaikamaḡedi.’ Bi a vitegu te tagu kaimo e gabudi bi koikoitau kau natuna i laumaḡata.”

25 Mousis, i kita te Elon mote luvana lava ima labedi. Bi a voiye munaḡedi te edi ḡaviya edi waikitamo ba ani waigwaigwai. 26 Kamaina bi Mousis ḡalavu lovolovotavinemo i moito bi i binauna gado, “Mabai bi Bada ena yawanimo ba lisigumo ko nato!” Kamaina bi Livai damna noponemo olooloto a nato lisinemo ai ḡemotidi.

27 Kamaina bi Mousis oloolotodi i giuwedina gado, “Bada Islael edi Maimaituwa niga mainana i giu, ‘Matabumi emi kepata ko soluvaidi bi ḡalavu isuna te isuna ko nawa yaḡosi bi emi dam, valevaletimi bi emi lava koi pekidi.” 28 Livai damna oloolotodi Mousis kalinana a voteyeteye bi mba laḡanna ḡemotinemo lava wapana 3,000 ai pekidi. 29 Mulinemo Mousis mba oloolotodi i giuwedina gado, “Temi Bada kona voteyateyae bi kauwa didimanina kona voiye te natunatu otimi bi emi lava konai pekidi. Taunana aubaina Bada i kavisuvisumi bi i vine kamaḡemi te pilisi noyana ko voiye.”

30 Laḡan i sako Mousis lava i giuwedina gado, “Temi ba kauwa gebogebo otina kona voiye. Tagu yà munaḡa oyamo Bada lisinemo bi yài baḡa lubu te male emi gebogebo ya noḡotikamaḡedi.”

31 Kamaina bi Mousis i saḡa i nawa Bada lisinemo bi i waibaḡana gado, “Aiyo! Niga lavedi ba kauwa gebogebo otina a voiye. Tedi taudiḡa edi maimaituwa goldimo a voiye bi a laulauduneye. 32 Taunana aubaina niganana yà waibaḡam te edi gebogebo maso kuna noḡotikamaḡe. Bi bamoda geḡa ba kamaina te em buka noponemo em vinevine isedi kuna gilugilumidina bi tagu isagu kwa yasaḡi kamaḡe.”

33 Bi Bada, Mousis ena giu i waimunena gado, “Geḡa, aiyai gebogebo lisigumo i voivoiyena tana taunana isana egu bukamo yà kaikamaḡe. 34 Mousis kwa nawa bi egu lava kwa lau etadoliyedi te dobu e giugiuwemnemo ḡome kwa tavaitedi. Bi tagu egu aneya tam yai etadoliyem. Bi laḡannemo egu kovoḡa laḡanna ya tavana, kaka mba lavedi edi gebogebo dabanemo yà kovoḡidi.”

35 Kamaina te ena kovoḡa saugina i tava bi sida gebogebo otidi i vitedi. Banina tedi Elon a giuwe te kau natuna goldimo i voiye bi a laulauduneye.

<- Potiyovo kamaḡa 31Potiyovo kamaḡa 33 ->