Bi tedi a giuna gado, “Geḡa, tama aniwaḡemota gabunemo ka kena.”

3 Bi Loti i giu ḡaiḡailisi, te i wai doli nawedi ena vanuwemo. Bi buledi mote muu'a vaitena i voiye te a kani.

4 Tedi a kani kovi, te yaḡolo mote a kena bi Sodom oloolotodi, ewali bi magula matabudi a tava bi vanuwa a moito wai kwaivivili. 5 Loti lisinemo a binau saḡana gado, “Olooloto labu kage lisimmo a tavatavana bamo sa miyamiya? Tama ka ḡoeḡoena, kwa ka potiyovodi bi vaitedi kaipasa.”

6 Kamaina bi Loti i potiyovo bi vanuwa mataetinemo i moito bi i lau gudu. 7 Bi i giuna gado, “Egu lava, mote niga kauwina gebogebona koma voiye. 8 Koi beyavaiya, tagu natunatugu guguinidi labu yaḡolo mote oloto vaitedi a lumagwau, kamaina te yà giuwedi sa potiyovo bi emi ḡowana lisidimo ko voiye. Niga oloolotodi tagu e tavaitedi egu vanuwemo, taunana aubaina mote bai lisidimo koma voiye.”

9 Kamaina bi tedi ena giu ai munena gado, “Ku moito liya! Tam tautavatava niga ḡome kuna tava bi bena kwai badabada. Niganana ka voiyem te kwai nuwatoi gulatana, kaka mba lavedi labu!” Kamaina bi Loti a dudu waipaili bi manunubidi a saḡa te maso gudu a doupapa.

10 Ḡome olooloto a kabiyovo Loti nimanemo a kabi bi a solusaḡe vanuwa noponemo bi mataeta ai dougudu. 11 Kamaina bi tedi lava matabudi doḡamo, a voiyedi te matedi ai dudubala bi mataeta a tavutavuḡe.

12-13 Kamaina bi olooloto labu Loti a giuwena gado, “Tama ḡotona te niga dobuna ka kovoḡi. Bada waiwavu dididiga i vaiye niga malagaidimo bi i giu kamaḡemai te kai kalaḡosedi. Bamo natunatum, botibotiyam bi em lava ḡesaudi niga ḡome? Matabudi kwai dolidi bi niga malagaina ko gose kamaḡe.”

14 Kamaina bi Loti i potiyovo bi botibotiyana i giuwedina gado, “Bada ḡotona te niga malagaina ya kagebogebo, koi papalana bi niga malagaina ta gose.” Bi botibotiyana ai noḡota bena kage i wainamaḡa.

15 Dobu ma wai dudubalina, aneya Loti a lauegeli, a giuna gado, “Mote i visu te ko peki laḡannemo Bada malagai ya kovokovoḡi. Kwai papalana te mwanem, natunatum waiwaivinidi kwai dolidi te ko velau ko nawa.”

16 Bi geḡa, te Loti i wai kaikaibudagi aubaina te Bada nuwana i taibagibagi bi aneya Loti bi ena vanuwa lavedi nimedimo a kabi bi ai dolidi malagai a potiyovo kamaḡe. 17 Kamaina bi aneya ḡemota i giuna gado, “Ko velau te ko yawasana! Ko velavelau mote koma tinamuli bi koma velau moito wapumo, male ko peki bi ko nawa otana oyamo.”