Languages
35
Kamaina bi Deikap i nawa Padan Alanmo bi Leiban lisinemo i miya. Leiban natunatuna labu, Lia bi Leitsel i naḡidi. Mwanemwanena labu aubaina Leiban kwalabu 14 nopodimo tana i waisaga. Bi Leiban natuna Lia ena taupaula waivinina Dilpa i vite te mwanena. Leitsel tana ba ena taupaula Bila i vite te mwanena. Kamaina bi Maimaituwa Deikap i giuwena gado, “Botiyam ena malagai kwa gose bi kwa munaḡa tamam ena malagaimo.” Tana ena munaḡa laḡannemo, ba i naila kauwa bamoda Iso ena lava vaitedi, tana bi ena vanuwa lavedi simai ḡaviyedi. Bi laḡannemo a banabanavidi ba mote ai ḡaviyedi.
Maimaituwa Deikap i kavisuvisu

9 Deikap Padan-Alan i gose kamaḡe bi i nawa Betelmo i tava munaḡa bi Maimaituwa tana lisinemo i laumaḡata bi i kavisuvisu. 10 [~1~]Bi Maimaituwa Deikap i giuwena gado, “Isam ba Deikap, niganana isam e vitale, sai isamna Islael mote Deikap.” Ḡome Maimaituwa Deikap i wai isana Islael.

11 [~2~]Bi Maimaituwa i giuwena gado,

“Tagu Maimaituwa wailewapana guletigu.
Yà giugiuwem te kwai natunatuna bi ko wapa.
Bi tam em tubulelesa sa wapa bi dam didiga
bi kota ḡalibona kaka em tubulelesemo sa tubuḡa.
12 Bi doḡa Eiblaḡam bi Aisik e vitevitedina,
taunana tam yà vitem.
Bi kota em tubulelesa vaitedi
niga doḡana yà vitedi.”
13 Kamaina bi Maimaituwa tana i gose kamaḡe bi i nawa.

14 [~3~]Bi Deikap bamo gabunemo Maimaituwa vaitena a waigiugiuna ḡome tana matila ḡakima i wai moito, kaka bi Maimaituwa ena puyo waen bi oela i ḡakimina dabanemo i ḡini. 15 Maimaituwa bamo modomodonemo i giugiuyovo Deikap lisinemo mba gabuna i waiisana, “Betel.”

Leitsel i wai wainatuna te i kabiwapa

16 Tedi Betel a gose bi a nawa te ḡotona maso Ifleitimo a tava bi etamo Leitsel gomana mayana i vai. Tana ḡome i waiaivitala gulata bi wainatuna lisinemo i pilipili. 17 Tana yavi i laukauwe bi tauwaisupina diyanemo i giuwena gado, “Mote kuma naila bi gomana olotona ḡesauna kwa bewa.” 18 Leitsel nuwana peki bi gomana olotona i bewa bi i wai isana Benoni. Bi yawasina i tauvunu bi i peki bi tamana i wai isana, Bendiman.

19 Kamaina bi Leitsel Ifleit etana diyanemo a dobo, niganana dobuna sa wai isana Betliḡem. 20 Leitsel a dobo bi dabanemo Deikap mataila ḡakimina i wai moito bi niganana mainana ya moimoito.

Deikap natunatuna
Deikap natunatuna ba matabudi 12:
23 Deikap natunatuna Liya bwaganemo a tubuḡana
ba Lubin tana tautuweḡina,
Simiyon, Livai, Diuda, Isaka bi Sebulon.
24 Bi Leitsel bwaganemo
ba Diyousep bi Bendiman.
25 Bi Leitsel ena taupaula Bila natunatuna
ba Den bi Neptali.
26 Bi Liya ena taupaula Silpa natunatuna ba labu,
Ged bi Ase.
Niga matabudi ba Deikap kaḡenemo a tubuḡa Padan-Alanmo bi Bendiman taunaḡa dobunemo i tubuḡa.
Aisik i peki

27 [~4~]Deikap i nawa tamana Aisik lisinemo i tava Mamlemo, dobu Kiliat-Alaba mba taunana Ḡiblon. Mba ḡome dolinemo Eiblaḡam ma natuna Aisik tautavatava a miyamiya. 28 Bi Aisik i miyana ena kwalabu 180, 29 bi tana i magula kauwa bi i peki te ena magumagula pekipekidi vaitedi ai ḡemotidi. Bi natunatuna Iso bi Deikap a dobo.

<- Pakanemo 34Pakanemo 36 ->