1 Laḡan ḡesaunemo aneya malamo a tava Bada matanemo ai ḡemoti munaḡedi bi Seitan kota vaitena ḡome. 2 Kamaina bi Bada, Seitan i waitalayena gado, “Bamo maiḡa kuna tava?”
Seitan i giuna gado, “Dobumo e yovoyovo saḡa bi e nawanawa yabayababa.”
3 Kamaina bi Bada i waitalayena gado, “Bi egu taupaula Diyoba bamo kuna kita? Tana ba lava visuvisuna, mote aiyai ḡesauna mainana dobumo. Tana kauwa didimanidiḡa ya voivoiyedi. Kuna gwayagu te pilipili waibani geḡana e vite bi geḡa te yaḡolo ya vivivilegu bi ya kitakita kauwe te mote gebogebo ima voiye.”
4 Seitan, Bada ena giu i waimunena gado, “Lava male ena ḡonaḡona matabudi ya lau avenakiyedina ba ya yawasana. 5 Bamoda tubuḡina kwa taukoni bi yai kibitoina ba ya giu wai gebogebom.”
6Bada i giuwena gado, “Kamaina bi nimammo yà sakosako bi mote kumai peki.”
7 Ḡome Seitan, Bada i gose kamaḡe bi i nawa. Bi wai boniboni Diyoba i vite tubuḡina matabuna, kaḡenemo te kununemo i laukamaḡe. 8 Kamaina bi Diyoba veni ani ḡinina diyanemo, kovumo i miya bi tunina sabilemo i kwelikweli.
9 Bi mwanena i giuwena gado, “Niga pilipilidi matabudi a nato lisimmo bi bai aubaina, Maimaituwa kwa vivivile bi yaḡolo te didimana kwa voivoiye? I visu te maso Maimaituwa kuna pasili bi kuna peki.”
10 Diyoba mwanena i giuwena gado, “Em giu mai bu'uwa. Maimaituwa kauwa wapewapedi visuvisudi ya viteviteda bi kota gebogebodi i vitedana ba tai aninedi.” Pilipili wapewapedi Diyoba lisinemo a tubuḡa bi tana mote bai gebogebona mudunemo i vato Maimaituwa lisinemo.
Diyoba ena lava faiona a vakita
11 Diyoba ena lava faiona isedi ba Elifas ena malagai ba Teman, Bildad ena malagai ba Suwa bi Diyofa ena malagai ba Namet. Diyoba ena pilipili a vaivaiye ba ai ḡemotidi bi miya sagusaguna aubaina a nawa. 12 Manemanekemo Diyoba a kita bi mote a kitaḡone banina tana tubuḡina boniboni a ka gebogebo. Tedi ma ḡabedi edi kwama a lisidi bi dabedimo gobusa a yalaḡidi banina tedi ai nuwaboya. 13 Bi doḡamo vaitena a miyana ba laḡan 7 bi dudubala 7. Mote aiyai bai i giuwe lisinemo banina a kita te i wai nuwatoi gulata.
