Sale
Walaka bamo lava tabudi bi tabudi sale bi pali a gilumidi. Bi Islael lavedi mba saledi bi palidi a legaudi bi edi laudune nopodimo a iyeiyevidi. Mba saledi ba kasaḡesaḡe bi Maimaituwa a waiebonena palidi banina lisidimo visu i voivoiye. Sale ḡesaudi mba Maimaituwa a waibaḡa te edi gebogebo ya noḡotikamaḡedi bi ya moito galamedi pilipili nopodimo. Sale ḡesaudi nopodimo mba ḡaliḡalibona mabai tedi a labelabe kauwedina aubaidi a laupali bi kota a laulaupali te edi ḡaviya Maimaituwa ya kovoḡidi. Wali saugemo tedi nopodi ena nuwaboya Maimaituwa lisinemo a waiyovodi.
Niga dobunemo Yesu ena noya noponemo pali ḡesaudi Sale noponemo i legaudi bi i giugiu. Bi i saḡa i nawa mulinemo, Maimaituwa ena dam edi laudune nopodimo niga palidi a iyeiyevidi.

Nuwavisu giugiukauwina

1 Lava mabai mote gebogebo lavedi vaitedi simai gemota,

bi edi giu simai tiponaḡedi,

ee Maimaituwa tauwaigwaigwaiyena simai titiponaḡedi ba tedi sai nuwavisu.

2 Tedi ba dudubala bi suwala Bada ena wailovelove giudi sa legaudi bi sa noḡonoḡoti watedi,

bi nuwavisu ḡome sa banabanavi.

3 [~1~]Tedi edi yawasana ba mai kai gauba diyanemo moimoitona,

sauginemo ena bani laḡanina i tavana, tana ya votavota.

Bi luguluguna mote sima poki,

mainana tedi baibaiḡa sa voivoiyedina kaka edi yawasanamo vota visuvisudi sa tubuḡa.

4 Bi gebogebo tauvoiyena lisidimo kaka mote mai sima tubuḡa.

Tedi maibena kai pokina luguluguna, laḡannemo yavala i lausuvena ba sa laubulili kovi.

5 Bi etala laḡannemo mote ḡemoḡemotina te gebogebo lavedi Maimaituwa matanemo sima moito.

Bi tedi kaka Maimaituwa ena lava vaitedi mote sima miya ḡemota.

6 Didimana tauvoiyena tedi edi yawasanamo Bada ya labelabe kauwedi bi ya waietadoliyedi,

bi kota gebogebo etana taukaiwatana tedi sa peki.