Languages
7
Israel o sasa̱i̱ olo͡u fe̱i̱ 144,000 kege Godiha̱ maka degele i dala

1 Kegemo͡u, sa sibige̱ ko͟͡umaha̱ isimobo͡u isimo͡u bo͡u figi ilobo͡u ilobo͡u koko͡u e̱sol o olo͡u fe̱i̱ bolo̱u̱ bolo̱u̱ kege tafalaguamo͡u dugu. Dia̱me wi olo͡u fe̱i̱ bolo̱u̱ bolo̱u̱ kege kaha̱ mihi̱bo͡u, to̱ dawalabo͡u, dibibo͡u kuoko͡u hagueiye domo͡u akoguo tafalaguamo͡u dugu. 2 A̱ e̱sol o ta Godi yo͟͡u kegeno͡u daladi kaha̱ maka ke̱ tolo͡u mo͡u, aso̱ haguluya ke̱ fele̱mo͡u, e̱sol o bolo̱u̱ bolo̱u̱ kege, Godiha̱ hu̱ hiyedo ko͡u nele̱mo͡u, mihi̱bo͡u to̱ dawalabo͡u de makomabeedei kedia̱moko͡u hili̱gedo ko͡u gue tobo͡u mo͡u dugu. 3 Ni̱ aso͡u kolobo͡u, to̱bo͡u, dibibo͡u toto makodama. Ei di Godiha̱ dabai degedi o sasa̱i̱ kedia̱me Godi yo͟͡u e̱ bi degemabadeba die wodemeko͡u maka degema fogo͡u ba, kuhe makoma. 4 Kegemo͡u, a̱ haba o sasa̱i̱ ilo die wodemeko͡u Godiha̱ maka mo̱u̱ olo͡u fe̱i̱ 144,000 kege kedia̱me Israel hu̱ti olo͡u fe̱i̱ 12 kege kaha̱ o sasa̱i̱ ilo keleyode tobo͡u mo͡u du.

5 Judaha̱ hu̱ti o sasa̱i̱be 12,000 kegeye maka mala̱ i.
Rubenha̱ hu̱ti o sasa̱i̱be 12,000 kegeye maka mala̱ i.
Gatha̱ hu̱ti o sasa̱i̱be 12,000 kegeye maka mala̱ i.
6 Aserha̱ hu̱ti o sasa̱i̱be 12,000 kegeye maka mala̱ i.
Naptaliha̱ hu̱ti o sasa̱i̱be 12,000 kegeye maka mala̱ i.
Manaseha̱ hu̱ti o sasa̱i̱be 12,000 kegeye maka mala̱ i.
7 Simeonha̱ hu̱ti o sasa̱i̱be 12,000 kegeye maka mala̱ i.
Livaiha̱ hu̱ti o sasa̱i̱be 12,000 kegeye maka mala̱ i.
Isakarha̱ hu̱ti o sasa̱i̱be 12,000 kegeye maka mala̱ i.
8 Sebulunha̱ hu̱ti o sasa̱i̱be 12,000 kegeye maka mala̱ i.
Josepha̱ hu̱ti o sasa̱i̱be 12,000 kegeye maka mala̱ i.
Benjaminha̱ hu̱ti o sasa̱i̱be 12,000 kegeye maka mala̱ i.
O sasa̱i̱ su̱do kedia̱ Godiko͡u diho̱ baga̱ tobolo͡u i

9 Kegemo͡u, a̱ haba o sasa̱i̱ kefei su̱do hu̱ solo͟͡u hobogolo͡u saga̱i̱ mei, sa sa olo͡u fe̱i̱ o sasa̱i̱bo͡u, obiyei olo͡u fe̱i̱bo͡u, kolo gehe̱ gehe̱bo͡u, ta̱ gehe̱ gehe̱ tobo͡u di o sasa̱i̱bo͡u olo͡u fe̱i̱ kefema duwodi bolo̱do koto͡u duwodi Hiye Obo͡u, Wai Sipsip Wilibo͡u dilie midiho̱ko͡u tafalaguamo͡u dugu. Dia̱me yukuei fo̱ degei ke̱ ka̱ imamo͡u, fagai guo saga̱i̱ ke̱ tolo͡u i dugu. 10 O sasa̱i̱ kedia̱ hili̱gedo ko͡u gue tobolo͡u imo͡u du,

Duwodi bolo̱do koto͡u duwodi Hiye O, di Godibo͡u, Wai Sipsip Wilibo͡u
dilieno͡u si di mamo͟͡udi.

11 E̱sol o olo͡u fe̱i̱ kedia̱ge Hiye Oha̱ duwodi bolo̱do ke̱bo͡u, odo 24 kege kedia̱bo͡u, fi̱bo͡u bi doso͡u yosi kege kedia̱bo͡u de sile̱ma̱ tafalaguali, Hiye Oha̱ duwodi midiho̱ko͡u yubu sugulo fiyasigemo͡u, miye duwoguali, Godiko͡u diho̱ baga̱ tobolo͡u imo͡u dugu. 12 Dia̱ ko͡u gue tobolo͡u i,

Damale̱do, dige di Godi e̱moko͡u no͡u bolofe̱i̱yodemaba, hoho̱bo͡u me.
E̱no͡u si tewe hiyedo.
Damale̱do, di e̱moko͡u no͡u bolofe̱i̱yodema, e̱ hu̱ hebele fogume.
E̱ hu̱be hiyedo folodo.
Di Godibe nele̱ hiyedo.
Godi e̱me yo͟͡u kegeno͡u dalale. Tofousogo tofousogo ta mei degele mei.
Damale̱do-yode tobolo͡u imo͡u du.
O sasa̱i̱ yukuei fo̱ degei ka̱i̱ kedia̱me hagi̱ hiyedo ko͡u duguomo͡u mei degele i

13 Kegemo͡u, odo 24 kege tano͡u taha̱ a̱moko͡u yodu, o sasa̱i̱ yukuei fo̱ degei ka̱i̱ kedia̱me koyo dia̱? Kili̱yage haguasiei? 14 Kege yodumo͡u, a̱ sima tobou, hiye o, no͟͡usi teweyodeimo͡u, odo kaha̱ a̱moko͡u haba tobou, o sasa̱i̱ kedia̱me hagi̱ hiyedo duguo dalagua demamo͡u haguasiei. Die yukuei ke̱me Wai Sipsip Wili kaha̱ kafeiye bigima, sibigi olo͡u fe̱i̱ mei degemo͡u, fo̱ degeino͡u kuhe̱. 15 Kegei kaha̱ degemo͡u,

Dia̱ Godiha̱ duwodi midiho̱ko͡u tafalaguali,
Godiha̱ moso̱du agalibo͡u hulia̱mebo͡u de dabai degele idi.
Godiha̱ yo͟͡u e̱ duwodi bolo̱do koto͡u duwoli, dia̱bo͡u de dalali, dia̱ dia dalale.
16 Godiha̱ dia̱ wolo͡u dalababe,
dia̱ hegie ta degele mei.
Hue̱i̱ nale̱ saga̱i̱ne ta degele mei.
Aso̱ difine dugulo mei, bi taye degeiyene dia̱ ta difi degele mei.
17 Yobe, Wai Sipsip Wili, Godiha̱ duwodi bolo̱do ke̱ hafe̱i̱ dege tafala kaha̱ge o sasa̱i̱ kedia̱me,
fi̱ ne̱di hue̱i̱ sou su̱do koko͡u wo͡u ma ile, hue̱i̱ ne̱i̱ba,
Godiha̱ die diho̱ hue̱i̱ ke̱ olo͡u fe̱i̱ to̱gueiba, dia̱ haba ta gosolo ile meido.

<- Mogogou Ta̱ Hegi 6Mogogou Ta̱ Hegi 8 ->