Dirang Urana Xahinoa Mali

1 Baing Toxoratamona harua na Moses ba, 2 “Urang xahigua mali, xahi guguniangama, mana xaidap mugamugangam mana sobak mugamugangam mana niani hauna. 3 Uta bokis hanaunaungama maluxu mana saing usoxauti imang soxautingamia. 4 Oxop kabukabua maluxu ma saing uhamaringia xalingindi etua mana. Saking oxop kabukabu nagunggama maluxu ma saing uta nagungindi mana. 5 Uta kabukabu bunuxuyang saminam gol bokis hanaunaungama maxania saing ungelia imanga xahi xuania.

6 “Uta kabukabu hananianga taunganama xahi xuang maxania, xahi guguniangama. 7 Uta mina liwe mana xahi guguniangama xaung kabukabu hananiangama saing uxu langa mana. 8 Saking urang xahi yabang gamgaminganoa mahaing taxiya saing ungelia imanga gamgaminga xuania.

9 “Oxop guxenga mogungaguama saing umatu mari mana xahi xaung xalaxala longgalo duwa maluxu mana. Umogu xahi xaung xalinging longgalo mogungagia, saing bagula ngayua. 10 Saking umatu guxenga ba mari mana kabukabu hananianga taunganama xaung xalingindi. Umatu guxenga ba mari mana saing bagula wa ngayua sibuna. 11 Umatu guxenga ba mari mana mina xaung kabukabunoa bu umogudi ngayuadi.

12 “Sup, baing oxop Aron xaung garang lupdi ma xahi guguniangam xuania saing udamiadi langia. 13 Saking usausau imang mogungaguamdi mana Aron, umatu guxengua mari mana bu umogu ngayua bu sanga ba tuxu lipu hananiangam oxatanoa nanga. 14 Saking oxop garang lupdi dima saing usausaudi imang yauyaungamia. 15 Umatu guxengua mari manadi bila matu mari mana tibudinga, bu sanga ba dituxu lipu hananiangam oxatanoa nanga. Mana kubolua umatu guxenga ba mari manadi ba, ulibudi xaung garadingdi dimayu ba disok lipu hananiangamdi, ila, ila, baing.”

16 Tauna, Moses libu axamandi taxa bila Toxoratamona tabina ba. 17 Binabu dirang xahia mali mana xaidap mugamugangam mana sobak mugamugangam mana niani luwa disok mahaing sangua Isip. 18 Moses rang xahia mali bila li: ta tuxa namuxidingdi, rang barotindi mali, simbaxang xaing sigingamdi saing rang tuxandi mali. 19 Saking kaukau xahi imang sabangia, saing kaukau muli mana imang teladi, bila Toxoratamona tabina ba.

20 Xap siang hanaunaungamdi saing tadi maluxuʼm Bokis Hanuanaungama. Baing simbaxang xaidi maluxuʼm raxundi, saing ta xuanoa etua mana, xuana ba long kubolu diang sisianganama. 21 Baing xap Bokis Hanauanaungama maluxu ma mana xahia saing ngelia imang soxautingama saing soxauti Bokis Hanaunaungama bila ba, taxa bila Toxoratamona tabina ba.

22 Sup, baing Moses ta kabukabua xahi guguniangam lunia mana sangga kanggua, sabasabia mana imanga soxauti Bokis Hanaunaungama. 23 Baing ta salanga etua mana kabukabua Toxoratamona maxania, taxa bila Toxoratamona tabina ba.

24 Sup, baing ta kabukabu nagunggam xahi guguniangam lunia mana sangga kanggua, hataina mana kabukabua. 25 Baing ta nagungdi etua mana kabukabua Toxoratamona maxania, taxa bila Toxoratamona tabina ba.

26 Sup, baing Moses ta kabukabu bunuxuyang saminam golia xahi guguniangam lunia imanga maxania 27 saing tau bunuxuyang saminam mana, taxa bila Toxoratamona tabina ba.

28 Sup, baing ngelia imanga xahia xuania. 29 Ta kabukabu hananiangama haxek mana xahi xuanoa, xahi guguniangama, saing hanania hananianga taungama xaung hananianga witkama mana, taxa bila Toxoratamona tabina ba.

30 Sup, baing ta mina liwe mana xahi guguniangama xaung kabukabu hananiangama saing xu lang mana bu didamia ding. 31 Baing Moses xaung Aron xaung garang lupdi didamia rimadingdi kidingdi mana. 32 Bungingbungina diluxu xahi guguniangamia kimbo dila haxek mana kabukabu hananiangama, didamia ding, taxa bila Toxoratamona tabina ba.

33 Sup, baing Moses rang xahi gamgaminganoa mali taxiya xahia xaung kabukabu hananiangama saing ngelia imanga gamgaminga xuania. Baing ina naga, Moses sahi oxatua.

Toxoratamona Ralanoa

34 Baing mugaba kaukau xahi guguniangama, saing Toxoratamona ralanoa baxagi mana xahia.[~1~] 35 Moses sanga ba luxu mana xahi guguniangama te, namua na mugaba rung mana, saing Toxoratamona ralanoa baxagi mana xahia.

36 Bungingbungina mugaba mesa mana xahia, Isreldi xauna dimesa dahaxa mala, disu mana. 37 Ne nabu mugaba mesa te, bing ding dimesa te laing xaidaba mugaba mesa. 38 Bila balau Toxoratamona mugabinoa wa etua mana xahia mana xaidap, saing yaba wa maluxu mugabia mana yambong. Wa Isreldi maxadingia mana haxangading longgalo.

<- XAPDI MULI 39