Te Israel Tobolu Bidi Dabe 20

Te Israel dabe augwaligo hwįainu sisi yali

1 Te Israel bage tigidaligo te Livai bidigo wede po odama, tama augwali te deli hani tiwai naga aselama, tama augwali te Genuai Bidi gedude te Mispa buluba sisinagasali. Augwali te tǫ pedai tigidali badu te Dango tǫ pedai te not badu gagalasa asali, tama te saut te Berseba teba usu nigi pali, tama te Gileat tǫ pedai bage te giliga pedalubo badu augwali me asalio. 2 Tama te tigidali Israel hanigo polalubo bidi dabe te tigidali bage te Godiba sisinama po mibo madiba sabolali. Te bainatgo hwįbo ami bidi dabe te bidi sese umabo te 400,000 ami bidi dabe elaluali. 3 Tama te Benjamingo hani dabego te tiwai po wabo odali, te gasa Israel hani dabe te Mispaba sisinigi pali po walio. Tama te Israel dabego te Livai bidiba hanalu wali, “Nago dabolo pusao. Te dwai kolesaga mena tama pedelaliwe?”

4 Tama te Gibeade bidali Benjamin hani bagego te dolali we aga bidi agai te po wali, “Ena eno we dali, da si te Gibeaba pali, te Benjamingo hani dabego tǫba pali, tama da si te bulude hulide bidainu yali. 5 Tiali goli, te Gibea hanu bidi dabe augwali aselama, tama augwaligo ena elainu yai. Augwaligo ena te bidibo be hulide bagua sagasali. Tiali goli, augwaligo ena tagalu, tama augwaligo eno we tądubadi te aga isaboba usu nigi palio. 6 Tialima, eno aga tigi selasa aselama, tama eno te tigi pedai todogo pelama, tama eno te Israel tǫ pedai tigidaliba todolo pela silali. Magi baso meni, te bidi dabego te Israel tomode te dwai hale ilibo kolesaga yalio. 7 Dage tigidali Israel bidi dabe te eba sisinani, dagego homu kone bugagia palama, tama po waiąo. Megi da, dago te kolesagade magi sę yaibawe?” Te isali wego bidigo te po wai.

8 Tama tigidali bage dabe hogodama, tama augwaligo te tiwai po me deli wali, “Te da me deli te aga ugwa beba me pisiąma, tama me deli te aga buluba me pogobe dao. 9-10 Te Gibea dali hwįainogo te tiwai yaibao: te dago nogo si bidi te tigidali Israel hani deli delide te 100 bidi nidigili pelama, tama te 100 bidi nedada pabogo te 1,000 tigidali pedelama, tama te 1,000 bidi nedebogo te 10,000 bidi pedelaibao. Te bidi dabego te Gibea dabe dali hwįgi pabo bidi dabe tuabo nai sela pelama, te augwaligo hale ebo dwai kolesaga te Israel dabe dali yali sę te wei ponaibao,” augwaligo te po wai. 11 Megi da te Israel bidi tigidali te hani deli tiwai sisinama, tama augwaligo homu kolesaga me te deli elaluyu, te augwaligo te Gibea hanuba hwįgi painu yalio.

12 Tialima, tigidali Israel hanigo te bidi dabe tagala palama, te Benjamingo hanibolo wagi pomainu yali, “Magi baso e te tiwai dwai kolesaga dagego yaliwe? 13 Tama tialima, megi da dagego te dwai kolesaga yali Gibea bidi dabe selasa asao, te dago augwali ela munama, tama te Israelde dwai kolesaga elaluali te sela sąwaibao,” wali.

Tiali goli te Benjamingo hanigo te Israel dabe gasa bidi dabego wagi pali po te sela sąwani. 14 Tama te Benjamingo hani tigidaligo te augwa hanu dabe tagalama, tama te Gibea hanuba sisinagasali, te Israel dabe dali hwįainogo yali. 15-16 Te sogode augwaligo te tigidali hanude bidalubo bidi dabe sisinama te 26,000 bidi pedelai. Te bidi dabego te bainat hwągo hwįbo koneani bidi. Tama te Gibeago digi te pobase nogogo hwįbo bidi te 700 bidi elaluali. Augwaligo te kibu waligo nigai te masigi enebo naigo hwįbo mu koneani, tama augwaligo enebo masigi te daiba mu sabalu ebo dao. 17 Tama te Israel dabego te hwįabo bidi dabe te 400,000 bidi sisinani, te augwaligo te bainat hwągo hwįbo dao. Tama augwaligo te namba nedali te Benjamingo hani dabe dali me nedebeo.

Te Israel dabego te Benjamingo hani dabe dali hwįani

18 Megi da, te Israel dabe te lotu wabo pesage te Betelba pelama, tama augwaligo te Genuai Bidiba hanalu wai, “Te da mena hani bolo te hasia pelama, te Benjamingo hani dabe dali hwįgi paibawe?” Tama Genuai Bidigo te po wali, “Te Juda hani bolo polasa pomainao,” wali.

19 Tama tialima, te Israel dabego ami bidi dabe te kigamu mu hogodama, tama te Gibea hanu pąba sisinigi pelama, tama augwa osogo bidabo pesage tede nigilali. 20 Augwaligo te Benjamingo hani dali hwįgi pabo ami bidi dabe wasilama sisi elaluali. 21 Tama te Benjamingo hani dabe te hanu tagalama, tama aselama, hwįagasalio. Te giliga dega sigulusiąbadi tama te Benjamingo hani bagego te Israel ami bidi dabe te bidi sese umabo 22,000 bidi ela muanio. 22-23 Tama te Israel bidi te lotu wabo pesageba ma geasa pelama, tama augwaligo te Genuai Bidiba gela udubadi, te giliga dega sigulali. Augwaligo agaba hanalu wali, “Te dago dena ama dede te Benjamingo hani dabe dali ma hwįgowe, ma meni yaibawe?”

Tama Genuai Bidigo augwaliba te po walali, “Dagego te augwali dali ma hwįgi pao,” wai. Tama tibaso, te Israel dabe te bomo ma selama, tama augwaligo te hwįgi pabo ami bidi dabe te hasia sogo te wasilali pesageba ma pelama, te ami bidi dabe ma wasilai dao. 24 Tialima, te Israel dabego te Benjamingo hani dali te si sogo ma hwįgi palio. 25 Tama te Benjamingo hani dabego me te sogo Gibea hanu tagalama, tama te Israel dabe dali hwįagasali. Te sogo te Benjamingo hani ami bidi dabego te Israel dabe hwįbo sę koneani ami te bidi sese umabo te 18,000 bidi ela muani.

26 Tama te Israel bage dabe tigidali te Betelba ma pelama, tama augwaligo te Genuai Bidiba gela wagi pai. Augwali te Genuai Bidigo gedude dualaludubadi, te giliga dega sigulama, tama augwaligo te nai me wę me munu me tusiąwai. Tama augwaligo te siago domainu te tigidali siaba ulubo ofa te Genuai Bidiba homu deli elama, te tama ofa yalio. 27-28 Te Dąų Wali Bomai Po halobage te sogo te Betelde munaluali, tama Finias, te Eleasargo ogwa, te Arongo ogwago, te tonalubo sę yai. Tama te Israel dabego Genuai Bidiba te tiwai po hanalu wali, “Te dago dena ama dabe te Benjamingo hani dabe dali ma hwįgi paibawe, ma dago tagalagawe?” Tama Genuai Bidigo te po wali, “Dage piąo. Do da, eno dage tau selama, tama dagego te augwali aiyaba elaluaibao,” te po wai.

29 Tama tibaso, te Israel dabego te Gibea hanu bagulabo bidi meba tagala palama, tama augwali teba geme duala sigi pai. 30 Tama te sela sogo wabo side augwali pelama, te Benjamingo hani bage dali hwįgi pai. Augwa te poloba yali gilama te ami bidi dabe te Gibea hanu pąde wasilai. 31 Te Benjamingo hani dabe te hwįagasu asobode tama te Israel dabego augwali te hanu digi kekasa soali. Tialima, te Benjamin dabego te polasa yali tiwai gilama yai, tama te Betelba pabo sunumide te bidi meba elibo sę ela peyu, tama te Gibeaba pabo sunumide bidi elala pelama, tama te bulu dabede te bidi elali. Tama augwaligo te Israel bidi dabe elala pali, te bidi sese deli olama, nogo si, te 30 bidi naga elali. 32 Tama te Benjamingo hani bagego te tama po wali, “Te wiegi yai da. Dago augwali aiyaba ma elaluali, te polasa yali tiwai gilama yali,” wali.

Tiali goli, te Israel bidi dabego te po wai, “Ae, wi pinao, te dago augwali te kekasa peyu, te genuai sunumi te hanu taga soyu digibulu soainao.” 33-34 Tama tigidali Israel ami bidi dabe ma begasa pelama, tama augwali te Baltamar bulude sisinama bidali. Tama augwali bage meba te augwali te hanu bagulama, te geme dualalu, te Gibea ola be masigi elalubo madi te giliga dega sigulubo pedai badu bidali ami bidi dabe, te augwali polo tama te geme dualaluali pesage tagalama, tama haninama pedelai. Te hwįbo bomo ebo te Israel wiegi yai bidi dabe te augwaligo te hwįmainu sa muani bidi, te bidi sese umabo mu, te 10,000 bidi tama pedelali. Tama augwaligo hwįbo bomo mu yali. Tiali goli, te Benjamingo hani dabego te Israel dabego augwali dolabo te me konebeo. 35 Megi da tama te Genuai Bidigo augwali tau selama, tama augwaligo te Benjamingo hani bage dabe te aiyaba elaluali. Tama te sogode te Israel dabego te augwaligo ami bidi dabe te bidi sese umabo mu, te 25,100 bidi ela muani. 36 Tama te Benjamingo hani dabego koneani, te hwįanigo augwali aiyaba elaluali.

Te Israel dabego hwįani ugaba igulama, tama te Benjamingo hani aiyaba elaluali

Te Israel dabe te Benjamin dabede wi pela wali, magi baso meni, augwaligo koneani, te Gibea hanu pąde te gasa Israel bidi dabe geme dualalubo homu yalio. 37 Tama te dualaluali Israel bidi dabe augwali te Gibea hanu tomoba polo udada pelama, tama tigidali we bidi ela muai. 38 Tama te polasa Israel ami bidi hani me te dualaluali ami bidi te po mia selama, te dąį ilibo sę me deli yaibao wali. Te augwaligo te genuai hano te hanudu ugwaba holobo subo sogo da, 39 teda te polasa pali te ami bidi dabe ma begasa asali. Te sogo te hwįbo gagalu, te Benjamingo hani dabego te Israel bidi dabe te 30 bidi ela muani, tama augwaligo te homu yali, “Dago te augwali aiyaba elalu, te polasa tiwai yali da,” homu yalio. 40 Megi da te dąį ilaiba wali te pedelali. Te hanude te hano genuai ugwaba holali. Tama te Benjamin dabego te hanu begelama ma tonobadi, tama augwaligo te hanu tigidali siago dabo hano holobo sualio. 41 Tialima megi da, te tibo sę eyu, wi pali Israel dabe ma begelali. Te Benjamin dabego te tiwai ebo subaso, te augwali wi mu elama, tama augwaligo bomo me sia salio. Augwaligo megi da koneama, te augwali mu dola silaiba homu yalio. 42 Tama augwali te Israel dabede wi peyu, tama augwali te masigi tǫ kemi buluba pelawali. Tiali goli, augwali wi pabo sunumi meni yanio. Te geme dualaluali bidi dabe te hanu tagalama pali, tama te Israel ami bidi hani sigo augwali pobeasa pelama, tama augwali ela silalio. 43 Te Israel dabego te Benjamingo hani dabe pobeasa pelama, tama augwali te Nohade ela muna muna pidubadi, te Gibea pedai badu te giliga pedalubo pedaiba sabolali. 44 Augwaligo te bidi umabo mu te bidi sese 18,000 te Benjamin dabego wiegi yai hwįbo bidi dabe ela muai. 45 Te Benjamin dabego gasa bidi dabe begelama, tama wi peyu, te Rimon tǫ wa pai bulu te ola beba palio. Tama te Israel dabego te bidi meba te umabo te 5,000 bidi dabe te sunumide elala pali. Tama gasa bidi dabe te augwaligo pobeasa pelama, te Gidom hanuba te augwaligo siligi paboba mu usu nigi pali. Augwaligo te umabo bidi sese meba ma elali, te 2,000 bidi ela muani.

46 Tama te sogo ela muani bidi dabe te nedali namba te umabo mu, te 25,000 Benjamin hani bidi tama. Te bidi dabe hwįbo bomai bidi dabe dao. 47 Tiali goli, te 600 bidi begasa pelama, te wi peyu, te ola be masigi elalubo madi te Rimonba wi pai. Tama augwali tede bidaludubadi, te polua me si me si bidai dao. 48 Te Israel augwali ma begasa pelama, tama tigidali bidi elibadi te tigidali kibu me te augwaligo suali doado bage tigidali dolali. Tama augwaligo te Benjamin dabego tigidali hanu dabe te siago ula silalio.

<- Te Israel Tobolu Bidi Dabe 19 Te Israel Tobolu Bidi Dabe 21 ->