Languages
3
Yeisu Alana Mosese Alana I Bwata Lake

1 Inoke taliwau ge nuwau, komiu Yehoba wana gamagalau ge alowau komiu Yehoba i yogaagila ta nok elana, ku nuwatu ga Yeisu kaiwena. Iya gamagal toto Yehoba i patuna ge iya topowon bwabwatana toto ta abulilek-an ge alana ta wasawasa-an. 2 Iya Yehoba wana tuwalali i ginol paolaolaek i ola te Mosese Yehoba wana nuwatu i paolaolaek ge i tuwalali Yehoba wana limi ana heniheni kaiweliya. 3 Ta atena tau toto limi i ginol ana tobal i gan, limi nige ana tobal i gagan. He i ola al te, bosowaina hot Yeisu ta tobalan ta ba iya alana Mosese alana i bwata lake. 4 Limi maisena ge maisena ana toginol i gan, ge Yehoba iya bugul gegewena ali toginol. 5 He Mosese iya totuwalali, yaka Yehoba wana nuwatu i paolaolaek ge i tuwalali Yehoba wana limi ana heniheni kaiweliya. Wana tuwalali te bugul bolo abwe nihi masala mwananala ni wasaan. 6 Yaa Keliso iya Yehoba Natuna, yaka Yehoba wana nuwatu i paolaolaek ge Yehoba wana limi ana heniheni i kaunil. He kila Yehoba wana limi ana heniheni, ebo alola wala atimatuwa ta abulilek-an ge alola wala yaliyaya ta matamatan waisi kaiwena toto i lovivina-an kaiwela.

Toabulilek Ta Ulutuk ge Veyaho Ta Pwawa

7 Inoke Yayaluwa Bwabwalena wana baaba ta laeganan, i ba i ola hiwe:

Lan ebe, ebo nau Yehoba anau ni gan eliyamiu,
8 bahi atemiu ni gagasisi ni oola tubumiyau ateliya i gasisi ge hi pihigelgel eliyau.
Sauga hi nawanawa uleya, hi awatautau eliyau ge no palahikan kaiweliya hi labose.
9 Bwagana baliman ana gewi poti no ginol hi kite,
yaa hi lopalapalaviyan ge no palahikan kaiweliya hi labose.
10 Heyan bolo o wali ginol o kaiwena inoke ya hugaagil,
ge ya baaba kaiweliya ya ba, “Sauga gegewena ateliya ana bwaga i yapu eliyau,
ge no logugui hi towani nige nuwaliya nihi henapuan.”
11 Inoke alou ge no huga bateli gasigasisena ya baunan kaiweliya ya ba,
“Nige nihi uulutuk no veyaho eliyana.”

12 Inoke taliwau ge nuwau, nuku matahikagimiu bahi etega gamwamiwa nuwatu nanakina ni miminaa atenaa ge nige ni aabulilek, eba Yabowaine yawalina gaganina ana en ni pek. 13 Buki ana baaba i ba, “Lan ebe,” inoke sauga ya heiya te wami sauga waiwaisana, he lan maisena ge maisena alomiyau nuku ba pagasisel. Nuku ba pagasisi-agimiu inoke bahi gegi paganina alomiu etega ni kakawe ge atena ni gagasisi. 14 He kila Keliso alonau hot, ebo wala abulilek ni gasisi ni ola abatelipuna elana ta abulilek ge ta pihikan momol ana siga yaomal ana sauga. 15 Buki ana baaba ta nuwahikan toto i ba:

Lan ebe, ebo nau Yehoba anau ni gan eliyamiu,
bahi atemiu ni gagasisi ni oola tubumiyau ateliya i gasisi ge hi pihigelgel eliyau.

16 Henalau Yehoba anana i gan elal, yaa hi pihigelgel eliyana? Age gamagalau gegewel bolo Mosese i nulil hi tagila Itipita, ine? 17 Henalau Yehoba i hugaagil baliman ana gewi poti? Age gamagalau bolo hi gegi, ine? He wali gegi kaiwena hi alaliga bwagabwaga ya uleya. 18 Henalau ali bateli gasigasisena Yehoba i baunan i ba, “Nige nihi uulutuk no veyaho eliyana?” He i baaba bolo nige anana hi hehenapu-an kaiweliya. 19 Inoke ta kite to, nige bosowailiya nihi ulutuk wana veyaho eliyana kaiwena nige hi aabulilek.

<- HIBILU 2HIBILU 4 ->