Si‑vinꞌ‑omana 19

1 Ka dewaia habuhabui munia, wahe ananina wahuma anononi, yoko ani‑vainena ivivi‑hone a nonona deina, ivonavona,

“Aleluia!

Ito‑yavuha, ka didiga, ka bagibagi

yama Yaubada wayahina imaꞌ‑vavaha.

2 Iuna tauna ya nau‑yanahi

ahiahina kadu tunutunuhina.

Wayahina, tauna avaha

tau kenekenene vavine‑nana

ai dewa‑yaiyai

vi‑nua‑dadani akanai.

Vavine‑nana tau maꞌ tanopi habuhabui

yawai ivi‑goyoi yai kenene wayahia.

Ka tauna avaha ya tau paisewa

dayahi a nau‑pata

vavine‑nana venei.” [~1~]

3 Ka kadu aitam tuta yoko‑nana ivi‑hone, ivona,

“Aleluia!

Bawa‑nana vavine‑nana wayahina

vanevane‑vavaha!”

4 Ka ononotoi anani ai yau 24 kadu vahitau yawayawai na nau‑punina ivi‑tupa‑gum, e habuhabui Yaubada wayahina iaiwaodu. Tauna ya pai manuena ahihi‑vainena hetana manuena. Ka taui ivivi‑hone, ivonavona,

“Ana pata deina!

Aleluia!”

Lami‑nanaV Ya Tavine Toneina

5 Ka aitam movi pai manuena ahihi‑vaine‑nana wayahina vinꞌ‑omo, ivona,

“Itomi yaka Yaubada ya tau paisewa

tupwami ami wava kikituna,

kadu tupwami ami wava ananina,

ka habuhabumi tauna umatamatautei akanai.

Wayahina, habuhabumi nau‑wawanimi

yaka Yaubada unꞌ‑awa‑davedavei.”

6 Ka kadu aitam wahe ananina anononi, yoko ani‑vainena movi deina, ka a nonona daudau ananina taitaina deina o kadi anitana ananina dududui deina. Ka ivivi‑hone, ivonavona,

“Aleluia!

Iuna yaka Kauvea Yaubada

Tau Bagibagi‑vavaha

dewa habuhabuna veimeyei! [~2~]

7 Itoka nau‑wawanika kadewa‑haiawa

kadu didigana kavo‑vi‑natei!

Iuna Lami‑nanaV ya tavine anꞌ auyewa

avaha vinꞌ‑omo,

ka awana avaha vo‑vi‑aiai

ka vaivani. [~3~]

8 Ka vavine‑nana avaha ana kwama lineniV

bigana ka hadahadanina ka mahemaheina

vaniahei, ka weteni.”

(Ka kwama bigana anꞌ anamana vivane tau ekalesia yai dewa tunutunuhina.) 9 Ka anelose‑nana voneu, ivona, “Vona taina eginumi. ‘Aituhu aviyaivia didikuna ivaniahei Lami‑nanaV ya tavine toneina wayahina, akanai taui avaha nau‑iaiava ivaniahei!’ ”

Ka anelose‑nana kadu vona taina ivona, “Vonana vivane Yaubada yana vona tunutunuhina.” [~4~] 10 Ka ya vonana iakwa, e yauke tauna aena apeu avi‑kabubu, e aiwaodu wayahina. Kate tauna dewana vito‑potei, e voneu, ivona,

“Eha ena‑iwaodu wayahiua! Wamke ka vavaneim itomi Iesu yana hae uvitumahanei toyoina, ka itomi Yaubada ya tau paisewa. Ka yauke kadu Yaubada ya tau paisewa aitamoata deina. Itoka habuhabuka nau‑wawanika Yaubada wayahina kana‑iwaodu! Iuna Iesu yana hae kadu tau apa‑taputapu yai hae tauna wayahina ainua ivinꞌ‑omo nua aitamoata wayahina.” [~5~]

Osi Kavukavuna Ka Tauna A Tau Vi‑ata

11 Ka wahuma am‑waei adueyei, ka mataua osiV kavukavuna mimini adueyei, ka a tau vi‑ata ivi‑wahani Tau Tunutunuhina, ka tauna Yaubada vi‑ateteyei. Wayahina, nau‑wawanika kavitumahanei. Ka tauna dewa tunutunuhina ana noe wayahina tomotau nau‑yanahi, ka ai dewa‑yaiyai vi‑nua‑dadani, ka tauna a havia nau‑haviei. [~6~] 12 Ka matana ai dune ai ananata deina, ka unununa hetana a kunu‑nabanaba habuhabui imamaei. Ka kadu ininina wayahina ana wava iginuma mamaei, ka eha kadu aitam koiaka wava‑nana tꞌ‑anamane, akanai tauna ana heta anamanei. [~7~] 13 Ka tauna ana kwama mamanaina weteweteni, ka kwama‑nana dayaha nihenina si‑utuvi, ka ana wava vivane Yaubada Yana Vona. [~8~] 14 Ka wahuma a tau nau‑havia ivi‑muniei, taui kadu yai osiV kavukavui hetana imanuena ivi‑ata, ka ai kwama vivane lineniV, ka kavukavuna ka hadahadanina.

15 Ka tauna awana wayahina inama manimaninina vinꞌ‑omo‑nananena, ka inamana wayahina tauna tau maꞌ papani habuhabui vi‑peui. Ka nonova aitam apa‑taputapu vinꞌ‑omo tauna wayahina, ivona,

“Tauna tau maꞌ tanopi veimeyei,

ka ya veimea vivane toyoina,

kainumu deina.”

Yaubada Bagibagi‑vavaha nua‑goyo dewa goyona wayahi, ka tauna ya nuanua tau goyogoyoi dewa‑yaiyaiei ya pai va‑buyo nihenina. Ka tauna osi‑nanaV kavukavuna vi‑ateyei taui pai va‑buyo nihenina va‑buyoi akanai. [~9~] 16 Ka ana kwama mamanaina hetana, ka kadu aya‑nununa hetana ana wava iginuma mamaei, vivane

kini yai kini kadu kauvea yai kauvea. [~10~]

17 Ka aitam anelose adueyei babau nihenina mimini, ka tauna movina ananina wayahina vi‑hone manua habuhabui wahuma iyaveyaveha wayahia, ivona,

“Unau‑hohona, e Yaubada ya tonei ananina unꞌ‑ania. [~11~] 18 Ika, tomotau vioi unꞌ‑ania, vivane kiniV vioi, ka tau nau‑havia ai tau veimea vioi, ka onoto bagibagi vioi. Ka kadu osiV vioi, ka kadu ai tau vi‑ata vioi, ka tomotau habuhabui vioi unꞌ‑ania, vivane taui ai heta yawai iveimeyei, ka tau paisewa‑kavokavovo, taui ai wava kikitui kadu taui ai wava anani.”

19 Ka vahitau simai‑nana, ka kiniV tanopia imamaei yai tau nau‑havia nui inau‑hohona adueyei. Ka taui yai nuanua osi‑nanaV a tau vi‑ata ya tau nau‑havia nui inau‑haviei. 20 Kate Yaubada ya tau nau‑havia vahitau simai‑nana ikamoi iyohoni. Ka kadu tau apa‑taputapu vitupu‑nana ikamoi iyohoni. Nonova tau apa‑taputapu vitupu‑nana dewa‑bagibagi kadu iaiaya dedewei vahitau simai‑nana didigana wayahina. Ka tauna iaiaya‑naia wayahia tomotau nonoi, iawaehei vahitau simai‑nana a pai ainana iginumina ivaniahei, kadu tauna ya itupwana wayahina iaiwaodu. Ka Yaubada ya tau nau‑havia vahitau simai‑nana kadu ya tau apa‑taputapu vitupu‑nana ainua yawayawai ihaponei inui navu‑nana sulipuraV ananata nihenina. [~12~] 21 Ka osi‑nanaV a tau vi‑ata tauna inamana awana vinꞌ‑omo‑nananena wayahina kini‑naiaV yai tau nau‑havia nui nau‑vi‑anigi‑neiei. Ka manua‑naia habuhabui iyaveyaveha iomomo, e tau mate‑naia vioi ianiania a itoava iam‑iaua wayahina.

<- Si‑vinꞌ‑omana 18 Si‑vinꞌ‑omana 20 ->