DIꞌIBɄ JATANɄP 19

1 Nétʉts nmʉdooy jantsy mʉk ja ja̱ꞌa̱yʉty kya̱jxtʉ tsa̱jpótm, es jyʉna̱ꞌa̱ndʉ:

¡Awdattʉ Dios!

Yʉ nitsokʉn, mʉjꞌa̱jtʉn esʉ mʉkꞌa̱jtʉn,

yʉꞌʉ Dios jyaꞌaꞌa̱jtypy.

2 Pesʉ Dios payeꞌepy mʉt ja tʉyꞌa̱jtʉn,

es tʉ tmoꞌoy ja kumʉdoꞌon ja mʉj pekykya̱jpn es ñʉjxʉt ayodaknoty.

Mʉt ko tʉ dyajpekytyúñ ja naxwíñʉdʉ ja̱ꞌa̱yʉty

es dyaꞌeꞌky ja Diosʉ myʉduumbʉty,

pa̱a̱dyʉ Dios yajʉmbijtxʉty.

3 Net jyʉnandʉ jatʉgok:

—Awdattʉ Dios. Pes timjókʉp winʉ xʉʉ winʉ tiempʉ ma̱ yajnineꞌegyʉ taadʉ.

4 Es ja niꞌiꞌpx ma̱jtáxkpʉ mʉjja̱ꞌa̱ydyʉjk es ja nima̱jtáxkpʉ jikyꞌa̱jtpʉty diꞌibʉ ijttʉp Dios windum, ñaygyoxtʉna̱a̱ydyákʉdʉ, tꞌawda̱jttʉ Dios es jyʉna̱ꞌa̱ndʉ:

—Waꞌan dʉꞌʉnʉty. ¡Awda̱jtta̱ꞌa̱ydyʉ Dios!

5 Nétʉts nmʉdoogajxy ma̱ uñaaybyajn ma̱ Dios yajkutíky, es jyʉnaꞌañ:

Miidsʉty diꞌibáty myʉduundʉp ja Nindsʉnꞌa̱jtʉm Dios,

mʉjja̱ꞌa̱y mutsk ja̱ꞌa̱yʉty, awdattʉ Dios.

Nixʉdúñ ja Borreeguꞌunk

6 Nmʉdooyʉts nandʉꞌʉn ko nimayjyaꞌay kya̱jxtʉ, dʉꞌʉnʉts nmʉdooy éxtʉmʉ nʉʉdáx ꞌyʉʉtsy pyʉmimy, es éxtʉmʉ anaa mʉk yaꞌaxy, es jyʉna̱ꞌa̱ndʉ:

Awda̱jtta̱ꞌa̱ydyʉ ja Nindsʉnꞌa̱jtʉm Dios diꞌibʉ tʉgekyʉ mʉkꞌa̱jtʉn myʉda̱jtypy,

mʉt ko yajkutíky.

7 Nꞌokxondákʉm, nꞌokjotkujkʉm es nꞌokwindsʉꞌkʉm, mʉt ko Dios jyantsymyʉ́jʉty

es tʉ net tpa̱a̱ty ma̱ ja Borreeguꞌunk pyʉka̱ꞌa̱ñ,

es tʉ ja ñʉdoꞌoxy ñayjyʉjpꞌíxyʉty.

8 Tʉ yajmoꞌoy ja wit ja oybyʉ es ja wa̱ꞌa̱tspʉ diꞌibʉ tʉꞌx jʉdsujkp, es ñayxyóxʉdʉt.

Pes ja oybyʉ wit jaꞌa ꞌyandijpy ja oybyʉ diꞌibʉ tyuun kya̱jxtʉp ja Diosʉ jyaꞌayʉty.

9 Nétʉts ja anklʉs xyꞌanma̱a̱y:

—Kʉxja̱ꞌa̱y: “Jotkujkʉty diꞌibáty tʉ yajwówdʉ ma̱ tya̱dʉ xʉʉ ko ja Borreeguꞌunk pyʉka̱ꞌa̱ñ.”

Es xyꞌakꞌanma̱a̱yʉts:

—Tya̱a̱dʉ dʉꞌʉn tʉyꞌa̱jtʉn diꞌibʉ Dios kyajxypy.

10 Njakoxtanʉyáñʉts anklʉs tyekyꞌʉjxy, es njaꞌꞌawdatáñʉts, per yʉꞌʉts xyꞌanma̱a̱y:

—Katʉ dʉꞌʉn mꞌadʉꞌʉtsy. Nmʉdiimbyʉts ja Dios éxtʉm mij, es éxtʉmʉ mmʉguꞌugʉty diꞌibʉ pyanʉjxtʉp ja Jesusʉ ꞌyʉxpʉjkʉn. Awdat ja Dios.

Pes ja tʉyꞌa̱jtʉn diꞌibʉ Jesús ya̱jk, jaꞌa yʉꞌʉ diꞌibʉ wyinma̱ꞌa̱ñmyeepy ja Diosʉ kyuga̱jxpʉ.

Diꞌibʉ tyukꞌuñaapy ja poop kwa̱a̱y

11 Nétʉts nꞌijxy ja tsa̱jp awa̱ꞌa̱ts, es kyʉxeꞌeky tuꞌugʉ poop kwa̱a̱y. Es diꞌibʉ tyukꞌuñaapy txʉꞌaty Diꞌibʉ Kyuydyiimpy Ja ꞌYayuk, es nandʉꞌʉn txʉꞌaty Tʉyꞌa̱jtʉn, mʉt ko tʉyꞌa̱jtʉn mʉʉt pyayoꞌoy es tsyiptúñ. 12 Yʉ wyiin dʉꞌʉn éxtʉmʉ jʉnyaꞌank jyantsytyeꞌxy, es jam kyʉba̱jkkʉjxm tmʉdaty may ja koronʉ. Es tmʉdaty ja xyʉʉ kʉxja̱ꞌa̱y diꞌibʉ yʉꞌʉyʉ naydyiꞌigyʉ ñija̱ꞌa̱p. 13 Es ja wyit neꞌpyñ neꞌpyñ. Es txʉꞌaty Diosʉ ꞌyAyuk. 14 Es pyanʉjxʉdʉ tʉgoymyay nidsiptuumbʉty diꞌibʉ tsa̱jpótm. Ak poop ja wyit, ja oybyʉ esʉ wa̱ꞌa̱tspʉ, es ak poop kwa̱a̱ygyʉjxy. 15 Es diꞌibʉ xyʉꞌa̱jtypy Diosʉ ꞌyAyuk, jap ꞌya̱a̱jóty pyʉdsemy tuꞌugʉ espa̱a̱dʉ jʉjppʉ, es yʉꞌʉ mʉʉt dyajtsayuta̱ꞌa̱ñ ja naxwíñʉdʉ ja̱ꞌa̱yʉty. Es yajkutuka̱ꞌa̱ñ mʉdʉ pujxnda̱jk. Es ttukkumʉdowa̱ꞌa̱ñ, mʉt ko Dios diꞌibʉ tʉgekyʉ mʉkꞌa̱jtʉn myʉda̱jtypy, jyantsyꞌajkʉnʉ mʉt ja naxwíñʉdʉ ja̱ꞌa̱y. Pa̱a̱dyʉ dʉꞌʉn ttukkumʉdowa̱ꞌa̱ñ éxtʉm ko jyawʉ yajwinma̱ꞌa̱tsy ja uuvʉ tʉʉmp. 16 Es tmʉnejxy kʉxja̱ꞌa̱y ma̱ ja kyapʉ es ma̱ ja pyuuy tya̱dʉ xʉʉ: “Reyꞌa̱jtp ma̱ réyʉty es Windsʉnꞌa̱jtp ma̱ windsʉ́nʉty.”

17 Nétʉts nꞌijxy tuꞌugʉ anklʉs tyanʉ jam xʉʉ ñikʉjxm es tꞌanʉʉmʉdʉ jantsy mʉk ja joon jʉyujk diꞌibʉ kaꞌagʉdijtp:

—¡Min naymyúkʉdʉ ma̱ ja mʉj xʉʉ diꞌibʉ Dios tyunaampy! 18 Min es xytsyuꞌutstʉt ja tsyuꞌudsyʉdyʉ réyʉty esʉ solda̱a̱dʉ windsʉ́nʉty, ja jotmʉk ja̱ꞌa̱yʉty, ja kwa̱a̱yʉty es mʉt ja diꞌibʉ tukꞌuñaayʉdʉp, nidʉgekyʉ ja̱ꞌa̱y ja tsyuꞌudsyʉty, pʉ́nʉty yajjuuydyʉp es pʉ́nʉty awa̱ꞌa̱tstuuy ijttʉp, nandʉꞌʉn ja mʉj ja̱ꞌa̱y mutsk ja̱ꞌa̱ybyʉ.

19 Nétʉts nꞌijxy ko ja axʉk jʉyujk es ja naxwíñʉdʉ ryéyʉty dyajnaymyúkʉdʉ syolda̱a̱dʉty es tsyiptuna̱ꞌa̱ñ mʉt ja diꞌibʉ poop kwa̱a̱ygyʉjxy es mʉt ja ñidsiptuumbʉty. 20 Per ja axʉk jʉyujk yajtsuum tiꞌigyʉ mʉt ja kuga̱jxpʉ diꞌibʉ andakp, diꞌibʉ naty tʉ ttuñ axʉk jʉyujk wyinduuy ja mʉj ijxwʉꞌʉmʉn diꞌibʉ myʉda̱jtypy ja mʉjꞌa̱jtʉn. Es mʉdʉ tya̱dʉ mʉj ijxwʉꞌʉmʉn ja kuga̱jxpʉ diꞌibʉ andakp tʉ twinꞌʉʉndʉ naty diꞌibáty tʉ ñayyákyʉty es ja axʉk jʉyujk tsyaꞌayʉdʉt, es tꞌawda̱jttʉ ja ꞌyawinnax. Net nimajtsk yajkujʉduꞌujʉ jiigyʉty ma̱ yʉ mejyñ diꞌibʉ teepy azufrʉ. 21 Es yʉ syolda̱a̱dʉty yaꞌoꞌkta̱a̱y mʉt ja ꞌyespa̱a̱dʉ diꞌibʉ pʉdsʉʉmp ꞌya̱a̱jóty diꞌibʉ tyukꞌuñaapy ja poop kwa̱a̱y. Es nidʉgekyʉ joon jʉyujk diꞌibʉ kaꞌagʉdijtp ꞌyujts jyotkʉdaktʉ mʉdʉ tadʉ tsyuꞌudsyʉty.

<- DIꞌIBɄ JATANɄP 18 DIꞌIBɄ JATANɄP 20 ->