Languages
11
UDavida Uba Yinkosi Yako-Israyeli

1 Bonke abako-Israyeli baya kuDavida eHebhroni bafika bathi: “Thina siyinyama yakho legazi lakho. 2 Esikhathini esedlulayo, lanxa uSawuli eseseyinkosi, wena nguwe owawukhokhela u-Israyeli emkhankasweni wezimpi. Njalo uThixo uNkulunkulu wakho wathi kuwe, ‘Wena uzakuba ngumelusi wabantu bami u-Israyeli, njalo uzakuba ngumbusi wabo.’ ”

3 Kwathi abadala bonke bako-Israyeli sebefikile enkosini uDavida eHebhroni, wenza isivumelwano labo eHebhroni phambi kukaThixo, basebegcoba uDavida ukuba abe yinkosi ko-Israyeli, njengesithembiso sikaThixo asenza ngoSamuyeli.

UDavida Unqoba IJerusalema

4 UDavida labo bonke abako-Israyeli baya eJerusalema (kusitsho iJebusi). AmaJebusi ayehlala khona 5 athi kuDavida, “Kawuyikungena lapha.” Kodwa lanxa kunjalo, uDavida wayithumba inqaba yaseZiyoni, uMuzi kaDavida.

6 UDavida wayethe, “Ozakhokhela ekuhlaseleni amaJebusi uzakuba nguMlawuli omkhulu wempi.” UJowabi indodana kaZeruya nguye owaqala ukuya khona, ngakho wazuza ubukhokheli.

7 UDavida wasehlala enqabeni, yikho yathiwa ibizo lokuthi nguMuzi kaDavida. 8 Wakha idolobho inxa zonke kusukela emadundulwini kuze kuyefinyelela emidulini ehonqolozeleyo, ngalesosikhathi uJowabi esakha evuselela umuzi. 9 UDavida waqhubeka njalo esiba lamandla, ngoba uThixo uSomandla wayelaye.

Amaqhawe KaDavida

10 Lezi zinduna zamaqhawe kaDavida ezazimsekele ngokuqinileyo embusweni kanye laye wonke u-Israyeli, ukuba abe yinkosi, njengokuthembisa kukaThixo. 11 Lolu yiluhlu lwalawo maqhawe kaDavida:

UJashobheyamu, umHakhimoni, wayengumlawuli wezikhulu; waphakamisela amadoda angamakhulu amathathu umkhonto wakhe, ababulalayo ekuhlaseleni kunye.

12 Yena elandelwa ngu-Eliyazari indodana kaDodo umʼAhohi omunye wamaqhawe amathathu. 13 WayeloDavida ePhasi Damimi, ekuhlomeni kwamaFilistiya elungiselela ukudibana empini. Endaweni ethile kwakulensimu yebhali, amabutho abaleka ebalekela amaFilistiya. 14 Kodwa bona bema bajama phakathi kwensimu. Bayivikela bawabulala amaFilistiya, uThixo wabapha ukunqoba okukhulu.

15 Izinduna ezintathu kwezingamatshumi amathathu zaya edwaleni kuDavida ebhalwini lwase-Adulami, ngalesosikhathi amanye amaFilistiya ayebuthene eSigodini saseRefayi. 16 Ngalesosikhathi uDavida wayesenqabeni, iviyo lamabutho amaFilistiya laliseBhethilehema. 17 UDavida womela amanzi wasesithi, “Oh, sengathi kungaba lomuntu ongangikhela amanzi okunatha emthonjeni oseduze lesango laseBhethilehema!” 18 Ngakho abathathu laba badabula phakathi kweviyo lamaFilistiya bayakukha amanzi eduzane lesango laseBhethilehema bayawanika uDavida. Kodwa wala ukuwanatha, wakhetha ukuwathululela phambi kukaThixo. 19 Wasesithi, “UNkulunkulu kangangivumeli ukukwenza lokhu! Kufanele yini ukuthi nginathe igazi lalababantu abanikele impilo yabo engozini bewaletha?” Ngoba babeka impilo zabo engozini bewaletha, uDavida kawanathanga.

Lezi zaziyizenzo zobuqhawe zalawomabutho womathathu.

20 U-Abhishayi umfowabo kaJowabi wayeyinduna yabaThathu labo. Waphakamisela umkhonto wakhe phezu kwabangamakhulu amathathu, ababulalayo, ngakho waba lodumo njengabaThathu. 21 Waba lodumo oluphindwe kabili phezu kwalaba abaThathu waze waba ngumlawuli wabo, loba engazange abe phakathi kwabo.

22 UBhenaya indodana kaJehoyada wayeliqhawe elilesibindi laseKhabhizeli, elenza izenzo zobuqhawe obukhulu. Wabulala amaqhawe amaMowabi amabili ayezintshantshu ekulweni. Wake wangena emgodini wabulala isilwane mhla kulongqwaqwane. 23 Wabulala umGibhithe owayemude okwezingalo eyisikhombisa njalo eqatha. Lanxa umGibhithe wayephethe umkhonto esandleni kwakungani uphethe umkhonto onjengogodo lomaluki, uBhenayiya waqondana laye ngenduku. Wahluthuna umkhonto esandleni somGibhithe wambulala ngawo umkhonto wakhe. 24 Lezi zaziyizenzo zobuqhawe zikaBhenaya indodana kaJehoyada, laye futhi wayedume njengamaqhawe amathathu. 25 Wayehlonitshwa kakhulu ukwedlula bonke abangamatshumi amathathu, kodwa wayengabalwa kanye labaThathu. UDavida wambeka ukuba abe ngumphathi wabalindi bakhe.

 
26 Amaqhawe ayelamandla ayeyila:
 
u-Asaheli umfowabo kaJowabi,
u-Elihanani indodana kaDodo waseBhethilehema,
27 uShamothi umHarori,
uHelezi umPheloni,
28 u-Ira indodana ka-Ikheshi waseThekhowa,
u-Abhiyezeri wase-Anathothi,
29 uSibhekhayi umHushathi,
u-Ilayi umʼAhohi,
30 uMaharayi umNethofathi,
uHeledi indodana kaBhana umNethofa,
31 u-Ithayi indodana kaRibhayi owaseGibhiya koBhenjamini,
uBhenaya umPhirathoni,
32 uHurayi wasezindongeni zaseGashi,
u-Abhiyeli umʼAribhathi,
33 u-Azimavethi umBhaharumi,
u-Eliyaba umShalibhoni,
34 amadodana kaHashemi umGizoni,
uJonathani indodana kaShageye umHarari,
35 u-Ahiyamu indodana kaSakhari umHarari,
u-Elifali indodana ka-Uri,
36 uHeferi indodana kaMekherathi,
u-Ahija umPheloni,
37 uHeziro umKhameli,
uNarayi indodana ka-Ezibhayi,
38 uJoweli umfowabo kaNathani,
uMibhari indodana kaHagiri,
39 uZelekhi umʼAmoni,
uNaharayi umBherothi, owayethwala izikhali zikaJowabi indodana kaZeruya,
40 u-Ira umʼIthira,
uGarebhi umʼIthiri,
41 u-Uriya umHithi,
uZabhadi indodana ka-Ahilayi,
42 lo-Adina indodana kaShiza owakoRubheni, owayeyinduna yakoRubheni, kanye labangamatshumi amathathu ababelaye,
43 loHanani indodana kaMahakha,
loJoshafathi umʼMithini,
44 lo-Uziya umʼAshitherathi,
loShama loJeyiyeli amadodana kaHothamu umʼAroweri,
45 loJediyeli indodana kaShimiri,
umfowabo uJoha umThizi,
46 lo-Eliyeli umʼMahavi,
loJeribhayi loJoshaviya amadodana ka-Elinamu,
lo-Ithima waseMowabi,
47 lo-Eliyeli, lo-Obhedi kanye loJasiyeli waseMezobha.

<- 1 ImiLando 101 ImiLando 12 ->