1 केदी तुमू मारी थोड़ीक फोगान वेठ लेता, ते ज्य हाजो एतो; होव, तुमू मारी वेठ बी लेतेह, 2 मी तुमरा बाराम बोगवानान गेत आसा लागाड़ीन रेथु। एने मी एकुच एदम्या हिऱ्यो वायदो किरेल हे, तो मसी यीशु हे, एने तुमूह चोखाली कुवारीन गेत होप देव। 3 पुण मी बिथु काय जिहकेरीन गेयड़ेक तान उशारी माय हवाह बेहकायेल, तिहेस केरीन तुमरो मोन ता खेरलाय एने चोखाला माय जो मसी हेऱ्यो एणे जुवे, खाराब नाय केराय जाय। 4 केदी एगदो तुमू फाय आवीन दिहरा यीशुन पारचार केरी, जान पारचार आमु नाह केऱ्या; एने तुमूह दिहरो जीव जुड़नो, जो पेल नाह जुड़ेल एतो, एने एगदी हाजाली खुबेर होमलाड़ी जीह तुमू पेल नाह मानेल एता, ते तुमू ताह वेठ लेतेह!

5 मी नाह सोमेजथु काय मी ता खास प्रेरिताह रेन कोम हे, जाह तुमू मोटला सोमेजतेह। 6 मी बोलने माय एनाड़ी हे, तीबी इकेल माय नाह। आमु ज्यु एकेक वातु माय आखी बातीम तुमरी केरता केरीन देखाड़ेल हेते।

7 मी सोताह बोलो किरेल काय तुमू बोगवानान नेजरी माय मोठा बुणो? पुण मी फुकेट माय हाजाली खुबेर तुमूह होमलाड़थु काय मी पाप किरेल। 8 मी दिहऱ्यु मोंडली फाय रेन मोंजरी लेन ताह लुटेल काय तुमरी सेवा केरू? 9 [~1~]एने जेवी मी तुमरी हिऱ्यो ईतो, एने माहु कोमी पोड़नी ते मी कुणी पोर बी बार नाह टाक्‍यो, काहाकाय बाहख मकादुनियाम रेन आवीन मार कोमी गेटीह पुरो किरेल; एने मी एकेक वात माय आपणे आपाह बार बोणने से रूकेल, एने ओंगाण बी रोकती रेह। 10 केदी मसीन खेरायी माहु माय हे, ते आखाया देसाम ओहलो मोठाय केरने से माहु कुण नाय रोक सेकी। 11 काहा? काय ज्यानकेरता मी तुमू हिऱ्यो मोंग नाह किरेत? बोगवान ते जाणेह काय मी मोंग केरथु।

12 पुण जो मी केरथु; मी केरतीच रेह, एने जा ता सोताह मोटला प्रेरित केवातेह ताह मी मोठाय केरनेन मुको नाय आप सेकु जा माय आमु मोठाय केरतेह, एने तान मान सम्मान आमरी गेतुच एय। 13 काहाकाय ओहला माणहे जुठा प्रेरित, एने ठेगीन काम केरनारे, एने मसीन प्रेरितान वेह रूप बोदेलनारे हेते। 14 ज्यी काय बोंगलाणेन वात नाह, काहाकाय सैतान खुद बी हेरोगदुतान वेह रूप बुदलेह। 15 तानकेरता केदी तान पावोर बी देरमीन पावोरान गेत वेह रूप बोदली, ते काल्ली मोटली वात हे? पुण तान नियाव तान कामान गेत एय।

16 मी पुशो केथु, कुण बी माहु फुगो मा सोमजो, नाहते फुगो सोमजीन मारी वेठ लिवो, काय थोड़ीक मोठाय केर सेकु। 17 ज्या जीवान मोठाय माय जो काय मी केणे बाजरिनोह तो मी मालीकान उकुमान गेत नाह, पुण फोगान गेत केथु। 18 काहाकाय जुलूम माणहे सेरीरान गेत मोठाय केरतेह, तीबी मी गोमेंड केरूह। 19 तुमू ते सोमेजदार एन खुसी से फोगान वेठ लेतेह। 20 काहाकाय जेवी तुमूह एगदो पावोर बाणाव लिथे, नाहते तुमूह बारबाद किर दिथे, नाहते ठेग लिथे नाहते आपणे आपाह मोटलो बाणावीह, नाहते तुमरा मुया पोर थापोड़ दिथे, ते तुमू तान वेठ लेतेह। 21 मी लाजवायीन ज्य केथु काय आमु एका दिहरा हेऱ्या गेणती केरीन कोमजोर एय गीयाह,