2 पतरस 2

जुठा हिकाड़नारे

1 जिहकेरीन पेल्ला कालाम माणहान विची माय जुठा जाणकार आयेल एता, तिहेच केरीन तुमरे माय बी जुठा हिकाड़नारे आवती। एने ता बोटेकणार जुठ्यु वातुह लावती, एने ता मालीकाह जो ताह सोड़ेव लियेल ईतो, एने इहकेरीन ता उतवाल्याह तान नासाह नेवता आपती। 2 तीबी जुलूम होवटा माणहे तान गेत लुच्‍चाय केरतीन तान वाटी पोर चालती, काहाकाय जो ता केरतेह तान वोजेसे दिहरा माणहे खाराब वातुह खेरायीन बोदले केती। 3 ता लोबा माय आवीन ज्युठ्यु वातु बाणावती। एने तुमरे फाय रेन गेलेत फायदो विसती, डेंड ने उकुम ते ता पोर पेलुस रेन एय जायेल हे, एने तान खेतेम एणे जोरेवरी हे।

4 [a]काहाकाय जा हेरोगदुत पाप किरेल एता ताह बोगवान सोड्यो नाह, पुण ताह नेरगाम टाक दिनो, काहाकाय नियावान दिह्यान केरता आंदारला खाडाम हाकली केरीन बांदिन मीलेल हे; 5 एने ता जुनाला कालान दुनियाह बी नाह सोड्यो, पुण विणबोकत्यान दुनिया पोर मुहेल दार्‍यो पाणी मोकल्यो; पुण खेरापोणान पारचार केरनार नुहा बेल आठ माणहाह वोचाड़ लिदो। 6 एने सदोम एने अमोरान हेयराह गुनेगार ठेरावीन डेंड आप्यो, एने ताह आक्‍ठा केरीन हेलगाड़ीन रोखड़ा माय बेल दिनो; काहाकाय ता आवणारे विणबोकत्या माणहान हिकवोणान केरता एक किस्सो ठेराय, 7 एने खेरला लुताह, जो विणखेरला खाराब बोलना चालना पोर जुलूम दुखी ईतो, सुटकारो आप्यो। 8 काहाकाय तो सिदो माणुह तान विची माय रेते लेन एने तान कायदान विरोद किरेल खाराब कामाह देख देखीन, एने होम होमलीन दाड़ीन तान मोनाम दुखी एतालो 9 ते मालीक बोकत्याह पारेख माय रेन निकालने एने खाराब माणहाह नियावान दिह्या वोर डेंडान केरता मेलने बी जाणेह, 10 खास केरीन ताह जा खाराब विचारान पासाण सेरीरा ने गेत चालतेह एने मालीकाह नेचा जाणतेह।

ता डिठाला, एने एकएट्या हेते, एने उचाला पोदवालाह हाजो बाकतो केणेन नाह बिते, 11 तीबी हेरोगदुत जा ताकेत एने सेकती माय जुठा मास्तेर्‍याह रेन मोटला हेते, मालीकान सामने ताह हाजो बाकतो केयीन दोस नाह लागाड़ती। 12 पुण ज्या माणहे विणएकल्या जेनवेरान गेतुस हेते, जा देराणे एने खेतेम एणेन केरता पायदा ईयेल हेते; एने ज्‍यु वातु जाणते बी नाह तान बाराम दिहराह हाजो बाकतो केतेह, ता तान खाराबी माय सोतास सेड़ जाती। 13 दिहरान नुकसान केरनेन बोदले तास ने नुकसान एय। ताह दिह्या हिराणे मोज मोचती केरने हाजो लागेह। जो लाज आवी ओहलो एने ईजुत विरे ओहलो हे; जेवी ता तुमरी हेऱ्या खाते पितेह, ताहार तान उगे रेन मोंगाल्लो खाणो खाईन मोज मोचती केरतेह। 14 न्यान डोला सिनाला माय बोराय रेनाह, एने ता पाप केऱ्या बिगेर रोकाय नाह सेकते। ता कोमजोर मोना वालाह पोटाड़ लेतेह। तान मोनाह लोब केरनेन आदेत लाग जायेल हे; ता पोर बोगवानान हाराप हे। 15 ता हुतरी वाटीह सोड़ीन बोटकी जायेल हेते, एने बोओर ने बिटोख बिलाम ने[b] वाटी पोर चाल पुड़ेल हेते, जो खाराब कामान मोंजरीह मोंगाल्ली जाणेल ईतो। 16 पुण तान पापान बाराम हिकवोण जुड़नी, न्या वोर काय एक मुकी गेदड़ी माणहान बोली माय बोलीन ता जाणाव केरनारान गांडा पोणाह रोकी।

17 ता माणहे हुकाला कुवान गेत हेते, एने वादोण उड़ायेल दुवरान गेत हेते; तानकेरता जेलेमक्यो आंदारो ठेराय जायेल हे। 18 ता फालतुक गोमेंड ने वातु केर केरीन लुच्‍चाय ने कामान द्‍वारा ता माणहान सेरीरान लालचाय माय फोसाड़ लेतेह, जा एवी एवीच बोटकेल माय रेन निकलेल हेते। 19 ता ताह सोड़ेवणेन केरता वायदो ते केतेह, पुण सोताच खाराब पोणान गुलाम हेते; काहाकाय जो माणुह जासे आर जाथे, तो तास ने गुलाम बोण जाथे। 20 जेवी ता मालीक एने सोड़ेवणार यीशु मसीन ओलखातीन द्‍वारा दुनियान बात बातीन खाराबपोणा रेन वोच निकेलनेन पासाण, एने उंजु ता माय फोसीन आरवाय गीया ताहार, तान पासाणली हाल पेल्लीह रेन बी खाराब एय जायेल हे। 21 काहाकाय देरमीपोणान वाटीह नाह सोमेजणे तान केरता ज्यासे हाजो रेतो काय ताह जाणीन, ता चोखाला उकुमाह रेन वोल जाता जो ताह होपायेल एतो। 22 ता पोर ज्यी वार्ता खेरी बुहेह, जिहकेरीन चितो तान डिखेल ताह चाटणे, एने हुवर्‍याह कोलोक बी उंगलावी तो पोणा माय पोशो जात रेणे, तोहलास ज्या माणहे हेते।

<- 2 पतरस 1 2 पतरस 3 ->