1 [a]एवी जा आपु आपणा बोरहान कारेण बोगवानान नेजरीम देरमी एय जायेल हेते, ते आमरा मालीक यीशुन कारेण बोगवान आमरे विच माय सान्ती ईयेल हे, केरीन जेवी आपु बोरहा केरीन देरमी ठेराना, ते आपणा मालीक यीशु मसीन द्‍वारा बोगवाना हेऱ्या मेल राखी, 2 [b]एने एवी तास ने द्‍वारे बोरहान कारेण आमु बोगवानान गीणीम जीवाय जिवतेह। एने आमु ती आसा पोर मोठलाय केरतेह जी आसा बोगवानान बोड़ाय हेऱ्या बेचकानाह। 3 [c]ओलोस नाह पुण आमु आमरी विपत्ती पोर बी मोठलाय केरतेह, काहाकाय आमुह मालुम हे आमरी विपत्ती दिरीह पायदा किरेह। 4 एने दिरी केरीन पारखायेल सोबाव खेरलो निकेलने, एने खेरला निकेलने से आसा बुणेह; 5 एने जी आसा आमुह नाराज नाह किरेत काहाकाय बोगवान तान मोंग आमरा मोनाम टाकेल हे मतलब चोखालो जीव जो बोगवानान बोकसीस आमरी केरता हे।

6 काहाकाय जेवी आपु बिगेर आसान एता कोमजोरूस एता, तेवी मसी ठिक टेम पोर विणबोकत्यान केरता मोरनो। 7 एगदा देरमी माणहान केरता एगदो मोरी, ज्य ते सम्बव नाह सोतो; पुण एय सिकेह एगदा हाजाला माणहान केरता एगदो मोरनेन बी कोसीत केरी। 8 पुण बोगवान आपु पोर तान मोंगान बोलाय इहकेरीन देखाड़ेह काय जेवी आपु पापीस एता, तेवी मसी आपणी केरता मुरनो। 9 [d]केरीन जेवी काय आपु यीशुन लुयीन वोजेसे देरमी ठेराना, ताहार तान द्‍वारा बोगवानान रागाम रेन काहा नाय वोचहु? 10 जेवी आपु बोगवानान दुसमोन एता पुण बोगवान तान बेटाख ने मोतीन द्‍वारा आपणे हेऱ्यो मेल केरायो। पुण जेवी आपु बोगवानान दोस्तीदार हेते ताहार मसीन जीवायीन द्‍वारा जुलूम होवटी आपणी देखरेत केरी। 11 फोक्‍तो ज्योस नाह, पुण आपु आपणो मालीक यीशु मसीन द्‍वारा, जान द्‍वारा आमरो मेल ईयेल हे, बोगवानाम खुस एतेह।

12 तानकेरता जिहकेरीन एक माणहान द्‍वारा पाप दुनियाम आवो, एने पापान द्‍वारा मोत आवी। एने इहकेरीन मोत आखा माणहा माय पोसरी गियी, काहाकाय आखा पाप केऱ्या। 13 नेमाह आपाणेन पेल पाप दुनियाम ते ईतो; पुण जाहरी नेम नाह ताहरी पाप गेणाय नाह जात। 14 तीबी आदम रेन ते मुसा वोर मोत ता माणहा पोर बी राज किऱ्यो, तीबी ता माणहे आदम ने गेत उकुमान टाल्लेन नाह केऱ्या पोर पुण विची माय पायदा ईयेल माणहा पोर ता पोर जा आदम ने गुनान गेत पाप नाह किरेल एता; आदम तान निसाणी ईतो।