ID POKITA 5

Dos id Luun no Popii woy dos Natin Karnero

1 Na, nokita ku no duwon id luun no popii riyot kowanan no bollad taddot mid unsad diyot trunu. Id sulatan idda riyot tapad divauy, woy duwon pittun silyu no id porokkot tadda. 2 Nokita ku mandad iddos sokkad no motuus no ponolihan nid ooseng to monokkaa no mid ungketen to, “Ondoy kos ollog nod lokkat taddot mgo silyu no id porokkot taddot id luun no popii amoy'd kovollat idda?” 3 Piru waa en ahad ondoy riyot datas to langit woy ka-ay to ampow't ingod woy ahad diyot silob to livuta[a] no duwon kotungud nod bollat taddon popii amoy od kovasa idda. 4 De-en ayas a mid sinoggow, oyyos waa en ahad sokkad no ollog nod pokovollat taddot id luun no popii woy od pokovasa tadda. 5 Piru sokkad taddot od pombuyyahon, mid ikahi koddi to, “Yo kad od sinoggow, su iddos id ngoranan no Liyun[b] no id pomon to koubbaran ni Juda woy ko-opuwan ni David, id ponalu sikandin ki Moivuyan. De-en sikandin da kos ollog nod lokkat taddot pittun silyu tat id luun no popii amoy'd kovollat idda.”

6 To kod-ontong ku mandon, nokita ku iddos Natin Karnero no mid lohinat diyot isowwan to trunu, no id potongannan to oppat no ma-antoy'n binovallan woy taddot oruwompuu-oppat nod pombuyyahon. Diyot lawa taddon Natin Karnero, duwon patow no id imotayan sikandin dangan. Woy nokita ku mandad no duwon pittun suwag[c] din, woy pittu mandad kos mata rin no idda en kos Ispiritu to Monama no id popiyod ka-ay to intirut ingod. 7 Na, mid porani iddos Natin Karnero riyot trunu, woy id angoy rin iddos id luun no popii pomon diyot kowanan no bollad taddot mid unsad dutun. 8 To na-angoy taddot Natin Karnero iddos id luun no popii, id ponlingko-od diyot isowwan din iddos oppat no ma-antoy'n binovallan woy dos oruwompuu-oppat nod pombuyyahon. Ipat sokkad kandan, id pompiyod to alpa[d] woy id ponsomad to yohung no buawan no noponnut id ay no insenso,[e] no idda en so dosalon to mgo minuvu to Monama. 9 Na, id kanta sikandan to lammin kanta no mid ungketen to,

“Sikkow en kos ollog nod angoy taddot id luun no popii woy od lokkat taddot mgo silyu no id porokkot tadda.

Oyyos id imotayan ka woy pomon to longossa ru nid tihis, id tobbus du kos mgo minuvu atag to Monama.

Notobbus sikandan pomon diyot langun no nokod-osso-osson tribu, nokod-osso-osson kinohiyan woy ayon to nokod-osso-osson ingod.

10 Id bovallan du sikandan no mgo hari woy mgo tohodbuwis atag to Monama ta,

woy od ponguu mandad sikandan ka-ay to ampow't ingod.”

11 To kod-ontong ku mandon, norinog ku no duwon bawos to maanmaan woy diid ko-iyap no mgo ponolihan no id lingkus diyot trunu, diyot oppat no ma-antoy'n binovallan woy riyon tod pombuyyahon. 12 Woy id kanta ran to oray'n monokkaa no mid ungketen to,

“Dos Natin Karnero no id imotayan, ollog en nod posivontuhon iddos kandin no

kotuusan, korotuwan, moraom no koovottan, konokkaan woy

ollog en sikandin nod doongon woy'd posolomatan.”

13 Nopongnga idda, norinog ku no id pongkanta iddos langun no binovallan to Monama no id pon-ubpa riyot datas to langit, ka-ay to ampow't ingod, diyot silob to livuta woy dos diyot dahat. Mid ungketen sikandan to,

“Od doongon iddos mid unsad diyot trunu woy dos Natin Karnero, woy od posivontuhon ta sikandan taman to waad tomanon,

oyyos sikandan en kos motuus to langun.”

14 Na iddos oppat no ma-antoy'n binovallan, mid ikahi to, “Oyya, od kotuman en ini!”[f] Woy idda mandad so oruwompuu-oppat nod pombuyyahon, id ponlingko-od sikandan amoy'd simba to Monama woy taddot Natin Karnero.

<- ID POKITA 4 ID POKITA 6 ->