Apocalipsis 10

Meheni tunugãre papera tunugãre ne cãhtahye angel

1 Came apequiro tutuariquiro angel ʉhmʉsepʉ tiquiro dijia tagʉ̃ ihñaʉ. Ehmeo curua watoapʉ ahtari. Sa yero buheni da tiquiro dapu bui pesari. Tiquiro wʉhdoa asʉ̃ deco cjʉ̃no yero saha asi siteri. Tiquiro ñecari ʉjʉ̃ri peca yero saha bajuri. 2 Sa yero meheni tunugã papera tunugãre tiquiro pãri tunugãre cʉori tiquiro. Tiquiro dahpocã poto pehe cjã dahpocã mehna pajiri mapʉ cʉhta cũri. Tiquiro dahpocã cũ pehe pehe mehna dihtapʉ cʉhta cũri. 3 Sa ducuro yayia tiquina sañuducuro saha tiquiro tutuaro sañuducuri. Tiquiro sa sañuducuri bato siete ʉpoa yahuye ca tamedi. 4 Tiquina sa yahugʉ̃ tʉhogʉ ojoa dʉcami. Yʉhʉ sa ojoa dʉcagʉ̃ta ʉhmʉsepʉ yʉhʉre yahuducuro ca tari.

—‍Siete ʉpoa tiquina nidire apequinare yahueracãhña. Sa yegʉ tire ojoa nedacãhña, nino ca tari yʉhʉre.

5 Tiquiro sa nidi bato pajiri mapʉre cʉhta cũ, dihtapʉre cʉhta cũriquiro angel tiquiro omoca poto pehe siõdoque mʉori ʉhmʉsepʉ. 6 Sa siõdoque mʉono Cohãcjʉ̃ sa catiducuriquiro wame mehna wame peori. Tiquiro Cohãcjʉ̃ pehe ijipihtiyere ʉhmʉsere, ʉhmʉse cjẽne, ahri yehpare, ahri yehpa cjẽne, pajiri mare, pajiri ma cjẽne yeriquiro ijire. Sa yero ohõ saha nidi angel:

—‍Cohãcjʉ̃ mehna poto nii niaja. To punota cohtenatja. 7 Seis angele cornetarire tiquina putiri bato apequiro angel putigʉ̃ Cohãcjʉ̃ panopʉ tiquiro “Ohõ saha yeitja” nidiro sahata yerota. Panopʉ masare tire quehnoano yahuerahye. Came tiquiro cahacjẽnare, tiquiro yere yahu mʉhtariquina pehere quehnoano yahu pehoahye tiquiro. Ti tiquiro yahu cũrire yojopʉre yerota tiquiro, nidi angel.

8 Tiquiro sa nidi bato ʉhmʉsepʉ yʉhʉre yahuducuriquiro pari turi yahuducuro ca tari tja. Ohõ saha nino ca tari yʉhʉre:

—‍Pajiri mapʉ cʉhta cũriquiro dihtapʉ cʉhta cũriquiro siquiro angel cahapʉ wahaya. Sa wahagʉ papera tunugãre tiquiro cʉori tunugãre neña, nino ca tari yʉhʉre.

9 Tiquiro sa nigʉ̃ tʉhogʉ angel cahapʉ wahaʉ. Tiquirore papera tunugãre yʉhʉ sinigʉ̃ tʉhoro ohõ saha ni yʉhtiri yʉhʉre:

—‍Neña. Sa yegʉ ahri tunu papera tunugãre ihyaya. Mʉhʉ coã ihyagʉ̃ umi yero saha quehnoano bisirota. Mʉhʉ paapʉ mʉhʉ ihya sõri bato sʉẽñe waharota, nidi yʉhʉre.

10 Tiquiro sa nigʉ̃ tʉhogʉ ti tunugãre angelre yʉhʉ nedi bato ihyaʉ. Yʉhʉ coã ihyagʉ̃ umi yero saha bisiri. Yʉhʉ ihya sõri bato yʉhʉ paapʉ sʉẽno wahadʉ. 11 Yʉhʉ sa ihyari bato ohõ saha nidi yʉhʉre:

—‍Pari turi ijipihtiye macari cjẽna, ijipihtiye yehpari cjẽna, peye yahuducuyere yahuducuyequina, tiquina pʉhtoa gʉ̃hʉ came tiquina dʉhse wahatire yahuyuya mʉhʉ, nidi yʉhʉre.

<- Apocalipsis 9 Apocalipsis 11 ->