1 Patruncuna, uywayniquicunata alli ricar imachöpis yanapanqui. Gamcunapapis syëlucho Patrunniqui caycanmi.[~1~]
2 Ermänucuna, Diosninchïta imaypis mañacur[~2~] mayaj mayajlla carcaycay. Mañacur payta agradësicuy. 3 Nogacunapäpis Tayta Diosninchïta mañacuy chapata mana churapämänanpaj Jesucristupa alli willacuyninta willacunäpaj. Paypa willacuynenga pipis chasquicojcuna salbacunanpämi caycan. Chay alli willacuyta willacushäpitami carsilchöpis wichgaraycä. 4 Chaynöpis Tayta Diosninchïta mañacuycuy ari paypa alli willacuyninta sumaj tantiyachinäpaj.
5 Jesucristuman mana yäracojcunawan alli caway. Listu camaricushalla caycay paycunatapis Jesucristupa alli willacuyninta willapänayquipaj.[~3~] 6 Willaparga alli shimillayquipa parlapanqui. Chaynöpis camaricushalla carcaycanqui pipis tapushuptiqui alli shimillayquipa tantiyachinayquipaj.
7 Ermänunchi Tíquico[~4~] chayamurnami willashunquipaj imano caycashätapis. Payga allimi yanapämasha Jesucristupa willacuyninta willacuptë. 8 Chaymi payta cachaycämö imano caycashätapis willashunayquipaj. Paymi shacyächishunquipaj mana cachaycuypa Diosninchïman yäracunayquipaj.[~5~] 9 Paytawan iwalmi cachaycämö marca-masiqui cuyashä ermänunchi Onésimutapis.[~6~] Paycunami llapanta willashunquipaj imano caycho caycashantapis.
10 Carsilcho nogawan caycaj Aristarcopis[~7~] gamcunapaj salüdunta apachicaycämushunquimi. Bernabëpa prïmun Marcuspis[~8~] salüdunta apachicaycämushunquimi. Pay chayamuptenga alli jamachinqui. Paypäga gamcunata willashcänami. 11 Chaynöllami Justo nishan Jesuspis salüdunta apachicaycämun. Chay quimsan Israelcunallami Jesucristupa willacuyninta willacuptë yanapämasha. Sumaj shacyächimasha.
12 Marca-masiqui Epafraspis[~9~] salüdunta apachicamushunquimi. Payga Tayta Jesucristuta allimi sirbin. Paymi gamcunapaj Diosninchïta imaypis mañacuycan Diosninchi munashanno cawanayquipaj. 13 Quiquëmi musyä Epafras gamcunapäwan Laodicea marcacho, Hierápolis marcacho yäracojcunapaj mañacushanta.
14 Cuyanacushä mëdicu Lucaswan[~10~] Demaspis[~11~] salüdunta apachicamunmi.
15 Salüdöta goycullay Laodicea marcacho tiyaj ermänunchicunata. Chaynöpis salüdöta goycullay Ninfata, wasinman shuntacaj ermänucunatapis. 16 Cay cartata liguircacherga apachinqui Laodiceacho[~12~] caj ermänunchicunaman paycunapis liguichinanpaj. Chaynömi Laodiceaman apachishä cartata liguircur paycunapis apachimonga gamcuna liguichinayquipaj.
17 Arquipotana[~13~] niy: «Taytanchi Jesucristupa willacuyninta willacunayquipaj churasha caycarga mana guellanaypashi willacunqui» nir.
18 Cay salüdötaga quiquënami isquirbimö. Gamcunaga mana gongayllapa Tayta Diosninchïta mañacuy prësu caycashäpita llojshinäpaj. Tayta Diosninchi llapayquita cuyapayculläshunqui. [Amén.]
*4:1 Efe. 6.9
*4:2 Efe. 6.18–20; Fil. 4.6
*4:5 Efe. 5.16
*4:7 Hech. 20.4; 2Tim. 4.12
*4:8 Efe. 6.21–22
*4:9 Film. 10–12
*4:10 Hech. 19.29; 27.2; Film. 24
*4:10 Hech. 12.12, 25; 13.13; 15.37–39
*4:12 Col. 1.7; Film. 23
*4:14 2Tim. 4.11; Film. 24
*4:14 2Tim. 4.10; Film. 24
*4:16 Apoc. 3.14–22
*4:17 Film. 2