1 A o Isus vičinđa e dešuduje apostolen hem dinđa len zoralipe hem autoritet upro sa o demonja hem te sasljaren o nambormipa. 2 I bičhalđa len te propovedinen oto carstvo e Devlesoro hem te sasljaren e nambormen. 3 Angleder so te džan, phenđa lenđe: “Ma legaren tumencar ništa ko drom: ni štapi, ni torba dromese, ni maro, ni love, hem te na ovel tumen aver gad. 4 Sa đikote ačhovena ki nesavi diz, bešen ano jekh čher hem ma nakhen ko aver čhera.[~1~] 5 Te na mangle tumen nesave dizutne, iklindoj tari adaja diz, tresinen i prašina tumare prendar[~2~] sar znako dai kriva so na lelje o lafi e Devlesoro.”
6 I on džele taro than ko than, vaćerindoj o Šukar lafi hem sasljarindoj e nambormen ko sa o thana.
7 A o Irod o vladari[~3~] e Galilejakoro šunđa sa so ulo i inele zbunime adalese so nesave vaćerde da o Jovan o Krstitelj uštino taro mule. 8 A avera vaćerde da o proroko o Ilija mothovđa pe ki phuv, a nesave avera vaćerde da taro mule uštino nesavo proroko taro purano vreme.
9 A o Irod phenđa: “Me čhinđum e Jovanesoro šero. A kovai onda akava kastar sa adava šunava?” I manglja te dikhel e Isuse.
10 I kad o apostolja irinde pe koro Isus, vaćerde lese sa so ćerde. I o Isus legarđa len peja hem cidinđa pe olencar, nakori diz vičime Vitsaida, te šaj oven korkore. 11 A o narodo šunđa adava i dželo palo lende. A o Isus dodžaćerđa len šukar, vaćerđa lenđe oto carstvo e Devlesoro hem sasljarđa e nambormen. 12 A kad lelja te perel i rat, o dešuduj apostolja nakhle đi o Isus hem phende lese: “Te phene ine e narodose te džan ko pašutne gava hem thana kote šaj te arakhen nešto hajbnase hem than sojbnase. Adalese so injam akate ko čučo than kote nane ništa hajbnase hem nane than sojbnase.”
13 A o Isus phenđa lenđe: “Den len tumen nešto hajbnase!”
18 A jekh dive o Isus inele korkoro ple dešuduje učenikonencar, i molinđa pe. I kad završinđa i molitva, pučlja e učenikonen: “So phenela o narodo, kova injum me?”
19 A on phende: “Nesave manuša phenena da tu injan o Jovan o Krstitelj, a nesave avera phenena da tu injan o proroko o Ilija, a palem nesave avera phenena da tu injan jekh oto avera proroci taro purano vreme kova uštino taro mule.”
20 Tegani o Isus pučlja e učenikonen: “A so tumen phenena, kova injum me?”
21 A o Isus naredinđa e učenikonenđe te na vaćeren nikase dai ov o Hrist. 22 I phenđa: “Me, o Čhavo e manušesoro, valjani but te patinav. O starešine, o šerutne sveštenici hem o učitelja e Zakonestar[~6~] naka prihvatinen man. O manuša ka mudaren man, ali o trito dive o Devel ka vazdel man taro mule.”
23 I o Isus vaćerđa ple učenikonenđe hem sa e narodose so inele adari: “Ko mangela te džal pala mande, nek ačhaj pe ple dživdipnastar, nek lel plo krsto[~7~] taro dive ko dive hem nek phirel pala mande. 24 Adalese so đijekh kova mangela te arakhi plo dživdipe, ka našali le, a ko našali plo dživdipe zbog mande, ka ovel le večno dživdipe. 25 So vredini e manušese hem sa i phuv te ovel olesiri, a našali ili upropastini pes? 26 Adalese ko lađala mandar hem mle lafendar, hem me, o Čhavo e manušesoro, ka lađav olestar kad ka irinav ki phuv ani slava[~8~] savi ka ovel sar i slava mle Dadesiri hem e svetone anđelengiri. 27 A čače vaćerava tumenđe, isi nesave akate maškar tumende kola naka meren đikote na dikhena o carstvo e Devlesoro.”
28 Kad nakhle sar đi ofto dive sar o Isus phenđa adava, lelja peja e Petre, e Jovane hem e Jakove i dželo ki gora te molini pe. 29 I sar ine molini pe, lesoro muj ulo averčhane hem lesere šeja ule but parne hem sjajna. 30-31 I dikh, nekotar iklile duj manuša ano baro sjaj,[~9~] o Mojsije hem o Ilija, hem lelje te vaćeren e Isuseja. On vaćerde e meribnastar[~10~] savo e Isuse adžićeri ano Jerusalim.[~11~]
32 A o Petar hem okola so inele oleja, zasuće. Kad uštine, dikhle e Isuse ano baro sjaj hem e duje manušen sar terđona oleja. 33 I kad lelje o Mojsije hem o Ilija te ciden pe e Isusestar, o Petar phenđa e Isusese: “Gospodarona, šukari amenđe akate so injam. Te ćera trin šatorja: jekh tuće, jekh e Mojsijase hem jekh e Ilijase.” Na džanđa so vaćeri. 34 Sar ine vaćeri adava, iklilo jekh oblako savo učharđa len. A o učenici darandile kad učharđa len o oblako.
35 I šundilo glaso taro oblako savo vaćerđa: “Akavai mlo Čhavo, kole birinđum! Ole šunen!” 36 I palo adava so šundilo o glaso, o učenici dikhle samo e Isuse korkore. I trainde, hem tegani pana nikase na vaćerde adalestar so dikhle.
37 Tejsato dive, kad o Isus hem o trin učenici huljile tari gora, baro narodo alo te dikhel e Isuse. 38 I dikh, nesavo manuš taro narodo lelja te vičini: “Učitelju, molinava tut te pomožine mle čhavese, adalese soi maje jekhoro! 39 O bišukar duho but puti prelela le hem otojekhvar vrištini; frdela le ano grčevija hem ikljola lestar pena taro muj; uništini le hem skoro nisar na ačhaj le. 40 I molinđum te učenikonen te ispudinen e bišukare duho mle čhavestar, ali on našti ine.”[~12~]
41 A o Isus phenđa: “O, biverakiri hem rumimi generacijo! Pana kobor valjani te ovav tumencar hem te trpinav tumen? Ana te čhave akari!” 42 I sar o čhavoro avela ine đi o Isus, o demoni frdinđa le ki phuv ano grčevija. A o Isus naredinđa e melale duhose te cidel pe e čhavorestar, sasljarđa e čhavore hem phenđa lesere dadese: “Ače to čhavo.” 43 Tegani sare inele začudime so dikhle e Devlesoro baro zoralipe.
46 A o učenici lelje maškara pumende te raspravinen kova šaj olendar te ovel najbaro. 47 A o Isus džanđa soi lenđe ki godi[~13~], lelja jekhe čhavore,[~14~] čhivđa le uzala peste, 48 i phenđa lenđe: “Đijekh kova primini akale čhavore zbog maje,[~15~] man primini. A đijekh kova man primini, primini e Devle kova bičhalđa man. Kova maškara tumende pes dikhela sar najtikore, ole o Devel dikhela sar najbare.”
49 A o Jovan phenđa e Isusese: “Gospodarona, dikhljam nesave manuše sar ano to anav[~16~] ispudini e demonen e manušendar. Amen o učenici na mukljam lese te ćerel adava, adalese so na džala amencar pala tute.”
50 A o Isus phenđa lese: “Muken le te ćerel adava, adalese so okova kova nane protiv tumende, ovi tumencar!”
51 A kad inele paše o dive e Isusesere te ovel vazdime ko nebo, ov zorale odlučinđa te džal ko Jerusalim. 52 I bičhalđa nesave manušen angla peste. I on džele hem đerdinde ko nesavo gav e Samarijakoro te pripreminen le e Isusese.[~17~] 53 Ali o gavutne na mangle e Isuse adalese so džande da džala ko Jerusalim.[~18~] 54 A dikhindoj adava o učenici o Jakov hem o Jovan, pučle e Isuse: “Gospode, mangeja li te phena te huljel taro nebo i jag hem sa te tharel len?”[~19~] 55 A o Isus irinđa pe hem phenđa lenđe da nane šukar so ađahar mislinena[~20~]. 56 I ov hem lesere učenici džele ko aver gav.
57 I sar o učenici hem o Isus džana ine dromeja, nesavo manuš alo hem phenđa e Isusese: “Ka džav tuja kaj god tu džaja.”[~21~]
58 A o Isus phenđa lese: “E lisicen isi jazbine hem e čirikljen gnezdija, a man, e Čhave e manušesere nane kaj te pašljarav mlo šero.”[~22~]
59 A avere manušese phenđa: “Phir pala mande!”
60 Tegani o Isus phenđa lese: “Muk o mule te parunen ple mulen,[~24~] a tu dža vaćer oto carstvo e Devlesoro.”
61 A aver manuš phenđa: “Ka phirav pala tute, Gospode, ali aš te džav te pozdravinav man mle čherutnencar.”
62 A o Isus phenđa lese: “Nijekh kova dolela pe upro plugo te orini i onda dikhela napalal,[~25~] nane korisno zako carstvo e Devlesoro.”[~26~]
<- Luka 8Luka 10 ->*9,4 Valjani te oven zadovoljna e hajbnaja hem e thaneja sojbnase savo o čherutno dela len; na troman te roden po šukar than sojbnase. Ali, šaj te džan ko avera čhera te propovedinen o Šukar lafi.
†9,5 tresinen i prašina tumare prendar Znako zako zoralo odbiba ani kultura e jevrejengiri. Adaleja mothovđa pe da na mangle ni i prašina adala dizjatar te ačhol upro lende.
‡9,7 o Irod o vladari Akate vaćeri pe oto Irod Antipa, kova inele vladari upreder jekh oto štar kotora e Izraelesere savo vičinđa pe Galileja.
§9,14 A uzalo lende inele hem đuvlja hem čhavore.
*9,16 zahvalinđa e Devlese Ko original terđola: “blagoslovinđa (o mare hem o maćhe)”.
†9,22 O starešine, o šerutne sveštenici hem o učitelja e Zakonestar zajedno predstavinde sa e Jevrejengere vođen.
‡9,23 Manuš kovai već osudime te merel ko krsto, legari ine o upruno kotor oto krsto đi ko than kaj ka mudaren le. Akale vaćeribnaja, o Isus manglja te phenel: 1. Te mangaja te ova lesere učenici, valjani te odreknina amen adalestar so amen mangaja ki akaja phuv hem valjani te ova spremna te šuna e Isuse. 2. Da valjani te ova spremna đijekh dive te trpina, čak hem te valjani te mera zbog o Isus, adalese so injam lesere učenici. 3. Soduj uprune opcije.
§9,26 sjaj Sjajno veličanstvo, slava.
*9,30-31 ano baro sjaj ili: “ani slava.”
†9,30-31 O lafi savoi akate prevodime sar “meriba,” ko original terđola “ikljojba,” so vaćeri oto značaj e Isusesere meribnastar. Ko Purano zavet kad vaćeri pe oto “ikljojba,” mislini pe upro adava so o Devel ikalđa e Izraelconen taro egipatsko ropstvo. E Hristesoroi meriba ko krsto “ikljojba,” šaj hem te vaćeri pe, delo otkupljenja, saveja o Devel ikali e manušen taro e grehengoro ropstvo.
‡9,30-31 savo adžićeri ano Jerusalim e Isuse. ili: “(e Isusesoro meriba) savo valjani te ovel/te pherđol ano Jerusalim.” O Isus sigende ka merel ano Jerusalim sar te pherđol e Devlesoro plan.
§9,40 Akava verovatno ulo angleder so o Isus huljilo ple trine učenikonencar tari gora.
*9,47 ki godi Ko original terđola: “ko vilo”.
†9,47 lelja jekhe čhavore Ko Mk 9,33 pisini da o Isus hem lesere učenici tegani inele andre ano čher. O čhavoro verovatno živinđa ano adava čher.
‡9,48 zbog maje Ko original terđola: “ano mlo anav”.
§9,49 ano to anav ili: “ano to autoritet”.
*9,52 I Samarija inele regija/okrug maškari Galileja hem i Judeja. O Samarijanci na mangle pe e Jevrejencar.
†9,53 O Jerusalim inele glavno than kote o Jevreja slavinde e Devle.
‡9,54 O Jakov hem o Jovan phende ađahar adalese so džande da o proroci sar o Ilija osudinde e manušen kola odbacinde e Devle (dikh ano2. Thag 1,10–12).
§9,55 phenđa lenđe da nane šukar so ađahar mislinena Ko original terđola: “ukorinđa len”.
*9,57 Akava značini da ov manglja te ovel e Isusesoro učeniko.
†9,58 O Isus phenđa akaja izreka sar te sikaj e manuše sari adava kadi neko lesoro učeniko. Te adava manuš džala palo leste, možda ni ole naka ovel čher.
‡9,59 Nane jasno da li o dad adale manušesoro mulo i ov ka džal odmah te paruni le ili mangela te ačhol nesavo vreme đikote lesoro dad na merela i te šaj paruni le. Akatei poenta so adava manuš mangela te ćerel nešto angleder so ka džal palo Isus.
§9,60 O Isus na mislini čačimase o mule ka parunen avere mulen. Kad phenela “mule” adava šaj te ovel: 1. metafora zako okola kola sigende ka meren, ili 2. metafora zako okola kola na džana palo Isus hem duhovnoi mule. Akatei poenta so o učeniko nisose na tromal te mukel te ačhaj le adalestar te džal palo Isus.
*9,62 Nijekh kova kad orini, a dikhela napalal, našti te ćerel o plugo te džal adari kaj valjani. Adava manuš valjani šukar te dikhel anglal te šaj šukar te orini.
†9,62 Đijekh manuš kova ulo e Isusesoro učeniko hem tegani mangela te irini pe ko purano dživdipe, nane korisno sar sluga e Devlese ko carstvo.