1 Na kabo Pentekosi mayadaina ne unai[a] meta taukawamamohoi maudoidi se lagegogoi magai kesega unai. 2 Makesega na dagugu lakilakina galewa ne unai ye dobima doha yaumai lakilaki ye lotalu. Yodi kabamiya numana wa meta dagugu ye hemwayau. 3 Na ginauli hesau se kita kana kao doha kaiwa pulupululuna ye dobima na ye tatagwaligwali ede ye talu tamowai kesega kesega unai. 4 Na Yaluwa Tabuna maudoidi wa ye hemwayaudi na yona gigibwali yena se hetubu kalina udoi udoi udiyedi se hedehedede.
5 Na Yelusalema unai meta Dius[b] tamowaidiyao Yaubada tau hekasisiyena[c], tanoubu teha udoi udoi udiyedi se laoma. 6 Huyana dagugu wa se lapui meta boda lakilaki se lagegogoi na tausunuma yodi hedehedede se lapulapui meta se nuwapwanopwano, matawuwuna ede taulaoma maudoidi kalinadi udoi udoi udiyedi se hedehedede. 7 Siliyata yo nuwapwanopwano ena se wane, “Teina tau hedehedede ta Galili tamowaidiyao. 8 Idohagi to maudoida ta lapulobai meta kalinada mamohoidi udiyedi se hedehedede? 9 Kita meta Patiya, Mediya yo Elam, Mesopotamiya, Yudeya yo Kapadosiya, Pontas yo Eisiya, 10 Pilidiya, Pampiliya yo Aikupito tamowaidiyao. Hekadiyo Libiya tehana Sailini dedekana ena se laoma. Hekadi meta taumana Loma unai se laoma, 11 siya meta Dius yo hinage dagela tamowaidiyao se nuwabui na se patulau Dius bodadi udiyedi. Na hekadi meta Kiliti bwanabwanaluwana yo Alabiya tamowaidiyao. Na iyamo yodi hedehedede ta lapuidi meta kalinada udiyedi Yaubada yona laulau namwanamwadi se hededehemasalahadi.” 12 Na se noko, yo nuwadi se pwanopwano, na se bom se henahenamai uyoidi, “Teina meta kaniyona ede saha?”
13 Na hekadiyo meta taukawamamohoi wa se talatalawasiyedi se wane, “Tamowai ta nuwana se numa yauyaule!”
14 Na kabo apostolo saudoudoi-kesega (11) wa se tolo na kalina lakilaki yena Petelo ye hedehedede ye wane, “Yogu hali Dius, yo Yelusalema unai taumiya, kwa lapulapui na ginauli maudoidi ta kaniyodi kabo ya hededehemasalahadi. 15 Teina tamowai ta meta nige se numa yauyaule matawuwuna ede teina ta meta sola ma malatomtomna. 16 Saha se masalaha kwa kitadi ta meta peloweta Yoela ye hededediko,
22 Petelo yona hedehedede wa ye tubei ye wane, “Isalaela tamowaidiyao, kwa lapulapui! Komiu kabina kwa kata meta Yesu Nasaleta tamowaina laulau gigigigibwalidi[e] ye ginaulidi kalimiuyena. Laulau wa udiyedi Yaubada ye hemasalaha yo ye hemamohoiyei meta iya Yesu ye hetamaliyama. 23 Teina tamowai ta meta Yaubada ye hineli yo ye kaisunuwa nonohaiyako na ye mosegabaei kalimiuyena. Na komiu yomi nuwatu yena dagela tamowaidiyao kwa haidi na maidamiyao kwa hesataulo, na ye boita. 24 Na Yaubada iya ye gilihai boita unai na ye hetolouyoi, matawuwuna boita nige gonowana Yesu ye kabihekahini. 25 Dawida hinage Yesu hedehededena ye hedehedede ye wane,
29 Kagu kahao, kabina ta kata kalili meta kada kulutubu Dawida ye boita na se tole, na mayadai ta unai bwayabwayana ede yoda magai ta unai. 30 Dawida meta peloweta, na kabina ye kata saha Yaubada ye hededehesunuma yo ye kaigwala, meta kana isimulita tamowaina hesau kabo ye hemala wasawasa doha iya. 31 Ginauli saha kabo se tubu Dawida matana ne unai wa ye kitadi, na Keliso yona tolouyo hedehededena ye hedede, meta Yaubada nige iya ye nuwagabaei tauboiboita yodi magai[f] unai, yo tauna nige se pwasa bwayabwaya ena. 32 Yaubada Yesu ye hetolouyoi boita unai, na kai maudoimai meta tau hemamohoiyena ede. 33 Na iya ye seuyoko Yaubada nimatuutuuna ena ye tuli, na tamana yona hedehedede hesunuma Yaluwa Tabuna ye hai. Na teina saha kwa kita yo kwa lapui ta, meta Yesu yona kainauya ye inidobiyeiyama kalimaiyena. 34 Na Dawida meta nige ye sae galewa, na iyamo ye hedede ye wane,
36 Unai, Isalaela tamowaidiyao maudoimiu bena kwa nuwatu lobai namwanamwae meta Yesu kwa hesataulo usei wa meta Yaubada ye kaisunuwai iya Guiyau yo Keliso[g].”
37 Hedehedede wa se lapuidi ede se nuwagwali na se henamai Petelo yo apostolo hekadiyo wa udiyedi se wane, “Kama kahao, saha kabo ka ginauli?” 38 Petelo ye hededelau udiyedi ye wane, “Kesega kesega bena ku nuwabui yo ka hebabatisoigo Yesu Keliso hesana ena, unai kabo Yaubada yom yababa ye nuwatugabaedi, yo yona kainauya Yaluwana Tabuna kabo ku hai. 39 Teina hedehedede hesunuma ta Yaubada ye haiyawa komiu yo natumiyao yo dagela tamowaidi, yo kaiteyadi siya hinage Guiyau yoda Yaubada kabo ye yoganedi meta siya yodi.”
40 Na kabo Petelo hedehedede hekadiyo udiyedi ye guguyaidi ye wane, “Kwa nuwabui yo Yesu kwa sunumaei, kabo teina tamowai yabayababadiyao ta udiyedi ye gilihaigomiu.” 41 Mayadaina ne unai meta boda lakilaki Petelo yona hedehedede wa unai se kawamamohoi na siya se hebabatisoidi, na badodi ede 3000 se lusae ekalesiya bodana unai. 42 Se patulau taukawamamohoi wa udiyedi na se heboda kesega. Se lapulapui apostolo yodi lauhekata wa udiyedi yo se koikoigogo, yo Guiyau yona kaikaigogo henuwaisinina unai se kaikaigogoi, yo se tapwatapwalologogoi.
43 Apostolo wa laulau gigigigibwalidi yo hekihekinoi kadi kao udoi udoi se ginaulidi. Unai tamowai maudoidi Yaubada se matausiyei yo se hedede tausaei. 44 Tau kawamamohoi wa se lagelage gogoi na yodi gogo se kaikainauya uyoidi. 45 Yodi gogo yo yodi tano hekadiyo se lokune gabaedi na monidiyao se haidi na kadi boda wa unai tamowai hekadiyao se saguidi. 46 Mayadai kesega kesega se lagelagegogoi numa tabuna bakubakuna unai. Yo hinage yodi numa udiyedi Guiyau yona kaikaigogo henuwaisinina se ginauli, yo se kaikaigogoi ma gwaugwauyaladi yo ma nuwadobidobidi, 47 yo Yaubada se hedehedebasaei. Na boda maudoidi taukawamamohoi wa se kitahenamwadi. Na mayadai maudoina Guiyau tamowai ye gilihaidi na ye tolelaedi ekalesiya bodana wa unai.
<- Paisowa 1Paisowa 3 ->-
a Pentekost meta Dius yodi mayadailakilakina hesau, meta Yaubada se lautokiyei kadi kai unai. Pentekost kaniyona ede mayadai 50, iya ede Taukiuli Henuwaisinina mayadaina mulina ne unai. Mayadaina ne unai boda lakilaki Yelusalema unai se bawabawa.
b Dius kaniyona ede Abelahama kana isimulita, yo hinage ta wane Yaubada kana bodao iya ye kaimasiyedi wa. Yodi kabakita meta yodi tatao maudoidi ma gagilidi se hepelitomedi. Dius wa tanoubu maudoina tehana udoi udoi udiyedi se miyamiya.
c Dius wa Yaubada ye bom mo se hekasisiyei, na Yesu nigele.
d Hedede peloweta kaniyona ede Yaubada yona nuwatu ye mosei tamowai hesau unai, na kabo ye hededehemasalaha.
e Laulau gigibwalidi meta Dimdim unai se kuli ‘miracles, wonders and signs’. Hedehedede haiyona te kabikabi kesekesegadi se hetahetaladi. ‘Miracle’ kaniyona ede ‘laulau gigigigibwalina’, yo ‘wonder’ kaniyona ede ‘taukaikewai wa se noko kalili’, yo ‘sign’ kaniyona ede ‘hekihekinoi’.
f Tauboiboita yodi magai kaniyona ede tauboiboita yaluyaluwadi yodi kaba miya, hesana ede Biula.
g Keliso kaniyona meta Yaubada yona kaisunuwa tamowaina, iya ede tamowai maudoidi taugilihaidi yo tau saguidi.