lGalesia 4

E Nut Nma Meng E Nunu A Totur Ngang Kles

1 A papat to kua rere mang, ngora keknen kngae ngang nguk mang na, kmikkiem mor o Yuda nguaro keknen. Enangthe a teit nama toot he ka nho mang khal to a gi kalyie vop ko nak kol ka ngaekam koknaik kam lol karo tgoluk tgus, va khal to endo nam gia vle vop enang a taven ka gi kalyie to nam kaeha ngang ka laip to nama sir pekam kam gi vrong kaenen mang karo reha. Ii, khal to endo ner sia kol kteit ka ngaekam kam lol karo tgoluk tgus koknaik, vanangko ekam ko en a gi kalyie vop, mor o Yuda ngom kaikkiem ngua keknen to 2 kmel a kalyie to endo ko maktiegom kalmialaol va ko maktiegom endruk ngma toot he ka nho mang na, he nang mar kam sir pekam kam gi vrong kaenen mang o reha kam pavloum tok. Ngak kaeharom tok kngae kais ko na her ngae klaut na. To a kolkha lsir to kteit mruo tmur el ngang khal na hera pis ko tlaut he, yek, khal na her is kam kol kteit ka ngaekam he klol karo tgoluk tgus. 3 Ii, ther gia vle lsir ngang ngor enang tok kat. Ko tesgun ko mor tgus ngot gia vle orom nguaro papat ruk enang o gi ngnes vop, ko E Nut tlo meng e Yesus vop, va o vrong serppak ruk mo mmie ngaro serppak ngta kpom mor he ksir pekam mor kam gi vrong kaenen mor mang ngaro reha gi enang a kalyie to endo tok kat. 4 Vanangko, mnam a kolkha lsir to E Nut mruo tmur el ngang Khal, en kam kol ka ngaekam mo mmie, E Nut tmur meng Khal mruo kam pis he. Tmur meng ko knan tkol he o Yuda ngakro pos ngaro serppak ngta kpom en kat. 5 Ii, E Nut tmeng tok, he nang Khal kam mur kaen ka vok mruo kam yor mang ngor kam pet kuon mang ngor ruk o pos ngama kpom mor he ksir pekam mor kam gi vrong kaenen mor mang ngaro reha vop. Tpet kuon mang ngor tok, kam hong ngor pum o pos ruk endruk ngakro serppak, he nang mor kam kol a serppak langto yok, endo kam vle te, E Nut kles msim. 6 He ekam ko E Nut ther lol muk tete te, kles msim, va ther kle kmeng E Nunu A Totur kat, endo Khal mruo ther ktar el ka tnangal mang kam meng kmen ngang nguk, he nang en kmel rengmat kun mnam muk va mor tgus. He her E Nunu A Totur arhe, endo nam kaenserpagam muk kam kvam E Nut kat te, “O-Titou, Papa-o.” 7 Ii, he ekam ko E Nunu A Totur tel rengmat kun mnam muk, ta khenam muk ma mmok tete te, mum lo kta vle enang o ngnes ruk E Nut kakro pos ngaro serppak ngta kpom muk he ksir pekam muk kam gi vrong kaenen muk mang ngaro reha kat e. Nove, ta kle va ka khenam muk ma mmok tete te, muma vle te, muk E Nut kles msim he. He kmikkiem enang ko muk E Nut kles msim tok tete, va mut kat kais kam tuur mnam E Nut ka tnangal to ta ktar el ngang e Ebrehem tennik he, endo mang En kmel o mia kam vle la mmok ko pum kalo keik.

E Pol Nam Vua Svil Kam Ya Mang lGalesia

8 Tesgun ko mut lua mnor mang E Nut vop, muma vle pum o gi vrong serppak, mar kam komor kim muk orom ngaro ngaur he gi kaenen muk kam sim kut kaikkiem mar mruo. Vanang o serppak ruk endruk, ngam lo kaenang E Nut msim hak. 9 Vanang tete, ko muta mnor mang E Nut, i o kam havae lsir te, ekam ko E Nut ta mnor mang nguk, to nngia ko muta kta hortgi he kaeknik mang o vrong serppak ngaro ngaur, he nang muk kmel riring E Nut kmel muk kam vle la mmok ko pum kalo keik vgum o Yuda ngaro pos tok? Ii, mut her kat kaeknik mang o serppak ruk ngat ottek mo mmie he kael mar ktar ko pum mularo kerok ka mnang ngaro serppak kam kta komor kim muk. Ko o serppak ruk endruk ngam lo eveep hak kmeharom o mia kam vle la mmok ko pum E Nut kalo keik e. To nngia ko muta kta svil ngaro serppak kam kta komor muk orom ngaro ngaur, muk kmikkiem mar kat? 10 Ko o pos ruk endruk, ngam gi vrong kaenen muk mang kam tagur pum o gi vrong keknen kmel a totu mang o kolkhek akuruk, a kenho ko ta mulie he ka mmok, o venloot akuruk va o pnes akuruk, muk kam paal mnam mar kam sim kut kaikkiem o keknen ruk endruk. 11 He ekam ko mum kael riring E Nut kmel muk kam vle la mmok ko pum kalo keik vgum mar tok, kua gor te, nok ko her koham kua serppak he vgum kuaro reha ruk kue vu sovet kmeharom mar ngang nguk vor.

12 Koornopeik, ko ho mi kut kaurur kim muk te, mguak kta hortgem mularo keknen kat he kaegenkar kua yet to ka sgan, gi enang ko tesgun ko her ktar hortgem kuaro keknen he kaegenkar mula yet to ka sgan tok kat. Ii, kua rere mang nguk kam hortgem mularo keknen kam vle enang dok ko tete E Nut nam lo kta vokom dok orom o Yuda ngaro pos kat e, he nang En kmel dok kam vle la mmok ko pum kalo keik vgum mar tok kat e. Parem ko, nma vokom dok orom e Yesus he kael dok kam vle la mmok ko pum kalo keik her gi vgum e Yesus tuk tok arhe.

Ii, tesgun kua vle tok kar muk he mum lo kaesik ngang dok he lua rere kim dok e. 13 Ii, mut kais kam pat mang dok ko tiok mnam a kolkha to ko pakvom kam pis ko kmuk, ko pis ko kmuk ekam ko ko kol a yor langto he ngua her gia vle ko kmuk. To enang tok, ko her pakvom kam havaeng nguk mang e Yesus kat. 14 Ii, mut si vokom dok orom kua yor to endo ko her el reha ngang nguk orom, vanangko mut lo itgung dok he klikim dok petgim muk kat e. Nove, mut kle va ksirei kam vaeng dok ge, gi enangthe dok E Nut ka engyel langto, i o enangthe e Yesus Kristus msim to dok kat. 15 Ko kua mnor mang nguk he te, tiok ko mut vokom dok orom kua yor to, si mularo kerok va enangthe mup kais va mup gia sirei hak kam kalagam mar he kaenik ngang dok kam turang dok ormar. Vanangko tete, nngia ko mularo papat ngat kle kta hortgi, nang mut lo kta sirei mang dok tok kat? 16 Nok pathe tete ko her el imuo kun pgegom dok va muk kam havaeng nguk mang e Yesus karo rhek ruk o minar vor?

17 Ii, o mia ruk kun pgegom muk ngam pe gia sovet kmelongtok mang nguk, vanangko kun mnam mar mruo ngam lua svil kam ya mang nguk e. Nove, ngam kle va ka svil mang nguk kam likim dok, nang kle kait muk kam sovet kmelongtok mang ngar ge. 18 Vanang ta ya ngang nguk enangthe o mia ngpa plong kaelongtok mang nguk mo kolkhek tgus. Vanangko ngaka mien orom nga keknen to endo kam ya mang nguk. Dok, kom lo sia vle ko kmuk, vanangko koma mien orom kua keknen to kam plong kaelongtok mang nguk kam ya mang nguk gi. Vanang mar, nove. 19 Ii, muk o Galesia, muta vle ngang dok enang koles msim ko kom kaelongtok mang nguk. Ii, va dok koma vle enang a vlom to tre kam kol kalyie ko tkaimim, en kam kol. Ko ko kta kolkol a nganngannes mang nguk vgum o mia ruk ngam pe gia kaelongtok mang nguk. Ii, va ngua kol a nganngannes to endo tok, kngae kais ko mguak laut orom o papat ruk mang e Kristus karo keknen mruo ko nga kael rengmat kun mnam muk. 20 Koma kolkol a nganngannes kun mnam dok, ko kuaro papat ruk mang nguk ngma kervavle hak, va kua vok nam vu kael ring nguk, dok kam vle ko kmuk tete. Ko enangthe kopa vle ko kmuk va ngua lo kat kais kmittiegom kuaro rhek ri lesik ngang nguk enang ti kat e.

A Ngothoi To Mang E Hangar Va E Sara

21 Vae, muk ruk muma tagur pum a papat to te, E Nut kam vokom muk orom o Yuda ngaro pos ko muta svil ngaro serppak kam komor kim muk vop, mu havaeng dok na. Mum smia mmok mang o pos ruk endruk gi? 22 Ko ngat ittiegom E Nut kakro pos ruk mang e Ebrehem te, e Ebrehem ta teit mang klo hal alomin. Ii, e Ebrehem ktavlom msim to e Sara. Vanang a mhel nam lua sir pekam e Sara kam lo kaenen kmeha ngang. En tkol khal mang e Ebrehem. Va a vlom sie to e Hangar, en e Ebrehem ktavlom to e Sara nama sir pekam en kmenen kmeha ngang. Va e Hangar tkol kat khal kat mang e Ebrehem kat. 23 Endo e Ebrehem ktavlom to e Sara nama sir pekam en kmenen kmeha ngang, en tel ka vrek mang e Ebrehem orom e Ebrehem kta serppak mruo. Vanang ktavlom msim to e Sara, endo a mhel nam lua sir pekam kmenen kmeha ngang, en tle el ka vrek mang e Ebrehem kmikkiem E Nut ka tnangal to ta ktar el ngang e Ebrehem mang khal to e Sara nera kol he.

24 To mu vokom na, kua koka ngang nguk mang alo vlom ri ko nginta vle enang E Nut kalo mokpom alomin ruk tel min kar karo mia. Ii, a vlom langto ta vle enang E Nut ka mokpom to tel kar karo mia kuon kia Vul To E Sainai, ko E Nut kakro pos ngma sir pekam kles ruk nam kaenen mar kam sim kut kaikkiem mar, he nang E Nut kmel mar kam vle la mmok ko pum kalo keik vgum mar tok. Ii, a vlom to ta vle enang a mokpom to endo her e Hangar to arhe. 25 Ii, a ngaelmir to orom e Hangar ta vle gi enang a mokpom to E Nut ta ktar el tennik kar karo mia mruo kuon kia Vul to e Sainai ko mArabia.

Va a rengmat to e Yerusalem mo mmie tete ta vle enang e Hangar kat, ekam ko E Nut kakro pos ngaro serppak ngma komor kim o Yerusalem tgus he ksir pekam mar kmenen mar kam sim kut kaikkiem kakro pos tgus hak, he nang E Nut kmel mar kam vle la mmok ko pum kalo keik vgum mar tok.

26 Vanang a rengmat to e Yerusalem langto yok ta vle kat, endo kuon ma volkha. He her mor ruk lYerusalem, mor ruk ngoma kor mnam mor mang e Yesus he kmokpom kar, o pos ruk endruk ngam lo kta sir pekam mor kam lo kaenen mor kam sim kut kaikkiem mar kat e. Ngot gia vle enang e Ebrehem ktavlom msim to e Sara, endo o pos ngam lua sir pekam kam lo kaenen kam sim kut kaikkiem mar kat. Ii, e Sara ta vle enang a rengmat to endo, he ngot pal mnam a vlom to endo ka ngausie msim he kmon ngor nan orom. 27 Ii, lmien tok, ko ngat koka kmittiegom E Nut karo rhek ruk mang a rengmat to endo te,

“Yindo a vlom to tgi mait he lo kol kalyie ngang in vop, ngiak sirei. Yindo kalyie ngang in tlo kaimim yin kam kol vop, ngiak hop he ka prik ka prik kam vui klik kam kni. Ko ye sia vle enang a rengmat to a gi lolmiammok ko nong kles ngang in tete, vanangko koknaik yindo yi gi mait iles mruo ngar ngae ksei kam khor hak kir kim kaorpeik ruk mkor endo ta ktar llues mang itngokol.”

28 Yu! Va koornopeik ruk muk, mut gi kaenang e Ebrehem khal to e Isak kat, ko mut pis te, E Nut kles msim her vgum E Nut ka tnangal gi enang e Isak tok kat. 29 Ii, mut gi kaenang e Isak kat ko tennik e Ebrehem khal to tpis ekam e Ebrehem ka serppak mruo tkol a regesal mang e Ebrehem khal e Isak ko tpis kmikkiem E Nut ka tnangal orom E Nunu A Totur ka serppak. Va o mia ngma kol a regesal mang nguk gi enang tok tete kat arhe. 30 He ekam tok, mguak kan e ngang endruk nga sia kol a regesal mang nguk tok? E Nut kakro rhek ngat havae nngia? Ngat havae ti orom e Sara karo rhek mruo ruk ngang katngokol te,

“A vlom sie to koma sir pekam kmenen kmeha ngang dok, ngiak likim en kar khal petgim muo, ekam ko khal to endo tlo is hak kam tuur mnam o tgoluk ruk mkor ko hal mruo, ko nak kol kteit to yin ila ngaekam. Ko her dok ta arhe, dok to nong a mhel tang to nama sir pekam dok, kmenen dok kmeha ngang.”

31 Koornopeik, kmikkiem kuaro rhek ruk endruk kua havaeng nguk ti te, ngot her lua pal mnam a vlom to a mhel nma sir pekam kmenen kmeha ngang e. Nove, ngot her kle kpal mnam a vlom to nong a mhel tang to nama sir pekam dok, kmenen dok kmeha ngang.

<- lGalesia 3 lGalesia 5 ->