Ihi 12

Devitiva maa ihira qara ntuvatora

1 Mpo Noravauvo, ti kahaqiane.

Koqe vaiinti vovanovata kia maini qaqi vaivo.

Ekaa maa vaiinti nahentikaqihairo kia vovanovata ariara noraiqaakero iri vaivo.

2 Ekaa vika nai una tiva amite nai una tiva amite i variara.

Vika nái noqihai uqerara uva tivakeha una uvaqai ti variara.

3 Noravauvo, are vika no tinta kairamanta kia qaiqaavata uqerara uva tiate.

Nái mahuta ti varia vaiintika no tinta kaira evaara variate.

4 Vika tiha, Tenavu uqerara uva tivaqi viha vo haika vo haika vararerave. Tenavu uva tiataa iraqe qaqiqai tivaqi vuariraro kia ho vovano tinavu no tinta kaanarove, ti variara.

5 Vika minti ti variavarovata, Noravano Kotiva tiharo, Vinavuka nora maara vehi vaiinti nahentiqaa vate variamanta vika ke ke ti variara te irunarara ti, vate te himpi vika antua nimitaari vika koqemake vaimanta qora vaiintinavu kia qaiqaavata vika qoraiqama nimitaate, tiro.

6 Noravano Kotiva tivatai uvava vaireva, quqaa uvama vairo.

Silvaa orivano anomakero hiqama vuarire ti, 7 tataa ihaqohai unta/nuta keha hiqama taara voqaara, Kotira uvavano nai koqe uvama vairo.

7-8 Noravauvo, te tavauramanta qora kaiqa vare variaka vona vona tuqavaaqamake vi ani variamanta qaqi vaiinti nahenti vika taveha, vika qora kaiqara koqe kaiqave ti variara.

Mpo Noravauvo, qora vaiinti nahenti vika tinavu qoraiqama timitevorave tira, are tinavu antua timitaqi vi vairaqe tenavu ho variare.

<- Ihi 11 Ihi 13 ->