Leta po Ibrupipol 2

Woning baut libe da truwei

1 Yumpla mas mata lisen prapa po wanem da tru tising i spik, bikoz ip yumpla no mekem, bambai yumpla i go drep go ausaid prom da truwei. 2 Da mesiz wea God i bin sanem tru dem einzel i ebritaim kamaut truwan. Ane God i bin gad rait po panse dem pipol prom broke dem lo, ane prom dem stronged wei blo dempla po no lisen po wanem dem lo i spik. 3 Wiskain? Yumpla tingk yumpla ken ranwei prom gede panis, ip yumpla i no lisen ane bilib da prapa nadakain Gudniuz wanem BosLod Zizas emselp i bin spik de pas? Dis Gudniuz i bin pasem kamdaun po yumpla tru dem mesizman uda bin lisen da niuz. 4 Ane God i bin soem dat dis Gudniuz i prapa truwan, wen em bin meke olkain gudsain, spesil gudsamting ane olkain mirikal, ane prom dem gipt blo da OliSpirit po demwan uda em i wande gibem.

Zizas, da Man

5 Ane po da niu wold wea i go kam, lo dis niu wold dem einzel i no gobi bos. 6 Nada ples insaid Baibol i spik,

‘Bat God, aukam yu tingbaut mipla ol pipol?

Ane aukam yu tekenotis lo mipla?

7 Po sottaim, yu bin meke mipla mo andanit den dem einzel,

bat yu bin gibe mipla spesilblesing, diswan da braitlait, da truglori ane ona blo God.

8 Yu bin gibe mipla rait po kare lo oba ebriting.’

Ane wen i spik ‘ebriting’, i min ebriting. Nating i bin lept ausaid, bat sam demting i mas stil go apen. 9 Bat wanem Baibol i bin tokbaut de i bin Zizas, uda i bin kam andanit lo ol einzel po sottaim. Bat nau Zizas i gad da spesilblesing, dat braitlait ane ona, bikoz em i bin go tru pein ane em bin ded po yumpla. Wa, i prom dat spesilpeiba blo God, Zizas i bin go tru ded po ebribodi ya lo dis wold. 10 Nau God i bin meke ebriting ane i bin mata rait dat i bin demkain. God i bin teke plenti pipol kam po dat spesilblesing, da truglori blo em, ane i bin mata rait dat God i bin meke diswan tru dem pein blo Zizas. God i bin meke Zizas da prapa nambawan man po seibe yumpla ebriwan.

11 Demwan uda Zizas i prapa kline dempla prom dem nugudwei, dempla i gad da seim PapaGod nau. Daswei Zizas i no sem po kole dempla bala ane sisi blo em. 12 Em i spik po God diskain,

‘Ai go meke bala ane sisi blo mi po prapa sabe neim blo yu,

ane ai go preize yu midel lo ol dem pipol blo yu.’

13 Ane gen Zizas i spik:

‘Ai go mata bilib wea em.’

Ane gen em i spik:

‘Ai ya midel lo dem pikinini wea God i bin gibem po mi.’

14 Bikoz pikinini blo God i ol pipol uda gad mit ane blad, Zizas tu i bin gad mit ane blad, seimkain bon wase pipol. Bikoz em i bin bon wase pipol, em ken ded. Ane mata tru ded em bin broke da paua blo Satana uda i kare da paua blo ded. 15 Ane tru diswei, em bin seibe dempla prom da laip wea dempla i bin stap ebritaim, prait prom ded.

16 Yumpla ebriwan i sabe Zizas i no bin kam po elpe ol einzel, bat em bin kam po elpe ol pikinini blo Eibram. 17 Antap blo ebriting, Zizas bin kam prapa wase yumpla ol bala ane sisi blo em, solong em ken soe prapa sorewei ane bi prapa gud Bosprist blo yumpla. Em stanap de prant wea God so em ken meke opring po tekemaut sin blo yumpla. 18 Prom dat taim wea em i bin go tru pein ane test, em i ken elpe yumpla nau wen yumpla i go tru ol prapa adtaim blo test.

<- Leta po Ibrupipol 1 Leta po Ibrupipol 3 ->