1 Hiti chun keiman nangho hungvil kit'a nagimnau kibelapna ding chu boltahlou dinga kagellhah ahitai. 2 Ajeh chu, keiman nangho lunghemsah taleuveng, kon eikipasah ding hitam? Atahbeh in koima dang hilou kalunghemsahho joh chu hung hiding nahiuve.
3 Hiti ahijeh a nahenguva dinga kajih ngai banga kahin jih hi keima kahung tengleh, kipana sangpen eipe dingho chun eilungnat sahlouna dingu kati ahi. Nangho nakipa jaluva ka kipana hung umdoh theibou ahi ti hi nabonchauva nahet'u ahi. 4 Hiche lekhathot kajih chu lunghemna lentah neija, lunggimna neipuma chule mitlhi tamtah sohleuva nangho lungnat ding chu deilou jeh a, ichangeiya nangho kangailut'u ham ti hi nahetjoh dingu kati ahiye. 5 Keiman hiche hoa hahsatna hinlhutpa amatah hin keima eisuh lungnat sangin nangho nabonchauvin nalungnatsah uve ti thudol kasei hi seivala thusei chu kahipoi. 6 Nangho atamjo chengsen kilungkhat tah a ama douna a thu natan uva chu gimbolna ama dinga aphakhopset kipea ahi. 7 Hinama jongleh, tua ama chu ngaidama chule lhamonjoh ding ahitai. Achuti louva ahileh amahi lunglhah behsehna chun thunun khaget inte. 8 Hiti chun, tun ama hi nangailutnau chu photchetna neipeh un tia kangeh nahiuve. 9 Keiman kabol ji ngai banga nangho henga kahinjih hi nangho patepna a, phatea thua nung nahiu hinam ti kavetnau ahibouve. 10 Ama hi nangaidam tenguleh keimatah in jong kangaidame. Chule keiman kangaidam dingdol chengse kangaidam tengleh, keiman Christa thuneina'a nangho phatchomna dinga kangaidam ahi. 11 Hichu Satan in eithujo theilouna dingu hiya ahi. Ajeh iham itileh ama lunggon phalouho chu ihetsau ahi.
12 Keima Troas khopia Christa Kipana Thupha seiphong dinga kahung chun, Pakaiyin keima dingin thusei theina kot eihonpeh in ahi.[~1~] 13 Hinlah kasopipa Titus chu nanghoa kona thupoh hinpoa hunglhung loulai ana hi jeh chun, keiman lung olna kana neitheipon ahi. Hitia chu keiman nangho kadalhah uva Macedonia gam'a ama gahol dinga kanache ahitai. 14 Hinlah Pathen thangvah in umhen! Aman sohchanga eikoiyu hin Christa a jona a chu eipuilut'u ahitai. Tua hi aman eiho Christa hetna thuhi gimnamtui tobanga muntina seichoile dinga eimanchah u hitai. 15 Kahinkhou hi Christa atobanga Pathen henga gimnamtui hungnamdoh a ahitai. Hinlah hiche gimnamtui hi Huhhing'a umho dinga hihen amangthah ho ding hijongleh gimnam chom choma namdoh a kahitauve. 16 Keiho hi amangthah ho dingin kichat um thina gimnam le mahthahna kanamu uve. Hinla huhhingna chang ho dingin keiho hi hinna pea gimnam kanamu uve. Hitobang tah a tohding kingansena chang dinga kiloma koi hintem? 17 Keiho hi chang phatchomna hola thuseiphong lea kahipouve ti nanghon naheuve. Keiho hi Pathen in eivet jingu ahi ti hea lung dihtah pua chule Christa thuneina'a thuseiphonga panga kahiuve.
<- 2 Corinth 12 Corinth 3 ->