1 Anithum nin Galilee gamsunga Cana khoa moupui golvah khat aum in, chua chun Jesu nu jong apange. 2 Chule hiche golvahna'a chu, Jesu leh aseijui ho jong akouvu ahi. 3 Golvahna lengpi twi alhin lel phat in, anun Jesu jah'a “Lengpi twi anei tapouve,” ati. 4 “Ngailut umtah Numei, hichu eini boina ahipoi” tin Jesun adonbut'in, “Keima kaphat lhing loulai,” ati. 5 Ahivangin anun lhacha ho jah'a, “Aman najah uva asei jouse bol un,” ati. 6 Akom'uva chu kisuhtheng na songbel lentah cheh gup um ahi. Bel khat chu tuithei somni somthum koina thei cheh ahi. 7 Jesun soh ho jah'a “Songbel ho chu twi sungdim un,” ati; hichun amahon twi asundim phat un, 8 Aman ajah'uva, “Tun phabep thaldoh unlang golvah vaihompa henga choiyun,” ati, chuin lhacha ho chun aseibang chun aboltauve. 9 Chuin golvah vaihompa chun, twisih lengpi twi kisosah chu atep khan, ahung kondohna hechen louvin (lhacha hon vang aheuve), moulang chu akouvin, ajah'a; 10 “Mitin in lengpi twi chihpen ahomdoh masa jin, mihon adon khop tengle, adaojep ahomji bouve, ahin nangman tugeiyin achih pen nahom nalaiye,” ati. 11 Galilee gam'a Cana khoa hiche melchih na kidang abol hi ama loupi kiphon dohna dinga anatoh masapen ahi, hichun aseijuiten ama atahsan tauve. 12 Kichen golvah kichai jou chun, ama anutoh asopiho toh, chule aseijui ho toh Capernaum a nikho phabep umdingin ache tauvin ahi.[~1~]
13 Chuin Judah te kalchuh kut anai phat in, Jesu Jerusalem'a achetai.[~2~] 14 Chuin Houin sunga kivei mihon kilhaina thilto ding bong, kelngoi chule vapal ajoh'uva chuleh sum lhengho atouvu agamu dohtan ahi. 15 Hichun Jesun khao phabep ahol'in, kijepna asem in, amaho jouse chu Houin a konin adeldoh tan ahi, chule aman bong le kelngoi ho chu anomangin, sum lhengho dokhang alekhup peh in, sum ho athethang peh in; 16 Chuin vapal joh ho koma achen ajah uva, “Hiche hohi hilai mun'a konin podoh un, Kapa In chu nanghon kailhang mun sosah hih un,” ati. 17 Hichun aseijuiten, Pathen lekhabua themgao thusei, “Na-in dinga katompan hin katha jouse eine chaiye,” tichu ahin gel doh tauve.[~3~] 18 Ahivangin Judah vaipo hon ajah'a “Ipi ham nabol? Hitobang bolna dinga thuneina Pathen in napeh mong ahileh amelchihna kidang khat neimusah un,” atiuve. 19 Jesun adonbut'in, “Aphai, hiche Houin hi suchim un, chule Keiman nithum in tungdoh inge,” ati.[~4~] 20 Hichun amaho tijatah'in, “Hiche Houin sah na a kum som li le kum gup jen lut'a, nangin nithum'a iti nasah doh ding ong?” atiuve. 21 Ahivangin, Jesun hiche Houin ati chu Ama tahsa aseina ahibouve. 22 Hiche hi Ama thina a kona kaithouva a um nung chun, aseijuiten ipi aseina ahi ahin geldoh un, Pathen lekhabua thuho leh Jesu thusei ho atahsan tauve. 23 Kalchuh kut laiya, Jerusalem'a aumpet'a Jesun thil kidang melchihna abolho jeh chun mitamtah in ama atahsan tauve. 24 Ahivangin amaho chu Jesun atahsan poi, ajehchu mihem hina chu aman ahetsa ahi. 25 Ama dingin mikhat thudol adang khat in ama henga hettohsah angaipoi, ajeh chu mijouse lungsung ahetsa ahi.
<- John 1John 3 ->