1 Chuin chua kon chun Jesu achedoh'in, achenna Nazareth lamah aseijuite toh achetan ahi. 2 Cholngahni ahunghi phat in Judaho kikhopna in'ah thu ahil panin, chuin athuhil chu mi tamtah ajaho chun kidang asauvin, “Hichepa hin hoiya kon'a chihna le thiboltheina hichengpi hi akilah ahitadem?” atiuvin ahi. 3 Chuin nuisat toh athovin, “Ama hi thingthem bol maimai, Mary chapa, chuleh James, Joseph (Joses), Juda le Simon sopipa ahibouve. Chule asopi numeiho jong ilah uva cheng uva hi,” atiuvin ahi. Amaho chu alungu adongin ahivangin atahsan nom pouvin ahi. 4 Chuin Jesun adonbut in ajah uva, “Themgao chu ama achenna gamsung le ainkote lah chule ama insung tailouvin mundang jouseah jabolna achang jin ahi,” ati.[~1~] 5 Chukoma miten atahsanlou jeh'un ana damlou phabep khat chunga akhut angapma adamsah tailou chun thil kidang ima abol theitapoi. 6 Atahsanlou dan'u chu adatmo lheh jenge. Chuin khonainai dunga achelelen thu ahille tai.
7 Chuin aseijui somleni ho chu akouvin, lhagaoboh chunga thaneina apen, chujouvin mi ni-nin asoldoh tai. 8 Chule ajinnauva tenggol tailou imadang, changlhah jong, sakhao jong, dangka dip sunga sum them jong—akenlouhel diuvin thu apei. 9 Kengchot vang akiseuva, sangkhol thoni vanga kiahlou diuvin aseipeh-in ahi. 10 “Hoikom hijongle nachena chan uva, nalhun lhunnau in'a chun khosung napotdoh kahseuvin umun. 11 [~2~]Ahinlah koi kho hileh nahin lhunsahlou le nathu seiyu ngailou khomite nadalhah tengule dalhah ahitauve ti ahettohsahnan nakeng phanguva agam leivui chu thinglhauvin,” tin thu apei.[~3~] 12 Chutichun akipatdoh un, mihemten lunghei ding ahi ti chu ahillhangleuvin, 13 Thilha tamtah jong anodoh'un, ana-damlou tamtah jong thao anu uvin aboldam un ahi.[~4~]
14 Jesu min gamtina akithan tah jeh chun Leng Herod Antipas in hiti thu chu ajatan, mi phabep in, “Ama hi John Baptist athia kon'a thoudoh kit hinte. Hijeh'a chu thilkidang boltheina anei ahi,” tin aseijiuve.[~5~] 15 Loikhat in, “Themgao Elijah ahi,” atiuvin, loikhat kit chun, “Malai themgao minthangho banga themgao khat hiyakhu,” atiuve. 16 Herod'in Jesu chung thu ajah phat in, “Alu katansa John chu athia kon'a hung thoukit hinante,” ati. 17 Ijeh-inem itileh Herod'in anaopa Philip jinu Herodias chu akichenpi ahin, amanu jal'a chu ama tah'in mi asola John chu amatsah-a, akan'a songkul'a akhum ahi.[~6~] 18 John chun Herod jah-a, “Nasopi ji jia naneiya nakichenpi hi dan ngai ahipoi,” anatijin ahi. 19 Hiche jeh'a chu Herodias chun ama chu hahot in ahot in, thadingin atup in, ahivanginla Herod phalnalouvin abol theipon ahi. 20 Ijeh-inem itileh Herod chun John chu michon phatah le mithengtah ahi ti chu ahet jeh'in ajabolin, chuleh avesuiyin ahi. Herod'in John ahoulimpi teng ahimo ji lheh in, ahijeng vang'in, athusei angainom kit jin ahi. 21 Hinlah Herodias in phat gomkom anga jing chu Herod pen nikho chun ahunglhung tai. Chuche nikhoachun gamvaipo natong alen-alalho, galsat-thalchoi lamkaiho chule Galilee gam'a milunho chengse vahnan golvah abolin ahi. 22 Hiachun achanu chu ahung lut in, alamin ahileh leng Herod le atoukhompi chengse chu alung lhaisah sohtan, chuphat'in lengpan nungahnu jah-achun, “Nagot chan thum'in, keiman pengkate,” 23 “Nathum chan chu kapeh ding ahi, kalenggam akehkhat geiya jong kapehthei nahi,” atitai. 24 Chuin amanu apotdoh'in, anu komah, “Ipi kathum dingham?” tia agadoh leh, anun, “John Baptist luchang thum'in,” ahin titai. 25 Chuphat'in amanu kintah'in lengpa hengah ahungloiyin, “John Baptist luchang tutah-in konglheng khat'in neipe lechun katipenne,” tin athumtai. 26 Chuin lengpa alunggim talheh jengin, ahivanginla mi masanga athutep le akihahselna chule a-ankong umpiho jalchun amanu thilthum chu nahsahmon akoithei tapoi. 27 Hijehchun asolchah hemchoiho khat chu John lu galadingin asoltan, ama achen songkul sungah alu agatang dentai. 28 Chuin alu chu kong khat'in ahin domin nungahnu chu apen, aman anu agapetai. 29 Chuin aseijuiten ajah phat'un ahungun along chu ahung lauvin lhan'ah avuitauve.
30 Chuin solchah hochu anatohnauva konin Jesu henga ahung kileuvin, akimanchah dan'u le athuhil danho-u chu aseiyun ahi. 31 Chuin Jesun ajah uva, “Hungun, munthip'ah chomkhat gakichol ute,” ati. Ijeh-inem itileh ahungle achele mi atam behseh jengin an jeng jong nemanlou ahitauve. 32 Hitichun amaho munthip lam jonin kongin akitolphei tauvin ahi. 33 Hinlah mi tamtah'in hitia akitoldoh-u chu anamuvin, hichun khopi mun chomchoma konin mitamtah chu twipang achun anachepheiyun, agallanga chun analhung masakit tauvin ahi. 34 Kong sunga kon Jesun kal ahinsedoh leh hitia mihonpi anaum chu Jesun amun, achingbei kelngoi hontoh abah jeh-u chun alung asen, hichun amaho chu thil tampi ahilin ahi.[~7~] 35 Nilhah lam'in aseijuite ahungun ahenga, “Hikom hi gamthip ahin, phathila agei lheh tan, 36 Hitehohi ikimvel uva loujao le khosunghoa acheuva nehding imathem agakichoh diuvin soldohtan,” atiuvin ahi. 37 Hichun Jesun adonbut in, “Nanghon aneh diu peuvin,” ati leh, “Ipi-em kapeh diu? Mi hijatpi vahna ding vang chu sum tampi kakilona diuvin lha tampi lut inte!” tin ahin donbut uve. 38 Chuin Jesun, “Changlhah pheng ijat naneiyum? Gave temun,” atin, hichun agaveuvin, “Changlhah pheng nga toh ngani aum e,” atiuvin ahi. 39 Chuin mihonpi chu abonchauvin hamhing eng lah-a chu ahon hon'a atousah diuvin aseijuite athuhil e. 40 Chuin amaho agol golin—ja khat cheng, som nga chengin atoutauvin ahi. 41 Jesun changlhah pheng nga toh nga ni chu alan, vanlam aven, phatthei aboh-in changlhah chu ahehbalbalin, a-anguvah luipeh dingin aseijuite apen, nga ni jong chu ahoppeh soh keiyin ahi. 42 Hichu amahon aneuvin, abonun aneva sohkeiyui; 43 Akivahva jouvun changlhah le nga aval chengse paipeh somleni aloh dimun ahi. 44 Mihonpi kivahva chu numei le chapangho simlouvin pasal cheh mi sang-nga vel alhinge.
45 Chuin Jesun mihonpi chu alhadoh jinglai chun aseijuite chu gal langkhat lama Bethsaida anagalkai masa dingin konga chun alutsah-in asoltan ahi. 46 Abonuva alhahdoh soh phatnin, tao dingin mol chungah akaltoutai. 47 Jansot lamin aseijuite chu dil lailunga kong chung'ah aumun, Ama achangin tolgo chunga aumden e. 48 Chuin amaho dil chunga konga akitol uva, hui le twi-nongin anuh-uva alungdon'u chu amun, khovah ding kon lamin akengin dil chungah lam ahinjot'in, amaho chu khelding agon ahi. 49 Ahin amahon dil chunga kenga lam ahin jot amu phat'un thilha hinte atiuvin, a-aosot jengun ahi. 50 Abonchauva Amachu amu sohkeiyu ahin, atija lheh jengun, ahivangin Aman amaho chu ahin houpaiyin ajah-uva, “Kichahih'un, hangsanuvin, keima hiche'ah kaumnai,” ati. 51 Chuin kong chunga chun akaldoh in, hui jong athip jengtai. Amaho chu alungdong lheh jengui. 52 Ajehchu changlhah kidang thudol jong chu hephatalou ahitauve. Alungtah behseh nalamuva chuti ahi.
53 Chuin agalkaiyun Gennesaret gamsung alhungun, kong chu twipam chin'ah angatauve. 54 Chuin konga konin apotdohdoh'un, miho chun anahepai tauvin ahi. 55 Agamsung uva alhai kimvel leuvin, chuah aume ti ahetna chanuvin ana-damlouho chu alupna pheh pumin ahinpu uvin ahi. 56 Achena chan khoneo, khopi chule loujao gamkochong alutna chan'ah adamlouho chu japi kititna kailhang mun'ah alupsah-un, apon mongkaibeh atham dingun ahenga ataovun ahi. Hichun athamkha chan chu adam jengun ahi.
<- Mark 5Mark 7 ->