Petera II

1 I Simeona Petera, fetrek’oro naho Firàhe’ Iesoà Norizañey,

Ho amo fa nandrambe fatokisañe mirai-hasiñe ami’ty anay, añamy havantañan’ Añahare naho i Mpandrombak’ antikañeio—Iesoà Norizañey:

2 Hasoa naho fañanintsiñe hiregorego ama’ areo handrendrehañe an’Andrianañahare naho Iesoà Talèntikañey.

Ty Fikanjiañe naho ty Fijoboñañe

3 Oniñe te i haozaran’ Añaharey ty nanolotse antikañe ze hene paiaeñe ami’ty haveloñe toy naho ami’ty fiambenañe Hake am-paharendrehañe to ie nikanjy antika ho ami’ty enge’e naho ty hasoa’ey. 4 Ie ro nanolora’e an-tika o fampitamañe jabajaba naho sarotseo, soa t’ie ama’e ro hitraok’ ami’ty vintan’ Añahare naho fa nibolitits’ amo drao-lo’ ty voatse toio. 5 Ie amy zay, milozoha hitovoñen-kavañonañe ty fatokisa’ areo naho hilala i havañonañey 6 naho filieram-batañe i hilalay naho fahaliñisañe i filieram-batañey naho fiasian-Kake i fahaliñisañey 7 naho firañetañe i fiasiañey vaho fikokoañe i firañetañey. 8 Aa ie ama’ areo vaho miraorao, ro isebaña’e tsy halejolejo tsy ho po-bokatse ami’ty faharendrehañe i Talèntika Iesoà Norizañey. 9 F’ie tsy ama’e, le rìpeke, toe fey, amy te nandikofa’e ty nañeferañe aze amo hakeo taoloo. 10 Ie amy zao ry longo, imaneo an-joton-tro ty hañatò i fikanjiañe naho fijoboñañe[a] anahareoy, amy t’ie mitoloñe am’ irezay, le lia’e tsy hitsikapy, 11 vaho hatobake ama’areo ty fizilihañe am-Pifehea-tsy modo’ i Talè naho Mpañàha an-tika, Iesoà Norizañey.

Ty Fitokiañe amo Sokitse Masiñeo

12 Aa le tsy hapoko t’ie ho tiahieñe am’irezay ndra te fohi’ areo vaho ijohaña’ areo ty hatò ama’ areo henaneo. 13 Eka ataoko mañeva ty hañetseketseke ty fitiahia’ areo, zaho mbe an-kiboho’ ty tsandriñe atoañe, 14 fa apotako te hadoko aniany ty kibohotse toy, amy nampalangesa’ i Talèntika Iesoà Norizañey amakoy. 15 Aa le imaneako te zaho fa nonjoneñe añe, ty hahatiahia’areo nainai’e irezay.

16 Tsy nañorike talily finoromporom-pañahy te nampandrendreha’ay ama’areo ty haozarañe naho fitotsaha[b]’ i Talèntika Iesoà Norizañey, f’ie valolombeloñe nahaisake i enge’ey, 17 ie nandrambe hasiñe naho engeñe aman’ Añahare Rae, naho niheo ama’e i fiarañanañañe boak’ amy Engem-bolonahetseiy, nanao ty hoe:

Intoy ty Anak’ isoko, O toe norokoo.[c]

18 Tsinano’ay i fiarañanañañe boak’ andindìñe ey, t’ie nindre ama’e amy vohitse miavakey.

19 Toe aman-tika o tsaram-pitoky niventeñeo, le mahasoa anahareo ty hitsendreñe, hoe t’ie jiro mireandreañe am-pimoromoroñañe ao, ampara’ te manjirike i àndroy vaho mionjoñe i misaron-kazavañey[d]. 20 Le maharendreha hey añ’arofo ao te tsy amy sokitse masiñey ty fitokiañe niboak’ ami’ty fisafiria’ ondaty. 21 Amy te mbe lia’e tsy nanoeñe ami’ty zoton-tro’ ondaty ty fitokiañe, fe ondaty nentoe’ i Arofo-Masiñeio t’i ninday taroñe boak’ aman’ Añahare.

Petera II 2 ->