Languages
8
Mama netõnére queti Jesuména jeawʉ

1 Niipetire yʉʉ jóarigue maquẽ ate niiã ʉpʉtí maquẽ: Marĩ sĩcʉ̃ paiaré dutigʉ́re cʉoa. Cʉ̃ʉ̃ ʉ̃mʉã́sepʉ õpʉ̃ duirípĩrõ Cõãmacʉ̃ tutuanetõgʉ̃ pʉtopʉ cʉ̃ʉ̃ wãmo diamacʉ̃́niñape jeanuãjeayigʉ. 2 Cʉ̃ʉ̃ ʉ̃mʉã́sepʉ Ãñunetõjõãri Tatiapʉre paiaré dutigʉ́ niiqui. Cõãmacʉ̃ basiro tiiwiiré tiiyígʉ; basocá mee tiiyíra.

3 Niipetira paiaré dutiráre sõnecorira niiwã, wáicʉrare sĩã sóemonecoaro jĩĩrã. Teero biiri oteré ticoaro jĩĩrã, sõneconorira niiwã. Teero tiigʉ́, Jesucristocã pai niijĩgʉ̃, Cõãmacʉ̃rẽ apeyenó ticoré cʉoró booa. 4 Jesucristo atibʉ́recopʉre pʉtʉágʉpeja, pai niiribojĩyi. Ãpẽrã́ paiá Moisére dutiré cṹũrigue jĩĩrõbirora Cõãmacʉ̃rẽ basocá néeatirere ticorá niitoaya. 5 Paiá cʉ̃́ã paderére tiirá, basocá tiirí wiipʉre padeeya. Tiiwií ʉ̃mʉã́sepʉ niirí wii queoré dícʉ niicu. Marĩ teeré masĩã Cõãmacʉ̃ Moisére jĩĩriguemena. Wiiré tiidutígʉ, biiro jĩĩyigʉ: “Niipetire yáa wii maquẽrẽ mʉʉrẽ ʉ̃tãgʉ̃pʉ́ ẽñorírobirora tiiyá; merẽã tiiríjãña”, jĩĩyigʉ. 6 Mama netõnére queti Moisére dutiré cṹũrigue nemorṍ ãñuré niiã. Marĩ Jesuré padeoráre “ãñurére bʉaádacu” jĩĩrigue too sʉguero macãrãrẽ jĩĩrigue nemorṍ ãñuré niiã. Teero tiigʉ́, Jesús pai niigʉ̃ tiiré ãpẽrã́ paiá tiiré nemorṍ ãñuré niiã.

7 Moisére dutiré cṹũriguere basocá niipetirere tiipetíjããtã, Cõãmacʉ̃ mama netõnére quetire Jesuména cṹũribojĩyi. 8 Tiipetímasĩhẽrĩ ĩñagʉ̃, biiro jĩĩyigʉ:

Cõãmacʉ̃ biiro jĩĩĩ: “Too síropʉ yʉʉ Israelya põna macãrãrẽ,
teero biiri Judayá põna macãrãrẽ
mama netõnére quetire cṹũgʉ̃da.
9 Too sʉgueropʉ cʉ̃́ã ñecʉ̃sʉ̃mʉãrẽ cṹũriguebiro niiriadacu.
Cʉ̃́ãrẽ Egiptopʉ niirã́rẽ néewitiatigʉ, tee dutirére cṹũmiwʉ̃.
Cʉ̃́ãpe yʉʉ dutirére tiiríwa.
Teero tiigʉ́, cʉ̃́ãrẽ cõãjãwʉ̃”, jĩĩĩ marĩ Õpʉ̃.
10 “Too síropʉ Israelya põna macãrãrẽ mama netõnére quetire cṹũgʉ̃da.
Biiro tiigʉ́da: Yʉʉ dutirére cʉ̃́ã wãcũrépʉre jeari tiigʉ́da;
cʉ̃́ãrẽ yʉʉ dutirére ʉseniremena yʉʉri tiigʉ́da.
Teero tiigʉ́, yʉʉ cʉ̃́ã Õpʉ̃ niigʉ̃dacu.
Cʉ̃́ãcã yáara niiãdacua.
11 Cʉ̃́ã sĩcʉ̃norẽ cʉ̃́ã menamacãrãrẽ, cʉ̃́ãya wederare ‘Cõãmacʉ̃rẽ masĩña’ jĩĩ bueriadacua.
Teero bueripacari, niipetira yʉʉre masĩãdacua.
Wĩmarã, teero biiri bʉtoá masĩãdacua.
12 Cʉ̃́ã ñañaré tiirére acabógʉda.
Cʉ̃́ã ñañaré tiiríguere wãcũnemoricu sáa”, jĩĩĩ Cõãmacʉ̃,[a]
jĩĩ jóanoã.

13 Cõãmacʉ̃ mama queti wederémena Moisére dutiré cṹũrigue petirí tiirígʉ niiwĩ. Bʉcʉ niiã. Niipetire bʉcʉ niisʉguerigue boonóña maniã. Péero dʉsaa petiádaro.

<- Hebreos 7Hebreos 9 ->