Languages
7
Manetualain dedede nala hatahori 144.000

1 Basa naa, au mete-ita Manetualain atan haa ruma nusa tetuk do inggu temak mai. Ara rambariik reu dae-inak buꞌun kahaan nara fo babata anin. De anin ta bisa fuu nai tasi dale, ta bisa fuu nai mada lai, ma ta bisa fuu ai huuk kara.[~1~] 2 Manetualain fee sara koasa ena fo rakalulutu mada lai ma tasi. Basa de au mete-ita ata laen esa bali numa nusa tetuk do inggu temak mai. Ata naa numa mamana ledo totodan mai. Ana neni dededek numa Manetualain mana masodak seku neu mai. Boe ma ana nanggou nahere nafada ata kahaak kara raa nae, 3 “Mahani dei! Boso makalulutu mada lai do, tasi do, ai huuk kara. Mahani losa ai dedede basa Manetualain hatahori neondan nara odamatan dei.”[~2~]

4 De ara rafada au rae, ata naa dedede nala Manetualain hatahorin nara ena. Sira dedesin nara, hambu hatahori 144.000 fo maruma basa leo Israꞌel mai. Sira:

5 Numa leo Yahuda mai, hambu hatahori 12.000;
leo Ruben, hatahori 12.000;
leo Gad, hatahori 12.000;
6 leo Aser, hatahori 12.000;
leo Naftali, hatahori 12.000;
leo Manase, hatahori 12.000;
7 leo Simeon, hatahori 12.000;
leo Lewi, hatahori 12.000;
leo Isaskar, hatahori 12.000;
8 leo Sebulon, hatahori 12.000;
leo Yusuf, hatahori 12.000;
ma numa leo Benyamin mai, hatahori 12.000.
Hatahori lolo-laok kara koa-kio Manetualain ma Bibi Lombo Ana

9 Basa boe ma au mete-ita hatahori dae-bafok noꞌun seli, losa ta bisa reke ala basa sara. Ara ruma basa leor, basa hatahori nusak kara, basa dedeꞌak kara ma basa nusak kara marai dae-inak ia mai. Basa sara rakabubua rasare mbali kadera man-parenda naa, ma Bibi Lombo Ana naa. Ara pake badu mutik ma toꞌu mbua sina doon rai liman nara. 10 Boe ma ara soꞌuk kokoa-kikiok rame-rame rae,

“Ai koa-kio neu ai Manetualain,
fo mana nanggatuuk nai kadera man-parenda ia.
Ai oo makadedemak Bibi Lombo Ana ia boe.
Sira iar, ndia tao rasoi-rasoda ai.
Sira iar, ndia soi eno-dala masodak soa-neu ai.”

11 Ara kokolak basa talo naa, boe ma Manetualain atan nara ruma nusa tetuk do inggu temak mai, fo mana rambariik eko-feo kadera man-parendar raa, sendek luu-langgan nara losa idu-matan nara laꞌe daer rasare mbali kadera man-parenda moꞌok naa. Mane leor ma horis kahaak kara raa oo tao talo naa boe. Basa sara rakaluku-rakatele neu Manetualain, 12 ma soda-helo rae,

“Tebe! Tebe naa!
Ai oo koa-kio neu Manetualain boe!
Ai oo makadedemak Manetualain naden boe!
Manetualain duduꞌa-aꞌafin naa, tetar laꞌe esak kana.
Manetualain koasan naa, moꞌon seli.
Manetualain barakain naa, ta neni babanggak sudi selik kana.
Ai moke makasi neu Manetualain taa-taa.
Ai fee hada-horomatak neu Manetualain ta mana ketuk.
Tebe! Ndian ena!”

13 Ara koa-kio basa talo naa, boe ma esa numa mane leo kadua hulu haak kara raa mai natane au nae, “Hatahori noꞌuk kara fo mana pake badu mutik kara iar, o malela sara, do? Ara ruma bee mai?”

14 Tehuu au aselu ae, “Taa, Papa. Au ta alela sara, seer. Papa ndia bubuluk dai lena.”

Boe ma ana nafada au nae, “Sira iar, hatahorir fo mana kalua ruma doidoso moꞌok mai ena.
Sira iar, ndia pake Bibi Lombo Ana naa daan ena,
fo safe ralao sira bua-loꞌan nara,
ma tao ramuti ralao sira badun nara.[~3~]
15 Huu naa de ara rambariik reu Manetualain kadera man-parendan matan.
Ara raono-lalau Manetualain hatu-leledon nai Uma Huhule-haradoin.
Manetualain sama-sama no sara seku neu.
Manetualain nanea sara seku neu.
16 Neu ko ara ta rameda ndoe-laꞌa bali.
Neu ko ara ta rameda dale mada bali.
Neu ko ara ta rameda ledo hotu sara bali.
Neu ko roun nara ta lofa laꞌe katobik bali.[~4~]
17 Bibi Lombo Ana mana matia-aok no kadera man-parenda naa,
neu ko Ana dadi neu sira mana lolon.
Neu ko Ana foo neni sara,
reu rinu nai oe matak fo mana neni masodak.
Neu ko Manetualain oo koka heni sira susa-sonan nara boe,
fo ara ta buꞌi ramatani bali.”[~5~]

<- Dae-bafo Beuk 6Dae-bafo Beuk 8 ->