Languages
16
Paulus haitua hara masodak fee toranook kara marai Roma

1 Nesik susurak ia, au ae akalelelak ita kaꞌa inan Febe neu ei, ma oke fo ei simbok malan dei. Ndia, ndia ara soꞌu ralan fo dadi neu mana malangga saranik nai kota Kengkrea. 2 Au oke fo ei makambela limam mara fo simbok malan no malole, sama leo hata fo nandaa soa-neu hatahori saranik kara, nahuu ana nakaesa no ita Lamatuan. Ana toꞌa hata, na, tulun doi-sou neun leo. Ana ndia tulu-fali au, ma hatahori noꞌuk ka numa fai bakahulun mai.

3 Haitua hara masodak malole numa au mai, fee kaꞌa inak Priskila[a] no ndia saon, kaꞌa Akila. Ai sama-sama makalalaꞌok Yesus Karistus ue-osan noꞌun seli ena.[b] 4 Ela kada faak ka dua sara mate fo ara tao rasoi-rasoda au. Tehuu ta kada au mesa ngga ndia oke makasi neu sara. Hatahori ta Yahudir fo mana dadi reu hatahori saranik ena, numa basa saranik kara marai bee a mesan oo roke makasi nahuu sira tutulu-fafali malolen boe.
5 Haitua au hara masodang fee basa hatahorir fo mana rakabubua fo nggarei nai Priskila no Akila uman.
Haitua hara masodak fee au nonoong, kaꞌa Epenetus. Ndia naa, hatahori makasososak fo namahere neu Karistus nai profensi Asia.
6 Haitua hara masodak fee kaꞌa inak Mia. Ana naue-osa fafandek lima-ein numa ei taladam.
7 Haitua hara masodak fee kaꞌa Andronikus no kaꞌa inak Yunia.† Susura Malalaok dedeꞌa Yunani neulaun lenak ma lasin lenak surak nae, Yunia (nade inak). Ketuk bali, na, surak rae, Yulia (nade inak). Mulai numa abad ka-13 mai, hambu ketuk surak bali rae, Yunias (nade touk). Lasi-lasi Karisten nara numa fai uluk mai duꞌa rae kaꞌa Andronikus no kaꞌa inak Yunia naa, sao holu-ndaek fo mana maue-osa soa-neu Lamatuak, sama leo kaꞌa Akila no kaꞌa inak Priskila. Sira naar, hatahori Yahudi sama leo au. Ara ramahere Karistus ena, neu au bei ta amahere. Fai bakahulun ara ruma bui dale sama-sama ro au. Sira oo dadi reu Lamatuak nedenun boe. Sira iar hatahori nelelak kara.
8 Haitua hara masodak fee kaꞌa Ampliatus. Au suen, nahuu ana nakaesa no ita Lamatuan.
9 Haitua hara masodak fee kaꞌa Urbanus. Ana oo nakalalaꞌok Karistus ue-osan sama-sama no ai boe.
Haitua hara masodak fee kaꞌa Stakis fo au suen.
10 Haitua hara masodak fee kaꞌa Apeles. Ana hambu soba-douk, tehuu ana senggi. De manggaledok ena, ana namahere tebe-tebe neu Karistus.
Haitua hara masodak fee kaꞌa Aristobulus nufanelun lalaꞌen.
11 Haitua hara masodak fee kaꞌa Herodion. Ndia ia, hatahori Yahudi sama leo au.
Haitua hara masodak fee Narkisus nufanelun lalaꞌen fo mana ramahere neu Karistus ena.
12 Haitua hara masodak fee kaꞌa inak Trifena ma kaꞌa inak Trifosa. Sira oo rakalalaꞌok ita Lamatuan ue-osan boe.
Haitua hara masodak fee au nonoong, kaꞌa inak Persis. Ndia oo naue-osa fafandek lima-ein soa-neu ita Lamatuan boe.
13 Haitua hara masodak fee kaꞌa Rufus. Ita Lamatuan ndia here nalan.
Haitua hara masodak fee ndia inan boe. Ndia naa, nok bali au ina bongging.[~4~]
14 Haitua hara masodak fee kaꞌa Asinkritus, kaꞌa Flegon, kaꞌa Hermes, kaꞌa Patrobas, kaꞌa Hermas, ma basa toranook kara fo mana leo ro sara.
15 Haitua hara masodak fee kaꞌa Filologus, kaꞌa inak Yulia, kaꞌa Olimpas, kaꞌa Nereus ma ndia fadi inan, ro basa hatahori saranik kara fo mana sama-sama ro sara.

16 Mete ma ei makabua, esa simbok esa pake iꞌidu susuek fo mana nandaak soa-neu hatahori kamaherek kara. Karistus hatahori saranin nara marai ia oo haitua hara masodak malole fee ei boe.[~5~]

Paulus fee nenori-nefadak neu sara

17 Toranoo nggara ein! Au oke fo ei besa-besa, ee! Manea matalolole, huu hambu hatahorir tao rabinggak ei fo rae ike rakatutudak ei. Hata fo ara rafada neu ei naa, ana laban neu hata fo ai manori ei ena. De boso matia-laik mia hatahori matak leo naak kara! 18 Ara ta raue-osa soa-neu ita Lamatuan Yesus Karistus. Ara raue-osa fo hambu buna-boak soa-neu kada sira ao heli-helin. Bafan nara mana laimina ndoos, mbali hatahori bei ta nalela bee ndia neulauk ma bee ndia manggarauk. Bafan nara leo bali fani oe fo kedi-ira hatahori.

19 Basa hatahorir ramanene ena rae, ei tungga makandoo Lamatuak hihii-nanaun. Huu naa de au daleng mbena sau-sau nahuu ei. Au nau fo ei dadi malela laꞌe-neu hata fo neulauk kara, ma boso babalik kasa ro hata fo manggarauk kara. 20 Manetualain naa, ndia fee ita bisa leo-laꞌo no mole-damek ma lino-lendek. Neu ko Ana ndia nakalulutu nitur malangga ina-huun koasan, ma natudu nae, ei ndia masenggin. Naa, ta dook ka ena. Au hule-haradoi fo ita Lamatuan Yesus Karistus natudu Ndia dale susuen soa-neu ei.

21 Fadi Timotius, fo mana maue-osa sama-sama no au, ana haitua hara masodak fee ei.
Kaꞌa Lukius, kaꞌa Yason, ma kaꞌa Sosipater oo haitua hara masodak boe. Sira iar, hatahori Yahudi sama leo au.[~6~]
22 (Au ia, Tertius, ndia mana surak susurak ia tungga hata fo kaꞌa Paulus nadenu au surak. Hara masodak malole numa au mai boe, huu au ia oo ita Lamatuan hatahorin boe.)
23 Au, Paulus, leo taak nai kaꞌa Gayus uman. Basa hatahori saranik kara marai ia rasiꞌe rakabua fo nggarei nai ndia uman. Ana oo haitua hara masodak boe.
Kaꞌa Erastus fo mana dadi neu mana toꞌu doik nai kota, ma ita toranoon Kuartus oo haitua hara masodak boe.[~7~]

24 [Au oke-hule fo ita Lamatuan Yesus Karistus natudu Ndia dale susuen soa-neu ei basa ngga. Baꞌu kada naa!][~8~]

Manetualain naa, ta neni babanggak sudi selik kana

25 Koa-kio Manetualain! Huu Ana ndia naena koasa fo tao ei dadi barakai. Ndia Hara Lii Malolen nae talo naa, ma au oo anori hatahorir talo naa boe, neu au afada sara laꞌe-neu Yesus Karistus. Manetualain ndia buka nafada ita basa hata laꞌe-neu Karistus ena fo hatahori lele uluk ta bubuluk, nahuu bei nemeninok. 26 Tehuu hatematak ia basa hata fo Manetualain mana toꞌu dedeꞌan lele uluk kara surak ralan nai Susura Malalaok dale, manggaledok ena. Manetualain ta mana matek, Ana ndia koladu fo basa hatahori nusa-nusak kara bisa bubuluk hata fo lele uluk nemeninok. No dalak naa, ara bisa ramahere neun, ma tungga Ndia hihii-nanaun. 27 Kada Ndia mesa kana, Manetualain. Kada Ndia mesa kana ndia nalela basa-basan. Au soꞌuk kokoa-kikiok neun, nahuu hata fo Yesus Karistus taok! Tebe naa!

Au susurang losa kada ia,
Soda-molek,
Paulus

<- Roma 15