1 Yoxꞌechꞌelal xa chtal jvulaꞌanoxuc. Mi oy cꞌusi tscꞌan meltsanbel scꞌoplale, jaꞌto xuꞌ jnoptic cꞌuxi chcom o mi oy chaꞌvoꞌ oxvoꞌ rexticoe. 2 Lacalbeic onox comel ti cꞌalal liꞌay ta xchaꞌechꞌelale: “Ti muchꞌutic ta saꞌulan to smulique, ti cꞌalal xital noxtoque, mu xa bu ta jcꞌuxubin, mu xa bu chcacꞌ ochicuc ta templo”, xacutic onox comel. 3 Jaꞌto tey chavilic mi ta jnop ti yajmantalon ti Cristoe ti cꞌalal xul cale. ¿Miꞌn chꞌabal syuꞌel avalojic ti Cristoe ti tey xchiꞌinojoxuque? 4 Chꞌabal syuꞌel yaꞌel ti cꞌalal icham ta cruze, pero ti cꞌalal ichaꞌcuxesat yuꞌun ti Rioxe, ivinaj ti oy syuꞌele. Jaꞌ noꞌox yechon uc, lavi nomone, chꞌabal jyuꞌel yaꞌel. Pero ti cꞌalal xiyule, chvinaj ti jaꞌ ta syuꞌel ti Rioxe ti chul cal ti mu xa xuꞌ ch-ochic ta templo ti muchꞌutic chalic ti chꞌabal jyuꞌele.

5 Yechꞌo un jaꞌ tscꞌan chanopic jujun mi jꞌechꞌel achꞌunojic o. Aꞌyo abaic cꞌu xaꞌelanic. ¿Mi yech ti xchiꞌinojoxuc ti Cristoe, o mi yech noꞌox chanopic? 6 Mi avichꞌojic ta mucꞌ ti Cristoe, anaꞌojic ti muc bu ta jnop li cꞌusi chcale chac cꞌu chaꞌal li muchꞌutic chloꞌlovane. 7 Chajcꞌoponbeic Riox yoꞌ mu xa xapasic o li cꞌusitic chopole. Muꞌnuc jaꞌ ta jcꞌan ti chcacꞌ avilic ti xuꞌ cuꞌune. Jaꞌ ta jcꞌan ti chapasic li cꞌusitic leque, acꞌu mi oy muchꞌu chal ti chꞌabal jyuꞌele. 8 Mi mu xa cꞌusi paltaoxuque, mu xa cꞌusi ta jpas. Jaꞌ noꞌox mi oy to cꞌusi paltae, persa chajcoltaic. 9 Acꞌu mi chꞌabal jyuꞌel chavilic, pero jun coꞌon. Jaꞌ noꞌox cuenta mi mu xa bu chachꞌunic li cꞌusi chopole. Chajcꞌoponbeic Riox yoꞌ más xavichꞌic o ta mucꞌ ti Cajvaltique. 10 Ti baꞌyi lajtsꞌibabeic tale, jaꞌ yoꞌ mu tsotsicuc xa o chul jcꞌoponoxuc ti cꞌalal xitale. Ti Cajvaltique jaꞌ yalojbon ti chajpꞌijubtasique, maꞌuc ta jsoc ajolic.

11 Voꞌotic ti jchiꞌil jbatic ta xchꞌunel li scꞌop Rioxe, slajeb xa chacalbeic tal liꞌi. Junuc me avoꞌonic, lecuc me avoꞌonic chac cꞌu chaꞌal lacalbeique. Coꞌoluc me ajolic, mu me xavut abaic yoꞌ xvinaj o ti tey xchiꞌinojoxuc ti Rioxe ti tspas ta jun coꞌontique, ti scꞌanojotique. 12 Tsacbo aba acꞌobic yoꞌ xvinaj o ti acꞌanoj abaique. 13 Chabanicoxuc la xalic li jchiꞌiltactic ta xchꞌunel li scꞌop Riox liꞌtoe.

14 Acꞌu yacꞌboxuc crasia ti Cajvaltic Jesucristoe. Naꞌic me ti scꞌanojoxuc ti Rioxe. Coꞌoluc me ajolic xchiꞌuc ti Chꞌul Espíritue ti tey xchiꞌinojoxuque.