Languages
5
Ti balbil vune schiꞌuc ti uni chije

1 Ti Buchꞌu chotol ta mucꞌ ta chotlebale, laj quil ti stsacoj ta sbatsꞌi cꞌob jun balbil vun ti tsꞌibabil ta yut ta spate, ti bajbil lec ta vucub selloe. 2 Jaꞌ jech xtoc laj quil jun tsatsal ángel ti jech tsots ta sjaqꞌue:

―¿Buchꞌu oy slequilal yoꞌ xuꞌ yuꞌun ta sjam ti libro liꞌe, jaꞌ jech xtoc ti ta sjatbe ti selloale? ―xi.

3 Pero mi jaꞌuc ti ta vinajele, mi jaꞌuc ti liꞌ ta sba banomile, mi jaꞌuc ti ta lajebale, ti oy buchꞌu ti oy slequilal yoꞌ xuꞌ yuꞌun ta sjam ti libroe. Mi jaꞌuc jun ti buchꞌu xuꞌ yuꞌun ta sqꞌuel ti cꞌusi ta xale. 4 Tey ep liꞌocꞌ. Yuꞌun muꞌyuc buchꞌu junucal ti oy slequilal yoꞌ xuꞌ yuꞌun ta sjam ta sqꞌuelel ti cꞌusi ta xale. 5 Jaꞌ yuꞌun un, jech laj yalbun ti jun mole:

―Mu xa xaꞌocꞌ más. Oy Buchꞌu laj xa stsal scotol yoꞌ xuꞌ yuꞌun ta sjame, ti xuꞌ yuꞌun ta sjatbe ti vucub selloale. Ati Buchꞌu xuꞌ yuꞌune, jaꞌ ti jun snitilul ti ajvalil Davide, ti jaꞌ snitilul xtoc ti Judae, ti coꞌol sꞌelan jcot ta leone ―xi.

6 Cꞌalal jech laj yale, jaꞌ o tey laj quil ti ta oꞌlol ti mucꞌ ta chotlebale, ti ta oꞌlol ti chanib cꞌusi cuxajtique, ti ta oꞌlol ti moletique, tey laj quil cotol jcot uni chij ti oy svinajeb ti laj yichꞌ milele. Ati uni chij taje, oy vucub xulub, vucbej sbecꞌ sat. Ati vucbej sbecꞌ sate, jaꞌ svinajeb ti vuctos stalel ti Chꞌul Espíritu yuꞌun ti Diose ti jaꞌ stacoj batel ti Dios ta sjoylej banomile. 7 Ti jcot ta uni chije jaꞌ ba stsac ti libro ti stsacoj ta sbatsꞌi cꞌob ti Buchꞌu chotol ta mucꞌ ta chotlebale. 8 Cꞌalal jech laj stsac ti libroe, jech ti chanib ti cꞌusi cuxajtique schiꞌuc ti chanib schaꞌvinic ta voꞌ ti moletique, tey lic squejan sbaic ta stojol ti jcot ta uni chije. Jujunic ti moletique oy yarpaic. Jaꞌ jech xtoc yichꞌojic batel yav acꞌal ti jaꞌ oroe, ti noj ta pome. Ti pom taje, jaꞌ smelol scꞌopojelic ti buchꞌutic yuꞌuntac ti Diose. 9 Jaꞌ jech ta sqꞌuejintaic jun achꞌ qꞌuejoj ti moletique:

Voꞌot oy alequilal yoꞌ xuꞌ ta xajam ti libroe, ti ta xajatbe ti selloale.
Yuꞌun laj avichꞌ milel.
Yuꞌun laj amanuncutic ta achꞌul chꞌichꞌel yoꞌ jech licomcutic ta yuꞌun ti Diose,
ti oyuncutic ta jujun lume, ti jujuchop ti jcꞌopcutique,
ti oyuncutic ta sjoylej banomile.
10 Ta aventa voꞌot ti liꞌochcutic ta ajvalile ti ta paleale ta stojol ti Dios cuꞌuntique.
Jaꞌ jech xtoc ta jpascutic mantal avuꞌun ta sba banomil,
xiic.

11 Tsꞌacal to un, laj quil, laj caꞌi scꞌopojelic ti mu noꞌox albajuc ti ep ta mil ti ángeletique. Tey joyolic ta mucꞌ ta chotlebal schiꞌuc ti cꞌusi chanib cuxajtique, schiꞌuc ti moletique. 12 Ti ángeletique jech tsots ta xalic:

Ati jcot ta uni chij ti laj yichꞌ milele,
jaꞌ noꞌox oy slequilal ti jech ta xichꞌ ti smucꞌul stsatsale,
ti scꞌulejale, ti sbijile,
ti xuꞌ yuꞌune, ti lec scꞌoplale, ti muyubtabile,
xiic.

13 Scotol ti cꞌusitic laj spas ti Dios ti oy ta vinajele, ti oy ta nabe, ti oy ta lajebale, laj caꞌi ti jech ta xal scotolique:

Ti Buchꞌu chotol ta mucꞌ ta chotlebale schiꞌuc ti jcot ta uni chije,
acꞌo yichꞌic ti jech ichꞌbilic ta muqꞌue,
ti jech lec ti scꞌoplalique, ti jech yan yutsile,
ti jech oy stsatsalique, ti jech xuꞌ yuꞌunique.
Jechuc o sbatel osil,
xiic.

14 Jaꞌ jech xtoc ti chanib ti cꞌusi cuxajtique jech laj yalic:

―Jechuc ―xiic.
Jaꞌ jech xtoc ti chanib schaꞌvinic ta voꞌ ti moletique laj squejan sbaic ta yichꞌel ta mucꞌ ti Buchꞌu stalel cuxul sbatel osile.

<- APOCALIPSIS 4APOCALIPSIS 6 ->