1 Dhali aris ’kwani ’baar mo kun ’koni mony’cesh mo tani uni ta gi jasi ’twan ’de/ jin wala uni kadhamo/ mo dhali ’twa/ yisa misha uni ki thatha/ thatha/ yisa. 2 Dhali me’d jin borkina ’kwani is mo e mom’pesho’k mo tani uni gamki mony’cesh jin ta’da thiṯẖin thiṯẖ mo e Pan Shinaar mo dhali uni ki ’ko nycine/ mo. 3 Dhali uni ki o gwo ka rem ’kup̱ mo ki: Iiyu/ bala dhalki ana uḵa je mo dhali ’thos uni mo ki ṯil ṯil mo. Dhali uni tan ga jeŋ gu’b ’peni wosh mo dhala dena ma sip̱ti mmorus to mo. 4 Dhali yan’ko’d uni ki o gwo mo ki: Iiyu/ mo dhalki ana nyaŋa dhan ’peŋkuman bampa/ gom is bana mo dhali gu’b jin turatur, a’di jin midi gu ’kup̱ piti gamki mis mo dhali dhalki ana ’kwara gwo gom is bana mo isi ciki/ ki ana ’konuki c̱eker bwa e bwam/e gi mony’ceshi ’baar mo. 5 Dhali Tap̱a a’di thulki’d ka ’cesh mo mmop̱ar ’peŋkuman bampa/ e mo dhali gu’ba turga/ yan mo a’di jin nyaŋkina iya/ gi ’kwani mo. 6 Dhali Tap̱a ki o gwo mo ki: Hili mo mo ma, uni ta ’kwani jin ṯala en ’de/ mo dhali uni ’baar mo wal ’twan ṯal ’de/ mo, dhali a’di ta jasi monṯel ’pen jin ṯwa/a/ mo a’di jin mina uni mii mo, dhali ma to yin jin mina uni o bwa mmomii mo tani a’di midi diki ta to jin midi p̱i uni e mo. 7 Iiyu/ mo dhali dhalki ana iina ka ’cesh mo dhali tuŋkur uni ’twa/ is mo ki uni mini ’koki mish ciḵ gwo ka gam ’kup̱ mo jin wala uni mo. 8 Wakan Tap̱a ki c̱eker uni bwa e mo ’baar mo ’peni mun ntagi bwam/e gi mony’ceshi ’baar mo, dhali uni dhalki ’peŋkuman bampa/ ’pen ki dar gi mo jin ’kona uni ki ’ka a’di ’kup̱ mo. 9 Wakan gway piti yuḵu gway ka Baabil mo haali/ Tap̱a tuŋkurki ’twa/ gi mony’ceshi ’baar mo is mo, dhali ’peni mun mo tani Tap̱a ki c̱eker uni bwa eya ris bwam/e gi mony’ceshi ’baar mo.

10 Uni gwansan uni ita emen ma Saam mo. Ka Saam ’kokina yil iss ’kwanimpa imudhe’d ka dhan piti mo tani a’di warki’d ka baba ma Arp̱akshaad mo ’ko’di yili su/ mo i’ko’di gannu/ yi’de/ mo. 11 Dhala Saam c̱a’bki’d ki e mo ’ko’di dho’th ma Arp̱akshaad mo ki yili iss ’kwanimpa i/iss ’de/ i’ce’dki iss ’kwanimpa imudhe’d mo, dhali a’di ta’dki iya/a tiya mo dhali i’bwa/a tiya mo.

12 Ka Arp̱akshaad c̱a’bki’d ki e ki yili iss ’de/ i’ce’dka ḵarpa’c mo tani a’di warki’d ka baba ma Shaalah mo. 13 Dhala Arp̱akshaad c̱a’bki’d ki e mo ’ko’di dho’th ma Shaalah mo ki yili iss ’kwanimpa i/iss ’de/ i’ce’dka kwara mo, dhali a’di ta’dki iya/a tiya mo dhali i’bwa/a tiya mo.

14 Ka Shaalah c̱a’bki’d ki e ki yili iss ’de/ i’ce’dka ’kume’d mo tani a’di warki’d ka baba ma Aabir mo. 15 Dhala Shaalah c̱a’bki’d ki e mo ’ko’di dho’th ma Aabir mo ki yili iss ’kwanimpa i/iss ’de/ i’ce’dka kwara mo, dhali a’di ta’dki iya/a tiya mo dhali i’bwa/a tiya mo.

16 Ka Aabir c̱a’bki’d ki e ki yili iss ’de/ i’ce’dka ’kume’d i’ce’dka doŋon ap̱o/ mo tani a’di warki’d ka baba ma P̱aalaj mo. 17 Dhala Aabir c̱a’bki’d ki e mo ’ko’di dho’th ma P̱aalaj mo ki yili iss ’kwanimpa i/iss ’de/ i’ce’dki iss ’kwanimpa ’de/ i’ce’dka ’kume’d ap̱o/ mo, dhali a’di ta’dki iya/a tiya mo dhali i’bwa/a tiya mo.

18 Ka P̱aalaj c̱a’bki’d ki e ki yili iss ’de/ i’ce’dka ’kume’d mo tani a’di warki’d ka baba ma Ra/u mo. 19 Dhala P̱aalaj c̱a’bki’d ki e mo ’ko’di dho’th ma Ra/u mo ki yili iss ’kwanimpa i’kume’d i’ce’dka pedoŋon mo, dhali a’di ta’dki iya/a tiya mo dhali i’bwa/a tiya mo.

20 Ka Ra/u c̱a’bki’d ki e ki yili iss ’de/ i’ce’dka ’kume’d i’ce’dka su/ ap̱o/ mo tani a’di warki’d ka baba ma Saruuj mo. 21 Dhala Ra/u c̱a’bki’d ki e mo ’ko’di dho’th ma Saruuj mo ki yili iss ’kwanimpa i’kume’d i’ce’dka pesu/ mo, dhali a’di ta’dki iya/a tiya mo dhali i’bwa/a tiya mo.

22 Ka Saruuj c̱a’bki’d ki e ki yili iss ’de/ i’ce’dka ’kume’d mo tani a’di warki’d ka baba ma Nahur mo. 23 Dhala Saruuj c̱a’bki’d ki e mo ’ko’di dho’th ma Nahur mo ki yili iss ’kwanimpa i’kume’d mo, dhali a’di ta’dki iya/a tiya mo dhali i’bwa/a tiya mo.

24 Ka Nahur c̱a’bki’d ki e ki yili iss ’de/ i’ce’dka pedoŋon mo tani a’di warki’d ka baba ma Taarah mo. 25 Dhala Nahur c̱a’bki’d ki e mo ’ko’di dho’th ma Taarah mo ki yili iss ’kwanimpa ipe’de/ i/aṯẖ ’de/ mo, dhali a’di ta’dki iya/a tiya mo dhali i’bwa/a tiya mo.

26 Ka Taarah c̱a’bki’d ki e ki yili iss ’kwanimpa ikwara i’ce’dka ’kume’d mo tani a’di warki’d ka baba ma Abraam mo dhala Nahur mo dhala Haraan mo.

27 Dhali uni gwansan mo tani uni ita emen ma Taarah mo. Taarah a’di ta’da baba ma Abraam mo dhala Nahur mo dhala Haraan mo, dhala Haraan ta’da baba ma Luuth mo. 28 Haraan wuki’di ṯwa/a/ mo ki com ga Taarah mo eya ’cesh jin dho’thkunu a’di mo e Pa Ur ma Kaldaan mo. 29 Dhala Abraam dhala Nahur mashkin mo. Dhali asha Abraam yuḵu gway ka Saray, dhali gway gi asha Nahur yuḵu ka Milkah mo a’di jin ta ’bwa/ ma Haraan mo a’di jin ta com ga Milkah dhala Yiskah mo. 30 Dhala Saray a’di ta’da burum mo. Ayim ta ga ’ciŋ kamuwa?

31 Taarah ki susa Abraam jin ta ya/m piti mo dhala Luuth jin ta’da ’ci ma Haraan mo, jin tana a’di adhancom mo, dhala Saray jin ta’da mar piti mo, a’di jin ta ash gi ya/m piti jin ta’da Abraam mo, dhali uni iikin mo mmonṯal ’de/ mo ’peni Pa Ur ma Kaldaan mmo/ii e bampa/ gi Paŋ Kanaan mo. Hili ki uni p̱u’dkin e Pan Haraan mo tani uni ki ’ko mo be. 32 Yil ma Taarah jin c̱a’bkina a’di ki e mo tani a’di ta yili iss ’kwanimpa i’kume’d i’ce’dka mudhe’d mo, dhala Taarah wuki’d mo e Pan Haraan mo be.

<- ṮAKWIIN 10ṮAKWIIN 12 ->