1 Dhala Saray, a’di jin ta asha Abraam mo tani ayim dho’thki a’di a’ciŋ kamu/ yisa. Dhala yim ta’dki nyarany c̱iŋkina/ gi Pam Masir jin yuḵu gway ka Haagar mo. 2 Dhala Saray oki’da Abraam gwo mo ki: Hili mo mo ma, Tap̱a a’di ki non aha/ mo mmodho’th uc̱i mo. Mashi nyarany c̱iŋkinam pem mo ma, ma a’di miga/ gam uc̱i ki a’di moyi. Dhala Abraam ciḵki ’twa/ ma Saray mo be. 3 Wakan ’ko’di Abraam c̱a’bki’d mo e Paŋ Kanaan mo ki yili ’kume’d mo tani Saray jin ta asha Abraam mo tani bu’thki’da Haagar jin ta ji gi Pam Masir mo dhali jin ta nyarany c̱iŋkina/ ma yim mo dhali c̱iki a’di ka Abraam jin ta’da kaṯẖim piti mo mmota ash mo. 4 Dhali a’di mashki’da Haagar mo dhala yim bwaaki’d mo. Dhali ka yim mishki’d mo ka yim bwaaki’d mo tani ayim hilki’da ’bom jin karu mmohil nyarany c̱iŋkina/ yin ka waḵ mo. 5 Dhala Saray ki owa Abraam gwo mo ki: Dhalki to jin ṯẖuthu mii ap̱o/ aha/ mo di /e ’ba/ mo ma. Aha/ de c̱ikina /e nyarany c̱iŋkinam pem mmokoṯẖ e me’d pini mo dhali ka yim mishki’d mo ka yim bwaaki’d mo tani ayim ki hil aha/ ka waḵ mo. Dhalki Tap̱a a’di idwall gwo ibwaman /e mo dhali aha/ mo ma. 6 Hili Abraam ki owa Saray gwo mo ki: Hili mo mo ma, nyarany c̱iŋkinam pini di’d e mom’bi’th pini mo. Miiyi to ka yim me’d jin o /e bwa mo ma. Yan’ko’d Saray ki us mii is mo ki gwony ’cwar goma yim mo dhala ayim ki gus ya ŋwac̱a/ mo ’peni a’di mo be.

7 Dhala man’doyu gwo gi Tap̱a gamki’da yim e yi’de/ jin kasha e mo e mombwaasho mo. A’di ta yi’de/ jin kasha e jin di’d e bway gi Pan Shur mo. 8 Dhali a’di ki o gwo mo ki: Haagar nyarany c̱iŋkina/ ma Saray, /e p̱u’dkin mo ’peni mana mo dhali /e yani ya mana mo? Ayim oki gwo mo ki: Aha/ guskina ka ŋwac̱a/ mo ’pena ’bom jin karu mmohil aha/ jin tana nyarany c̱iŋkina/ mo, ayim jin yuḵu gway ka Saray mo. 9 Aman’doyu gwo gi Tap̱a ki owa yim gwo mo ki: Doḵu/ mo eya ’bom pini jin karu mmohil nyarany c̱iŋkina/ mo dhali ’dap̱i ’twa/a ’cesh eya yim mo. 10 Aman’doyu gwo gi Tap̱a ki owa yim gwo mo si’da/ ki: Aha/ mina mar emen pini kun mini pi ’peni /e mo is kagahara mo wakansan ki uni minu mol deŋ e gom uni mini ta adhana buhany wathimpa caaca kan mo. 11 Dhala man’doyu gwo gi Tap̱a ki owa yim gwo mo ki: Hili mo mo ma, /e bwaakin mo dhali /e mini dho’th ya/ mo. /E mini yer a’di gway ka Isma/iil mo haali/ Tap̱a c̱iki’da hirdhe/ gom monṯo’c bwam pini mo. 12 A’di midi ta wathiŋ gwaṯẖ me’d thuluny bwaasho mo, dhali me’d piti midi di ap̱o/ aris ’kwani ’baar mo dhali me’d ga ris ’kwani ’baar si’da/ mini ’ko ap̱o/ a’di mo dhali a’di midi c̱a’b ap̱o/ aris uni ma bas piti mo be. 13 Dhala yim yerki gway gi Tap̱a jin ṯorki a’di gwo mo ki: /E tana Arumgimis jin mishi mo mo, haali/ ayim ki o gwo mo ki: A/aha/ ka jiŋ gana/ mishkina Arumgimis mo dhali aha/ dina ki e mo naskina/ ’ko’di aha/ mishkina a’di mo ’taa? 14 Haali/ a’di wakan mo tani jis yi’de/ yan yuḵkunu gway ka Birlahayru/i mo. A’di di’di bwaman ma Kaadish dhala Baara’d mo.

15 Dhala Haagar dho’thki ya/ gom Abraam mo dhala Abraam ki yer gway gi ya/m piti jin dho’thkin ma Haagar mo ka Isma/iil mo. 16 Dhala Abraam ’kokini yili iss ’kwanimpa idoŋon i’ce’dka pe’de/ mo me’dyin Haagar ki dho’th Isma/iil eya Abraam mo be.

<- ṮAKWIIN 15ṮAKWIIN 17 ->