LUUKA 4

Mo gi Paluwa Yesus mo

1 Dhala Yesus ’tu’dkunu mo ki Shi/in Dheleladhelel mo dhali doḵki’d ka nyaŋ’ko’d mo ’peni Yi’deŋ Ḵumma/ Uurdun mo dhali a’di ura Shi/in mo ka pije/ mo. 2 Dhali a’di diki’d em bwaasho ka cim ma issu/ mo dhali palkina tap̱a ma ruma ’cesh mo be. Dhali a’di diki shwa toŋ kamu/ mo eya cim gwansan mo. Dhali ka cim ’baarkin mo tani a’di ’koshkina ṯe/ mo be. 3 Dhali tap̱a ma ruma ’cesh ki o a’di gwo mo ki: Waḵki/ /e ta Ya/ ma Arumgimis mo tani ḵani wosh yansan gwo mo ma, mmowar ki maa mo. 4 Dhala Yesus thoḵ a’di gwo mo ki: A’di ’kwarkunu mo ki: Wathi/ midi diki c̱a’b mo ki e mo gom jasi tonṯe/ ’te/ mo. 5 Dhali tap̱a ma ruma ’cesh ki sus a’di ki mis mo dhali ṯor a’di aris ’peŋkuman bampa/ gi mony’cesh mo, ki e ’kamu’thki’d mo hila/ mo tani 6 dhali a’di ki o a’di gwo mo ki: E /e mo tani aha/ mina c̱i /e aris moshirr gwansani ’baar mo dhali monycam buni mo. Haali/ uni c̱ikunu aha/ mo dhali aha/ c̱ikina uni gwansan kun oyaa/ bwa mo be. 7 Waḵki/ /e mini luŋ aha/ kan mo tani uni ’baar mo mini ta kum pini mo be. 8 Dhala Yesus thoḵ a’di gwo mo ki: A’di ’kwarkunu mo be ki:

/E mini luŋ Tap̱a Arumgimis pini mo,

dhali a’di a’di ’de/ mo tani a’di imina /e mmii to mo be.

9 Dhali a’di ki sus a’di mo e Pa Urushaliim mo dhali a’di ki kar a’di e ’kup̱an gu’b gi mondheleladhelel mo dhali o a’di gwo mo ki: Waḵki/ /e ta Ya/ ma Arumgimis mo tani biṯi is pini ka ’cesh mo ma ’peni mahan mo, 10 haali/ a’di ’kwarkunu mo ki:

A’di midi hash iman’doyu gwom piti mo mmoḵan gwo gom /e mo dhali mmoji /e mo,

11 dhali,

E me’d buni mo tani uni mini ’de’k /e mo,

isi ciki/ ki /e mina sho’k pini diki ṯorosh ap̱o/ wosh mo be.

12 Dhala Yesus thoḵki a’di gwo mo ki: A’di okunu mo ki: /e mini dhalku/ ki pal Tap̱a Arumgimis pini mo. 13 Dhali ki tap̱a ma ruma ’cesh ’baarki mompal piti mo tani a’di yaki’d mo ’peni a’di mo ntagi embula ’borga/ mo be.

Yesus Ṯelki Mii ma Ṯu’c Piti ’Pen mo

14 Dhala Yesus doḵki’d mo ka nyaŋ’ko’d ki mom’bi’th gi Shi/in mo e Pany Jaliil mo dhali gwo gom a’di yaki’d ki lala’th mo eya ris bampa/ ’baar mo kun ’kon ki jiŋ ’kam mo be. 15 Dhali a’di ṯorki gwo mo e gu’b gi montul is buni mo dhali a’di karkin ma ris ’kwani ’baar ki ca mo.

Yesus A’di Waḵkunu mo e Pa Naasira mo

16 Dhali a’di p̱u’dki’d mo e Pa Naasira mo e mo jin thip̱kunu a’di mo. Dhali a’di yaki’d mo e gu’b jin tulu is mo, me’d miim piti jin miikina a’di mo, ka cim ma pesu/ mo. Dhali a’di doshki’d ki mis mo dhali deŋ gwo e mo. 17 Dhali a’di c̱ikunu awarka/ gi gwo ma manc̱i gwo ma Arumgimis kadhamo/ jin ta’da Ishaya mo. A’di ḵa’dki’da warka/ mo dhali gam mo jin ’kwarkunu gwo nycine/ mo ki:

18 Shi/in gi Tap̱a a’di diki’da p̱o/ aha/ mo,

haali/ a’di ’koshki aha/ is ki monyca mo mmoc̱i gwom ’boro’d mo gom uni gun hatha’ko’d mo.

A’di hashki aha/ mo mmobah eya tente/ mo mo jin ’cuḵu uni gwansan kun tana habuus mo,

dhali mmoḵa’d uni e mo uni gun tana ja’da/ mo mmomish mo mo,

dhali mmodhu uni gwansan ki ’kus mo, uni gun ’cwarkunu mo be,

19 mmobah eya tente/ yil jin kwanyu mo gom Tap̱a mo.

20 Dhali a’di mu’thki’da warka/ mo dhali c̱i a’di ka nyaŋ’ko’d mo e a’di jin doshki’d mo mmomii to mo dhali a’di c̱a’bki’da ’cesh mo. Dhali aris e gi ’kwani kun ’kon e gu’b gi montul is mo tani dhoro’thkina p̱o/ a’di mo be. 21 Dhali a’di ṯelki gwo ’pen mo dhali mmo/o uni gwo mo ki: Shwane/ Gwo ma Arumgimis yan jin ’kwarkunu mo tani a’di thimkunu mo e bwany’cem bum mo mmociḵ mo be. 22 Dhali aris ’kwani ’baar mo o gwo ki ’bore/ gom a’di mo dhali mer mo gom gwo ma ’the kun pikin mo ’peni ’twam piti mo. Dhali uni o gwo mo ki: A’di diki ta Ya/ ma Yuusup̱ mo ’taa? 23 Dhali a’di ki thoḵ uni gwo mo ki: Ka jiŋ gana/ um mini thoḵ aha/ gwo mo ’peni gwoŋ gwar ka ’bi’th/e ki: /e jin tana hakiim mo tani wac̱i is pini mo ma. Gwo jin ciḵa aman mo gom miim pini jin miikina /e mo e Paŋ Kap̱ranahuum mo tani miiyi a’di si’da/ mmahan mo e bampam piniŋ gana/ mo ma. 24 Dhali a’di thoḵ uni gwo mo ki: Ka jiŋ gana/ aha/ ona um gwo mo ki: amanc̱i gwo ma Arumgimis kadhamoŋ kamu/ yisa mishu bu’th mo e bampam pitiŋ gana/ mo. 25 Dhali hili e gwoŋ gana/ mo tani aha/ ṯora um gwo mo ki up̱ ka ris kun wuna ikaṯẖ ’kokin mo ka ris e ’Kwani ma Israyiil mo ka tee ma Iliyya mo, ki momis dar ga sho’k mo ki yili kwara mo dhali ka ppe ’kup̱i pe’de/ mo dhali adhan ṯe/ p̱u’dki’d mo ap̱o/ mony’ceshi ’baar mo. 26 Dhali Iliyya yisa hashkunu mo e jan ṯal ’deŋ kamu/ ’peni uni mo yisa, hili jasi e a’di jin di’d e Pan Sarp̱a mo e Bampa/ gi Pan Saydaa/ mo eya ’bom jin wun ma kaṯẖ mo be. 27 Dhali e mun mo tani ’kwani ’kon ka ris kun ’kosha monthus mo e ’Kwani ma Israyiil mo ka tee jin tan ma Aliisha amanc̱i gwo ma Arumgimis kadhamo/ mo dhali jan ’deŋ kamu/ ’peni uni yisa dhelelki’d mo yisa, hili jasa Nimaan gi Pan Suriyya mo be. 28 Dhali ki uni ciḵki gwo yansan mo tani aris ’kwani gi gu’b gi montul isi ’baar mo ’tu’dkunu mo ka nyor mo be. 29 Dhali uni cuki mis mo dhali kar a’di ’pen ka pije/ mo ’peni ’peŋkuman bampa/ mo dhali sus a’di mo eya liman ’twa/ wosh e mo jin nyaŋkunu ’peŋkuman pam buni mo, ki uni mini ’taki bel a’di ka ’cesh ka luŋgu’b mo be. 30 Hili mmoyakina a’di ki yampe mo e bwam uni mo tani a’di yaki’d mo.

Wathi/ jin Bu’thkin ma Rum Thus jin Nyo/o’d mo

31 Dhali a’di p̱u’dki’d ka luŋgu’b mo e Paŋ Kap̱ranahuum mo e ’peŋkuman pa gi Pany Jaliil mo. Dhali a’di c̱iki uni gwo mo ka cima pesu/ mo be. 32 Dhali uni merkin gom gwony c̱im piti jin c̱ina a’di ki moshirr mo be. 33 Dhali e gu’b montul isi mun mo tani wathi/ diki’d jin ta’d ga rum thus jin nyo/o’d mo. Dhali a’di cuu gwo ka dhan ’twa/ jin caaca ki: 34 Ahh. /e mini mii aman kata, Yesus gi Pa Naasira? /e p̱u’dkin mo mmo’ce’d am sho’k mo ’taa? Aha/ misha ki /e tana aja. /e ta jin ’de/ ma Arumgimis jin ḵogu mo. 35 Hila Yesus ḵucurki a’di ki gwo mo mmo/o gwo mo ki: C̱a’bi ki shwam mo, dhali piyi mo ma ’peni a’di mo. Dhali ka rum thus jin nyo/o’d biṯki a’di a’cesh mo e bwam uni mo tani a’di piki’d ka pije/ mo ’peni bwam a’di mo. A’di diki mii to shiyi’da kamu/ gom a’di mo. 36 Dhali aris uni ’baar mo merkin mo dhali doṯ gwo ka rem ’kup̱ mo ki: Gwo yan ta’da atinta mo? Haali/ ki moshirr mo dhali ki mom’bi’th mo tani a’di ḵanki’da rum thus kun nyo/on gwo mo dhali uni iikin ka pije/ mo be. 37 Dhali gwo gom a’di yaki’d ka pije/ eya ris mo ’baar mo e bampa/ kun ’kon ki jiŋ ’kam mo be.

Mo jin Wac̱ ma Yesus Amar ma Simaan jin Ta’da ’Bomi mo

38 Dhali a’di cuki mis mo dhali dhal gu’b gi montul is ’pen mo dhali cic̱ mo e gu’b ma Simaan mo. Dhali amar ma Simaan a’di ’ba’thki’d ki is jin ’batha’ba’th mo dhali uni ŋap̱ki a’di goma yim mo be. 39 Dhali a’di doshki’d e ’kup̱ ma yim mo dhali ḵucur ’ba’th ki gwo mo, dhali ’ba’th dhalki’da yim ’pen mo. Dhali ki jahanne/ ayim cuki mis mo dhali miiki uni to mo be.

Mo jin Wac̱ ma Yesus ’Kwani ka Ris Mom’pimpili/ mo

40 Dhali ka tente/ yaki jis mo tani aris uni gwansan kun tan gi tiya kun ’bathan ki ’ba’th ki she/ ki she/ mo tani uni ḵalki uni mo e a’di mo dhali a’di karki me’d piti ap̱owa ris uni ’baar mo ka ’deṯe/ ’deṯe/ mo dhali wac̱ uni mo be. 41 Wakan si’da/ arum thus pikin ka pije/ mo ’peni bwam uni ka ris mo mmocuu gwo mo ki: /e ta Ya/ ma Arumgimis mo. Dhali hili a’di ḵucurki uni ki gwo mo dhali a’di diki dhal uni bway mo mmowal ’twa/ mo haali/ uni mishkin ki a’di ta’da Ḵrisṯẖos mo be.

Yesus A’di Yaki’d mo Mmotan Bampa/ mo Mmoc̱i Gwo mo

42 Dhali ki mo ta montee mo tani a’di yaki’d mo dhali ya mo e mo jin dar ki ’kwani mo. Dhali ’kwani ŋap̱ a’di mo dhali p̱u’d mo e a’di mo dhali uni ki non a’di mmoya mo ’peni uni mo be. 43 Hili a’di o uni gwo mo ki: Aha/ mina mii c̱i gwom ’boro’d gom Bampa/ ma Arumgimis mo gom ’peŋkuman bampan tiya mo si’da/ haali/ aha/ hashkunu mo gom ’pemen yan mo be. 44 Dhali a’di c̱iki gwo mo e gu’b gi montul is gi ’Kwani Yahuudiyya mo be.

<- LUUKA 3 LUUKA 5 ->