GWO JIN ’CEENU MO 17

Gwo jin Toru Gwo ’Twa/a ’Cesh goma Dhana ’Bom C̱al mo

1 Dhali yan’ko’d jan ṯal ’deŋ kamu/ ’peni iman’doyu gwo jin ’kon ma p̱o/i pesu/ mo, a’di jin taki’d gi toŋ’kul bwa kun ’kon ma p̱o/i pesu/ mo tani p̱u’dki’di aha/ mo dhali o aha/ gwo mo ki: Yayu/ mo. Aha/ mina ṯor /e adhan gwon dwall jin toru gwo ’twa/a ’cesh jin caaca mo goma dhana ’bom jin mii miinyc̱al mo, a’di jin c̱a’bki’da p̱o/ yi’de/ ka ris mo. 2 A’di jin miikina imaliḵ kun ’kon e mony’cesh gwansan miinyc̱ala p̱o/ mo dhali uni ki p̱i yimana mura’th jin ḵa/u ki ŋah ŋah mo ki uni gwansan kun miiki miinyc̱al kun ’kokina p̱o/ mony’cesh mo, dhali uni warkin ki uni gun ’koshkin ma su mo. 3 Dhali a’di ki sus aha/ ki Shi/in mo e mombwaasho mo dhali aha/ p̱arkina ’bom e mo mmoc̱a’b ap̱o/ to/eŋ kamu/ jin ta’da duḵ is mo, a’di jin ’tu’du/ is ki gway jin walu gwo sor mo, dhali a’di ta gi ’kup̱i pesu/ mo dhali ce i’kume’d mo be. 4 Dhali a’bom a’di hi’thkunu is ki burrinyem buhe/ mo dhali jin ta’da duḵ is mo dhali ayim nyoŋkunu is ki ’dolkon gana/ mo dhali wosh kun ta kun dhel mo dhali dhema/ mo, dhali ayim bu’thki’da ḵubbaaya jin ta ’dolkon gana/ mo e me’d piti mo jin ’tu’dkunu ki mii kun bulabul mo dhali mii kun ’kan ma yima ḵanthi/ mo gom mo jin miin ma yim miinyc̱al mo. 5 Dhali e buye/ ma yim mo tani a’di ’kwarkunu gway ki gwo jin bagu mo ki: Pam Baabil jin caaca mo, a’di jin ta’da ata’da gi uni kun cila c̱al mo dhali uni kun cila mii kun bulabul mo e mony’cesh mo. 6 Dhali aha/ p̱arkina ’bom e mo mmo’koshkin ma bas gi uni kun dhunu ki she/ ki dhelel dhelel mo dhali abas gi uni kun ’ciṯẖu/ ’kup̱ mo goma Yesus mo be.

Ki aha/ hilkina yim mo tani aha/ merkina ki dhan mer jin shiyi’d mo. 7 Hili aman’doyu gwo ki o aha/ gwo mo ki: Katinta mera eye? Aha/ mina ṯor /e gwo jin c̱inu ki jim bag mo goma ’bom yan mo dhali gom to/e jin ’kona ’kup̱i pesu/ mo dhali jin ’kona ce i’kume’d mo jin ḵalki’da yim ka pije/ mo. 8 Dhali to/e c̱aan jin p̱arkina /e e jin piki’d mo tani a’di diki di mo dhali a’di minu shinu/ ’peni jis jin dar gi ’pemen mo dhali ya mo e mo jin minu daḵ gwo me’d mo. Dhali uni gwansan kun ’kon e mony’cesh mo uni kun ’konuki ’kwar gway buni eya warka/ gi mondiki/e mo ’peni mo ma muŋ’kup̱ ki mony’cesh yansan ’konuki ḵa’b mo tani uni mini mer ki mer jin shiyi’d mo mmohil to/e mo haali/ a’di diki’d mo dhali midi diki di mo dhali a’di midi p̱u’du/ mo. 9 Mii yaase a’di minu mii kor e ki kor nycine/ mo ki moyuḵ mo. ’Kup̱ kun ’koni pesu/ mo tani a’di ta dhan ’kuwosh kun turatur mo kun ’koni pesu/ mo, e mo jin c̱a’b ma ’bom mo. 10 Dhali uni si’da/ ita imaliḵ kun ’koni pesu/ mo dhali kun ’koni mudhe’d mo tani ṯa’kkin mo, jan ṯal ’de/ a’di doshki’d mo, dhali jaŋ kamu/ yisa p̱u’dki’da naskina/ mo, dhali ki a’di midi p̱u’du/ mo tani a’di midi mii c̱a’b mo ki jasi ari mo mo. 11 Dhali gom to/e yansan jin diki’d mo dhali diki di mo tani a’di i’kon ma p̱o/i pekwara mo, hili a’di icila uni gun ’koni pesu/ mo dhali a’di yaki’d mo e mo jin daḵu gwo me’d mo be. 12 Dhali ce gwansan kun ’koni ’kume’d kun p̱arkina /e e mo tani uni ita imaliḵ kun ’koni ’kume’d mo, uni gun ’koki bu’th mom’bi’th gi miin tap̱a naskina/ mo, hili uni mini bu’th moshirr mo me’d imaliḵ ka tenten ’de/ mo, mmonyaḵki to/e mo. 13 Uni gwansan mina bwa ṯal ’de/ mo dhali c̱i mom’bi’th buni mo dhali moshirr buni ki to/e mo. 14 Uni mini mii mo/as ap̱o/ Ari Ḵa’bal mo, dhali Ari Ḵa’bal midi p̱i uni e mo haali/ a’di ta Tap̱a jin di’da p̱owa ris itap̱a mo dhali a’di ta’da Maliḵ jin di’da p̱owa ris imaliḵ mo dhali uni gwansan kun nyaḵ ’ko ki a’di mo tani uni yuḵkunu mo dhali kwanykunu mo dhali ta uni kun ta isiŋ gana/ mo.

15 Dhali a’di ki o aha/ gwo mo ki: Yi’de/ kun p̱arkina /e e mo e mo jin c̱a’b ma ’bom c̱al mo tani uni tana ris ’kwani mo dhali adhana buhany wathimpa mo dhali aris kal gi ’kwaniny’cesh mo dhali ’kwani kun wal ’twa/ ki she/ ki she/ mo. 16 Dhali ce gwansan kun ’koni ’kume’d kun p̱arkina /e e mo tani uni dhali to/e mo tani uni mini shi/a ’bom c̱ali e mo. Uni mini c̱iya ’bom ṯinya/ mo dhali mii a’di mmodi is ’te/ mo dhali los buŋgwar is ma yim ki ’kolo’c mo dhali c̱itha yim ki o’d mo, 17 haali/ Arumgimis ki kar a’di eya dum buni mo mmomii bwam piti jin dina a’di gwo ibwa mo gom bwan ṯal ’de/ jin tana uni mo dhali c̱i mom’bi’th buni jin miina uni miin tap̱a ki to/e mo ntagi gwo ma Arumgimis minu thim mo be. 18 Dhali a’bom c̱aan jin p̱arkina /e e mo tani a’di ta’da dhan ’peŋkuman bampa/ jin caaca mo, a’di ita gi mo yan jin miinu tap̱a mo ap̱o/ imaliḵ kun ’koni mony’cesh mo be.

<- GWO JIN ’CEENU MO 16 GWO JIN ’CEENU MO 18 ->