Languages
2
2:1-4 Qenu inqubeiamor eng wonou wes ar

1 End ne qob e igoun eng mom misirt et igama ne toat igorun. Qob eng igub qer uri me wogun. 2 Qoan Qenu qob qei enger wurinob qamara imusi ininou tonoanb wurinob qamamir eng qob eng gagam mom igo. End munon qob eng biisitet igour eng taui qamb qubua gab igour. 3 End see Qenu inqubeiamor eng mi sig aib, end in mai obouboun? Qenu wo sarau aib init ebeter eng in biisitet mag gari gab wogun eng qomon boru eng maigas insorasimba? Misue ar. Munon Aib wonou inqubeieminer end dibes qamara munon qei igumir end wuri dibes ete ininob qamamirei: “Qob eng apand ar.” 4 End Qenu qob eng nonogursi ne qomon qiribiten wes-wes ebet a sarau qeretutnob ebeterei. Ebet wonou Igomurur qau wonou misir banam ar wurit qereiamorei.

2:5-13 Yisas wonomi bumai wogub inqubeiamorei

5 See bo ai qen geret igoriner end bo qomoruboun. Enger ger wuri ai eng qoat igoarar qamb Qenu wuri me qereimau, ue. 6 Qenu qob tau ger qamara munon ger gumater eng ete:

O Qenu, munangit eng maigas gab ne wot igub igoan? Munonbor wau eng maigas gab musub qoat igoan? 7-8 Qen pitent qas wo aba enger wuri ii igoai. Igama nonou ba maribig dibesia unum aib dibeneriner qen end nonou bererima mi gugum wonou qubei ne gagt gab igoriba.
Io, Qenu mi gugum munangit wot wagerei, wo qoat igo. Mi ger ar waga ai qorut me igo. Ego see bo gaun eng mi gugum in qoat igoun eng bo me imbig igoun. 9 End in Yisas gun, wo qen piten ete enger wuri ii igoai. Eng ebeter eng wo Qenu wonou oau mein eng ba dibes ne umb munon gugum inmusierib qamb. Wo git goan uter wara umor end Qenu unum bereri ne mi gugum wotanami igoar qamb maribigorei.

10 Qenu wo mi gugum qanam wonou barsiarei. End munon gugum wonou wau wurisi oromar irab wonou ginamt end uber igoarar qamb. End Yisas duima git goan uter war end mi gugum wotanami ne in munon inqubeiamorei. Qenu wo qomon eng ebeter eng sig maieng ar. 11 In imbig igoun eng, munon eng munon yamangar wurinou qomon boru wurit birogonima munon yurau eng qau buremir end munon eng wuri qau igour. End wurinou ur eng munon eng wonou ur eng gari. End Yisas wo yonou imaori wurit qemerib qamb me qubig igo. 12 End wo Qenu nob ete qamarei:

Yonou imaori aib qamb qiumuni igamari wubunobun end nonou unum dibes qamb uru wab unum bererimbam ende ebeibam.
13 Ne bo qamar:
Ye wot mom oau apand burab tenori mom igoribam.
Ende qamb qamar:
Qenu wonou wagrari yet maribigor eng wuriqubei oromar igoum.
2:14-18 Yisas inqubeimb qamb munangit warorei

14 Qenu wagrari eng wuri munon git igamari Yisas wo gor wuri gas ende igo umiba. Wo uminer end munon ger munon umb igour baraitari igo eng gumutumaimba, munon eng Satan. 15 Munon yamangar gugum ag et igo umau end qenen yari igour. Yarimau eng wuri ourimau gas ende aba at igour eng Yisas wo umb wogub eng beasimatarau gas ende ebeiba.

16 Wo eng ebeter eng enger wurimusierib me abau, ue. Abraham wonou yurau eng qoregen wurimusierib ebeterei. 17 End ne mi gugum ebeiner eng wonou umuragrari mi obounor gas ende ebeiba. Wo ende ebet eng Qenut mian iset bigau baraitari igo wonou sarau betet igoriba. Wo munon sarau qoregen beau tari ne gor wo munon oau mein wurimusiau tari. Ne gor wo munon qomon boru eng ten wurimaragansia qomon boru eng wapaririner eng wo qeemben. 18 Wo mi warigesia git goan uter war eng wo nugutumugeterei. End munon mi wuriquguragsieriner eng wo qoan qoyameter end wurinonogursieriba.

<- Hibru 1Hibru 3 ->