Opata biskapa god dlopi dota mita꞉pele dla sisiyemha꞉ha꞉le

1 Epame ma Mosesta tamali di dla hetame ma ilame hapele pomallalo wekelati Isalael sotapo A꞉lon hala dla puame alupame ya꞉ watle epo atlaiyo, “Di Isip mo tle hema elempuwa Mosesye hapele popuasema. Di podimalamana ya꞉ye hadima tauwo? Epedeme wa꞉ di elemtlowe godye dota mita꞉pene,” demyaiyo. [~1~]

2 Epalati A꞉lontapo yia꞉ watle epo atlaiyo, “Wua꞉ wola꞉ mate epo wua꞉ akimlala mate epame wua꞉ utukaka mateta gold sutulu molo dla didiyepo siyamaye na꞉ watle uptipo halopiya,” diyo. 3 Epapalati yia꞉ta hapulomatapo yia꞉ gold sutulu uptipame A꞉lon watle halopimyaiyo. 4 Epalati ya꞉tapo eye halopame dlapa dla holopo potollati bulumkiyawa aliya mila꞉pi sepeleye mita꞉piyo. Epame opatapo i natipame epo atlamyaiyo, “Isalael so, iye di godpo. God itapo dia꞉ye Isip mo tle eleme alikili a꞉ma woyamuwapo,” demyaiyo. [~2~]

5 Epalati A꞉lonta yu i dalepame God dla alinepi poyupo ha꞉lalo tileye bulumkiyawa aliya ya꞉ta mita꞉pele mateka꞉pi dla hapame epo atlaiyo, “Iyela God hi di dla ta꞉demama daya pato dlowepo,” diyo.

6 Epapeleye utulala ikadepe dla opatapo aliya haloye poyupo dlopi dota mita꞉pele god dla hapimama halomha꞉ha꞉iyo. Epame yia꞉tapo daya pato demama kawata yúye sikemte dlopame siyalemyemama wola꞉ mate epo opa mate uhalomyaiyo. [~3~]

7 Epapele oloma dla Mosestapo tamali di dla ala me-hallati Godtapo opata koko halomha꞉ha꞉ natipame ya꞉ watle epo atlaiyo, “Wa꞉ ma ilame tulune. Adipalati, opa wa꞉ta eleme Isip mo tle alikili a꞉ma woyamuwaye batalimale koko pato halomha꞉ha꞉po. 8 Epedeme na꞉tapo yia꞉ watle molo atluwa yuye ma-hamastana. Epame yia꞉tapo biskapa god dlopi dota mita꞉pele bulumkiyawa mila꞉pi sepeleye mita꞉pame edla sisiyemha꞉ha꞉po. Epame yia꞉tapo alinepi poyupo ya꞉ watle hapimha꞉ha꞉mama epo atlamha꞉ha꞉po, ‘Isalael so, iye di godpo. Ya꞉tapo dia꞉ye Isip mo tle eleme alikili a꞉ma woyamuwapo,’ demyapo. 9 Epedeme na꞉ iwolota dupa kokalalimale kokoye ma-natima. 10 Epedeme na꞉ yia꞉ dla sikemte siyalademama yia꞉ye hapuloma poyupa꞉mollowama. Epapele dulu dla wa꞉ na꞉ apiye pohimomollowa. Amasiyama Moses, hatlo wa꞉ tle na꞉tapo na꞉ opaye ma pasatlowepo,” diyo.

11 Amasiyama Godta malamale meyelope dlepo depame Mosestapo ya꞉ dla otele pato himimama epo atlaiyo, “God, wa꞉ta itiyamaletapo opa iwoloye Isip mo tle eleme alikili a꞉ma woyamuwapo. Epapedeme wa꞉ta siyaladleta yia꞉ye potimiya. [~4~] 12 Wa꞉ta yia꞉ye potimelepiye, asiyama Isip sotapo epo malamelepe, ‘Godta ya꞉ opaye isikimi potimolowedeme Isip mo itle eleme alikili a꞉ma woyamana,’ dlepe. Epapedeme wa꞉ta siyalademama yia꞉ye potimele dleye memelene. 13 Adipalati, wa꞉tapo di mamadulo A꞉iblaham mate epo Aisek mate epo Yokob mate dla yu itiyapo himiwa kokoye e malamane. Ame adipalati, wa꞉tapo yia꞉ watle epo atluwapo, yia꞉ mamadulotapo sikemte pasatamama tamili some hallepe. Epame wa꞉ta yia꞉ watle hamili duwa moye yia꞉ta halepe duwapo. Epame ta꞉la itapo yia꞉ hi mate kokó mepo ellepe duwapo,” diyo. [~5~] 14 Epalati Godtapo Moses yu dalepo ya꞉ta malamaleye meyelope depame yia꞉ye popotimalalo wekiyo.

15-16 Epame Mosestapo tamali di tle Godta ewala dapiyamte dla aiyalma 10ye seme mate seme mate hatitipo halopiliye halopo tuluiyo. 17 Moses ala tulumhallati ya꞉ gadlalo oplami Yosuwata api duka dla ala me-ompolomama dallati opata siyalle yu daliyo. Epame Moses watle epo atlaiyo, “Na꞉ opahaleta di opaye hustepo kotlomale yuye dalesema,” diyo.

18 Amasiyama Mosesta ya꞉ watle asiyama epo atlaiyo, “Hao, opahale sota kotlomale yu epapele podalesema. Amasiyama siyalemama sala sale yu tlo dalema,” diyo.

19 Epedeme Mosesta kimna꞉ya dla tulume natilati biskapa god dota mita꞉pele bulumkiyawa aliya mila꞉pi sepele mate epo opata siyalle koko mate natipame sikemte siyaladiyo. Epammama ya꞉tapo ewala dapiyamteye medla pololemama susupolatalemaiyo. 20 Epo halemama biskapa god dlopi dota mita꞉peleye dlapa dla mistaiyo. Epame sikemte potolumama sokane some hallati yú dla kustaiyo. Epame yú eye Isalael so watle dlomaiya diyo. 21 Epo A꞉lon dla helestame halemama epo atlaiyo, “Opa iwolotapo wa꞉ dla apa koko halati asiyama wa꞉tapo yia꞉ye batalimale koko pato hema elemtuluwa?” diyo.

22 Epalati A꞉lonta asiyama Moses watle epo atlaiyo, “Wa꞉ ase na꞉ mate sikemte siyalademiya. Adipalati, opa iwolo kokoye mo-wa꞉malamana. Yia꞉ye alila hapuloma batalimale koko halomolowe dla ma-dinapopo siyamdepo. 23 Epapedeme yia꞉tapo puame na꞉ watle epo atlemama dia꞉ye Isip mo tle alikili dla eleme woyamuwa Mosesye hadima tauwa? Epedeme wa꞉ di elemtlowe godye dota mita꞉pene, duwapo. 24 Epalati na꞉tapo yia꞉ yu dalepame yia꞉ watle atlemama wua꞉ gold sutulu uptipame na꞉ watle halopo puaiya duwapo. Epame yia꞉tapo alisisi eye mo-halopo pulati na꞉tapo e halopame dlapa alemalle dla potolupo depame bulumkiyawa aliya mila꞉pi sepele iye mita꞉puwapo,” diyo.

25-26 Epapele dulu dla Mosestapo A꞉lonta opa batalipo eleme tale koko tle opahale sota yia꞉ natipo eimela꞉lala depo malapame kimna꞉yata popa꞉mtame gudle dla halemama yu teta꞉le mate yia꞉ watle epo atlaiyo, “Opa anawolotapo God tiyama dla ha꞉ha꞉lepiye, na꞉ta hala dla pumulaiya,” diyo. Epalati Libai elele halomale sotapo ya꞉ hala dla pumulaiyo. 27 Epalati ya꞉tapo yia꞉ watle epo atlaiyo, “Isalael so di Lod Godtapo epo atlema, ‘Wua꞉ aipa꞉ya halopame kimna꞉ya dulu dla siyamama mo-wua꞉ amkadulo mate epame mo-wua꞉ asiyadulo mate potimtamalaiya,’ ” diyo. 28 Epalati yia꞉tapo Moses yu dalepame kimna꞉ya dulu dla siyamama 3000 opaye potimaiyo.

29 Epame Mosestapo Libai elele halomale so watle epo atlaiyo, “Wua꞉tapo God yu dalepo salladepame mo-wua꞉ amkadulo mate epo mo-wua꞉ asiyadulo mate potimolowe dla wowota꞉mama po-alina. Epapele koko tle wua꞉tapo Isalael so dulu dla God ka꞉ epo opa ka꞉ duka dla ha꞉ha꞉lalo so depo ha꞉ha꞉lepe,” diyo.

30 Epame ma alallati Mosesta opa watle epo atlaiyo, “Wua꞉tapo batalimale pato ma-halomalepo. Epapedeme na꞉ ma ilame tamali di dla wua꞉ bobtalimale yilo God mate yukamama otele himila hetlowepo. Adipalati, pona꞉malamana, ya꞉tapo wua꞉ bobtalimaleye hiyollowe sepena,” diyo.

31 Epammama Mosestapo ma ilame hetame God watle epo atlaiyo, “Opata batalimale koko pato hamama yia꞉skamu biskapa god dlopi dota mita꞉pame edla sisiyemha꞉ha꞉uwapo. 32 Epapedeme na꞉ wa꞉ dla otele pato himima, wa꞉tapo yia꞉ bobtalimaleye hiyolepo wellipo depame. Amasiyama wa꞉tapo yia꞉ bobtalimale hiyollowe allipiye, asiyama na꞉ hi wa꞉ buka dulu dla elaye e tlo hiyostane,” diyo. [~6~]

33 Epalati Godta asiyama Moses watle epo atlaiyo, “Opa anawolotapo na꞉ dla batalimale koko mo-halomuwa, opa ewolo hi tlope na꞉tapo na꞉ buka tle hiyotimolowepo. 34 Epapedeme na꞉ta wua꞉ watle hamilowepo depo yu itiyapo himiwa mo dla wa꞉ opa eleme ma-tane. Epalati na꞉ banakaka oplamitapo wua꞉ta tlati itapu tle telepe. Epapele dulu dla na꞉tapo yia꞉ watle yia꞉ bobtalimale asiyama hamilowe alilata woyamalati yia꞉ watle yia꞉ bobtalimale asiyamaye hamilowepo,” diyo.

35 Epammama opatapo A꞉lonta biskapa god mita꞉pele dla mikadepe depo edla sisiyemha꞉ha꞉le koko tle Godtapo yia꞉ batalimale asiyama dla esiyele pato hamiyo.

<- Ekesedes 31Ekesedes 33 ->