Bobotimatimale 15

Banakaka so 7ta mosukulu wotiyalle koko halopo puluwe dla dinapele

1 Na꞉ ulugiyemale koko pato haleye omapla di dla natiwa. Epedeme banakaka so 7ta mosukulu wotiyalle koko 7 halopo pula natiwa. Yia꞉ta halopo pua wotiyalle koko 7 ita puame gudlepiye, Godta kasilamale kokota medla gudlepe. 2 Epame na꞉ ma galasi kaula sepeleta dlapa mate dukumale hallati natiwa. Epo na꞉ matle ulugiyemale alinepi tle ulu pohalalo wekepame ma ya꞉ mate epo ya꞉ mila꞉pi sepele dlopi dota mita꞉ple dla posisiyelalo wekele sotapo galasi kaula dla ha꞉ha꞉la natiwa. 3 Yia꞉tapo Godta yia꞉ watle hapili woiyo yulumha꞉ha꞉mama God yu dla salladepo sela꞉lalo oplami Moses sala mate epo La꞉m sala mate ipo dodolalimha꞉ha꞉uwa,

“Lod God wa꞉ye sikemte itiyamana.

Wa꞉ta koko halomale hapulomaye sikemte patoto epame pta ka꞉ka꞉pi.

Wa꞉tapo ta꞉lamo hapuloma dulu dla dokopala halapo.

Wa꞉ koko hapulomaye ka꞉dena epame ikadepe.

4 Lod, wa꞉ dla powota꞉lalo wekelalo oplami hale halema꞉?

Epame wa꞉ dla heodepame sisiyelowe dla alilalo oplami hale halema꞉?

Adipalati, hatlo wa꞉ tlope aiyalma ikadepepo.

Ta꞉lamo so hapulomatapo puame wa꞉ dla heodepame sisiyelepe.

Adipalati, opa hapulomatapo wa꞉ta ka꞉ka꞉dle koko halomale hapulomaye ma-dalemtauwapo.”

5 Koko ita tame gudlati na꞉ toko ipo natitepo Pepele dimo dla aiyalma aya kokolomata gowaladepo halla natiwa. 6 Epalati mosukulu wotiyalle koko halopo pumulalo banakaka so 7ta aya dulu etle wowoyamala natiwa. Yia꞉tapo tluka kamkamale didiyepame ma yia꞉ pitako dla gold nosowe didiyele haluwa. 7 Epame pasakalo ha꞉ha꞉lalo alisisi dapiyamte dapiyamte dle dulu dla haleta banakaka so 7 dla kokó halepo hallalo Godta kasilamale pasatale isilako 7ye hapiwa. 8 Epalati banakaka so 7tapo wotiyalle koko 7 halopo puale alilata gudlepo depo omhalale alila oloma edla namileta Godta hela꞉dle tle epame itiyamale tle puame aiyalma ayaye hapo haluwa, oplami haleta tulala depame.

<- Bobotimatimale 14 Bobotimatimale 16 ->