(2 Kings 18:13–27; 2 Kronicles 32:1–19)

1 U lan e bin ragag nge aningeg e duw ni i pilung Hezekiah u Judah, me mael Sennakerib ni emperor nu Assyria ko fapi binaw ni kan yororiy ni fan ko mael u Judah nge kol. 2 Ma aram me l’oeg e an tolang ko salthaw rok ni nge yan u Lakish nga Jerusalem nib mu’un barba’ i salthaw ngak nib ga’ ni ngrogned ngak Hezekiah ni Pilung ni nge wenig nge par nga tan pa’rad. Fare tolang ko salthaw e par u kanawo’ ko gin bay e pi’in ma wupmad riy, u charen ba meb nma yan e ran riy ni be yib u ba lipath ni bay nga talang. 3 Me yib dalip e girdi’ nu Judah ni ngar mada’ niged: ni aram Eliakim nib mo’on ni fak Hilkiah ni ir e ga’ u tafen e pilung; nge Shebna ni ir e tamayol u tafen e puf oloboch; nge Joah nib mo’on ni fak Asaf, ni ir e ma kol e babyor ko am. 4 Fare tolang ko salthaw nu Assyria e yog ngorad ni ba’adag e emperor ni nge nang ko mang e ri be gif Hezekiah ni Pilung ngay. 5 Ni ga’ar, “Gimed be leamnag ni thin e rayag ni nge yan nga lon e salap ko salthaw nge gelnginrad? Mini’ e gimid be ta’ ngak nra aywegmed ngam togopluwgad nga Assyria? 6 Gimed be ta’ ngak yu Egypt, machane ri bod rogon boch lay i uchel nim sog ngay — ra m’ing me rog nga pa’am. Aram rogon e pilung nu Egypt nra toer be’ ngak.”

7 Miki ul ul fare ga’ ko salthaw ngay ni ga’ar, “Fa ngamoged ngog ni SOMOL ni Got romed e gimed be tay ngak? Ya Hezekiah e ir e buthug fa yungi tagil’ e meybil nge pi altar rok SOMOL u nap’an ni yog ko girdi’ nu Judah ngu Jerusalem ni ngu’ur meybilgad u lan ta’ab altar. 8 Nggu ngongliy ba m’ag u daken fithingan e emperor nu Assyria. Bay gu pi’ ngomed l’agruw e biyu’ e os ni fa’an gimed ra pir’eg aram oren e pumo’on ni nge yan u daken. 9 Mus ko bin th’abi sobut’ e salthaw nu Assyria ma dabyag ni ngam puluweg, ma chiney ma gimed be tay ngak yu Egypt ni ngar pi’ed e chariot nge pumo’on nma yan u daken e os ngomed. 10 Gimed be leamnag ma gu cham ko binaw romed nggu kirebnag ndariy e ayuw rok SOMOL riy? Ya SOMOL e ir e yog ngog ni nggu cham ngay nggu kirebnag.”

11 Ma aram me ga’ar Eliakim, Shebna, nge Joah ngak, “Mu non ngomad ni Aramaic. Ya gamad ra nang fan. Dab kum non ni Hebrew; ya urngin e girdi’ u daken e rungrung ma be motoyil.”

12 Me fulweg ni ga’ar, “Gimed be leamnag ni go’ gimed nge an pilung e ke l’oegeg e emperor ni ngog e pi thin ney ngomed? Aram e danga’, ya kug be non ngak e pi girdi’ nir ni yad bay u daken e rungrung, ni bay ra ked ta’rad ma yad be garbad ko fi’ rorad, ni bod rogon ni bay kum rin’ed.”

13 Ma aram me sak’iy fare tolang ko salthaw ngalang nge non ni Hebrew ni be tolul ni be ga’ar, “Mmotoyilgad ko n’en ni be yog e emperor nu Assyria ni nganog ngomed. 14 Be ginangmed ndab kum paged Hezekiah nge ban nagmed, ya dabiyag rok ni nge ayuwegmed. 15 Ma dab mu paged ni nge twasar ngomed ni ngam paged famed ngak SOMOL. Dab mu leam niged nra ayuwegmed SOMOL nge talag e salthaw romad yu Assyria nge dab ni kol e binaw romed. 16 Dab mu telmed ngak Hezekiah! Emperor nu Assyria e be yog ngomed ni ngam chuwgad ko re binaw nir ngam pired u tan pa’. Ra pagmed ni ngu’um unmed e grape ko woldug ni grape romed nge wom’ngin e fig ko gek’iy romed, nge ran ko pi luwed romed — 17 nge mada’ ko ngiyal’ ni nge fekmed e emperor nu Assyria nga reb e nam ni bod e biromed e nam, ni bay e woldug ni grape riy ni yima ngongliy nge yib e wayin riy, nge grain ni yima ngongliy e flowa riy. 18 Dab mpaged Hezekiah nge ban nagmed ngam leam niged ni SOMOL e bayi ayuweg e pogofan romed. Gur, bay reb e pi got u reb e nam ni ka’a yigi ayuweg e pi binaw rorad u pa’ e emperor nu Assyria? 19 Bu uw e pi got rok Hamath nge Arpad e chiney? Ma ku bu uw e pi got rok Sefarvaim? Bay bagyad ni ka’a ayuweg yu Samaria? 20 Urngin e pi nam ney ma wi’in e kaygi ayweg reb fapi got e binaw rok u pa’ e emperor nu Assyria? Ere bu uw rogon ni gimed be leamnag ni nge ayuweg SOMOL yu Jerusalem?”

21 Ma aram me par fapicha’ ni kar th’abed gulungrad ni bod rogon nike yog Hezekiah ni Pilung ngorad; dariy ta’ab bugithin nrogned. 22 Me guchithiy Eliakim, Shebna, nge Joah e mad rorad ni kari taganan’rad miyad yan ngar thapaged ngak e en pilung fapi thin nike yog fa’en ga’ ko salthaw nu Assyria.

<- ISAIAH 35ISAIAH 37 ->