MALAKO 3

(Matayi 12.9-14 ; Luka 6.6-11)

1 Yesu wubuela kota diaka mu nzo lukutukunu, kuna kuba mutu wumosi wuba koko kusioka. 2 Yesu baba tala keni lenda kumbelusa mu lumbu ki saba muingi babaka bu kumfundila.

3 Yesu wukamba mutu wowo wuba koko kusioka :

—Telama vana, va ntuala batu boso.

4 Bosi wuba yuvula :

—Minsua midi mu vanga mamboti voti mambimbi mu lumbu ki saba e ? Minsuamidi mu vukisa luzingu lu mutu voti mu vonda e ?

5 Vayi kadi mutu kasia vutula kadi diambu ko. Yesu wuba tala mu nganzi ayi weka mona kiadi mu diambu di mintima miawu miba banga matadi. Bosi wukamba kuidi mutu wuba koko kusioka :

—Nonuna koko kuaku ! Wunonuna kuawu ayi koko kuandi kufuana. 6 Vana vawu, Bafalisi batumbu totuka mu nzo lukutukunu, bayenda kaza ayibatu ba dingumba di Elode muingi batomba diluaku di vondila Yesu.

Yesu va khatitsika nkangu wu batu

7 Yesu ayi minlonguki miandi babotuka vana, bayenda ku ndambu mbu. Vayi nkangu wuwombo wu batu wuba landakana : baba ku Ngalili, 8 ku Yuda, ku Yelusalemi, ku tsi Idume, ku disimu dinkaka di Yolidani. Batu bobo bazungidila bizunga bi Tile ayi Sidoni bayiza bawombo kuidi niandi bu bawa mambu momo kavanga. 9 Wukamba minlonguki miandi minkubikila nlungu muingi nkangu wu batu wubika kumfietikisa. 10 Muaki sumbu kabelusa batu bawombo, diawu bobo baba minsongo balundumuka kuiza kuidi niandi muingi bansimba.

11 Bosi thangu batu baba ziphevi zimbimbi bammona, babua va ntualꞌandiayi bayamikina :

—Ngeyo widi Muana Nzambi !

12 Vayi wuba kandika babika zabikisa ti niandi nani.

Yesu wusobula bamvuala

(Matayi 10.1-4 ; Luka 6.12-16)

13 Yesu wukuma va mbata mongo ; wutela batu bobo kazola ayi batu beni bayiza kuidi niandi. 14 Kumi batu buadi kasobula bobo kabieka bamvuala[a] muingi babanga yandi va kimosi ; 15 ayi muingi kaba fidisa mu kuenda longi ayi mu diambu baba lulendo lu totudila ziphevi zimbimbi. 16 Tala mazina makumi batu buadi bobo kasobula : 17 —Simoni mutu kabieka Piela ; Zaki, muana Zebede ayi khombꞌandi Yowani. Wuba vana dizina di Bowanelingesi bu dinsundula “bana ba nzazi” 18 Andele, Filipi, Balitelemi, Matayi, Toma, Zaki muana Alafayi, Tade, Simoni wuba mu dingumba di Bazeloti 19 ayi Yuda Isikalioti, mutu wuvakusa Yesu.

Nzambi voti Satana

(Matayi 12.22-32 ; Luka 11.15-23 ; 12.10)

20 Bu kakota mu nzo, nkangu wu batu wuyiza kutakana diaka muna. Yesu ayi minlonguki miandi basia buela baka ko bu dila. 21 Bibutu biandi bu biwa nsamu beni, biyiza kunlanda mu kingolo bila baba tuba : “Weka dilawu”. 22 Minlongi mi mina miba ku Yelusalemi mituba :

—Ku tsi minsua mi Belezebuli kadi. Mu lulendo lu pfumu yi ziphevi zimbimbi kalembo kukila ziphevi zimbimbi. 23 Buna Yesu wuba tumisa ayi wuba sudikisila mu zinongo :

—Buevi Satana kalenda kukila Satana e ? 24 Enati kipfumu kivasukidi kiawu veka, buna kipfumu beni kilendi zingila ko. 25 Enati nzo yivasukidi yawu veka, buna nzo beni yilendi zingila ko. 26 Enati Satana weka kinuanisa niandi veka, ayi enati widi wuvasuka, buna, kalendi zingila ko. Tsukulu andi yimonikini. 27 Kuisi ko mutu beki bukotila mu nzo yi mutu widi ngolo ayi yiba bima biandi enati kasi tuama kanga ko mutu beni. Buna bosi kalenda baka bu yibila bima bioso bidi mu nzo andi.

28 Bukiedika ndikulukamba ti masumu moso ayi bifingu biosobilenda fingu Nzambi biela lemvukulu 29 vayi woso kuandi wela finga Pheve yinlongo, kalendi lemvukulu ko ; wela natanga nkanu wu masumu momo mu zithangu zioso.

30 Yesu wubayolukila buawu mu diambu di batu baba tubanga ti : “ku tsi minsua mu pheve yimbimbi kadi”.

Dikanda dikiedika di Yesu

(Matayi 12.46-50 ; Luka 8.19-21)

31 Ngudi yi Yesu ayi bakhomba bandi bayiza. Batelama ku nganda ayi batuma mutu mu kuntela.

32 Batu bawombo bavuanda ayi banzungidila Yesu. Buna bayiza ku nkamba :

—Tala ngudi aku ayi bakhomba ziaku badi ku nganda ayi ngeyo bantomba.

33 Yesu wuba vutudila :

—A nani ngudi ama ayi banani bakhomba ziama e ?

34 Bu tala batu bobo bantula va lukongolo, buna wuba kamba :

—Tala ngudi ama ayi bakhomba ziama bawu baba. 35 Woso mutu wumvanga luzolo lu Nzambi, niandi khombꞌama yi bakala ayi khombꞌama yi nketo ayi ngudi ama.

<- MALAKO 2 MALAKO 4 ->