Languages
19
1 Udi'di si irá nga, bina dia'ga cacá ridxi ibá', casi ora cucaa stale binni ridxi, na ca':
¡Aleluya! Usisaca nu Dios stinu purti nandxó' ne bilá laanu.
2 Jneza ribidxi be cuenta binni
purti ma bisaba ná be dxa gunaa dxaba ni bicaa enda nadxaba sti binni guidxilayú.
Biquixe be laa saca biiti ca xpinni be.

3 Bigueta na ca':

―Usisaca nu Dios. Qué ziuu dxi gyuí' guidxi que.

4 Oraque bizuxibi idubi veinticuatro binni gola ne ca bultu nabani que, bisisaca ca Dios ra zuba lu trono, na ca':

―¡Amén! ¡Usisaca nu Dios!

5 Ne ucuá ti ridxi de lu trono que, na:

Lausisaca Dios stinu, irá tu,
cani runi xhiiña be, ne irá ni ridxibi laabe,
cani risaca ne cani qué risaca.
Ra ichaganá Dendxu huini'

6 Laca bina dia'ga ti ridxi casi ora rucaa ridxi stale binni, ne casi ora rixidxi ra zidi'di stale nisa ne casi rixidxi rayu ro', na:

Usisaca nu Señor Dios stinu ni jma nandxó',
purti ma bizulú cayuni mandar.
7 Guieche nu dede idxá ladxidó' no de enda nayeche', ne usisaca nu laabe,
purti ma bidxiña dxi ichaganá Dendxu huiini que,
ma zuchaahui ni chi chaganá'.
8 Nacu lari cha'hui', nayá ne ruzaani'.
Laa zanda gacu ni purti zeda gaca lari que casi enda nacha'hui ni bi'ni ca xpinni Dios.

9 Oraque na ángel que rabi naa:

―Bicaa ni chi tidxe lii ri': Dichoso cani ma nexhe che enda xheela sti Dendxu huiini'.
Ne laca rabi be naa:
―Dios uní' ca diidxa ca, ne dxandí cani.

10 Bizuxi'be xa ñee ángel que, nusisaca laa, peru óraque na:

―Cadi gu'nu nga. Naa laca rune xhiiña Dios casi ru'nu', lii ne ca xcaadxi hermanu stiu' ni qué riree chu lu stiidxa Jesús. Bisisaca Dios.
Stiidxa Jesús rui' cani rabi Dios laa xi iní'.
Ni dxi'ba caballu quichi'

11 Oraque biiya zuxele ibá' ne biree ti caballu quichi'. Nuu tobi runi jneza pe' ne riní' irá ni dxandí', ne laa dxi'ba laame. Jneza rucaa lú be ne jneza ribidxi be cuenta. 12 Ruzaani guielú be casi bele, ne nuu jma la'pa ique be. Né be ti lá iruti ru ganna sínuque laasi be. 13 Nadxé' daata xhaba be de rini, ne lá be Stiidxa Dios. 14 Nanda ejércitu ni nuu ibá' laabe, dxi'ba ca mani quichi ne nacu ca lari cha'hui', naquichi bé ne nayá guie'. 15 Nasa ruaa be ti espada naduxhu iropa ladu ni quixhe dxí né be ca guidxi ni ucaa lú laabe, ne zuni mandar be laaca', ne zaca be naduxhu ne laaca'. Zuniná be laaca casi rutu ñee cabe uvas ra usaba be xiana sti Dios ni nandxó' luguiá ca'. 16 Cá caadxi diidxa lu xhaba be ne lu co're be, na: “Xaíque sti irá rey ne irá ni runi mandar.”

17 Oraque biiya ti ángel zuhuaa lu gubidxa bicaa ridxi irá mani huiini ripapa, na:

―Latá', laidxiña ra endaró xhi ro' chi udii Dios. 18 Latá' go to xpeela ca rey ne ca comandante ne irá ni rinaaze guiiba', xpeela caballu ne ni dxi'ba laaca', xpeela irá binni, cani cá yaga ne cani cadi cá yaga, cani risaca ne cani qué risaca.

19 Ne biiya dxa mani ngola que ne ca rey sti guidxilayú ne ejércitu stica'. Bidxiña ca para ucaa lú ca dxa ni dxi'ba caballu quichi que ne ejércitu sti'. 20 Bigaa dxa mani ngola que, laa ne ni byuí' stiidxa' ne ni bi'ni milagru nezalú que. Pur irá milagru que bicuudxi binni para ucuaa seña sti mani que ne bisisaca bidó' stime. Iropa ca ulá ca lu bele ra caya'qui azufre, idubi nabani ca'. 21 Ne ca xcaadxi que la? guti né ca espada ni nasa ruaa dxa ni dxi'ba caballu que, ne gudó ca mani huiini que xpeela ca dede ra bidxá ca'.

<- APOCALIPSIS 18APOCALIPSIS 20 ->