Languages
8
Jesús nak ngwleyy kuu kwathoz nataak lo trat kub

1 Ne koree nak kuu mas nataak lo re kuu ngetedizaa: Napaa thib ngwleyy kuu kwathoz nataak, zha kuu ndob lab ban lo Diox, ta ndob Diox nabee Diox yibaa. 2 Ne lee zha nak ngwleyy kuu nke tsiin leen gwodoo kuu wlipaa nak gwodoo chaan Diox Ta Kwathoz Nayon, kuu mdexkwaa Diox ne nagte kuu mdexkwaa men. 3 Tak loka cho ngwleyy kuu kwathoz nataak, lee rtsin zha nak, taa zha gon ne kuth zha maa taa zha lo Diox, kona lee ngwleyy kuu kwathoz nataak loʼaa, no zha ndoblo taa zha thib kwaa lo Diox. 4 Ne os lo yezlyu ree ndo zha, neeka gagagt zha ngwleyy, tak nziʼa re ngwleyy kuu ndaa gon lo Diox taxal nabee ley chaan Moisés. 5 Per lee re zha ree ntsow tsiin leen gwodoo yezlyu ree, kuu nak beeta xinn chaan gwodoo kuu wlipaa nak kuu yibaa, tak Diox mnabee lo Moisés texkwaa Moisés gwodoo taxal nzhab Diox lo Moisés: “Wii ne btexkwaay taxal kuu mloon loʼa yek yii Sinaí”. [Ex. 25:40] 6 Per lee ngwleyy kuu kwathoz nataak loʼaa, mkayaa thib tsiin kuu mas wen, tak por lee zha mtaan Diox tedib trat kuu mas wen loʼaa, nake kuu ner, tak lee Diox ne taa Diox kuu mas wen loʼaa.

7 Tak os lee trat kuu myaan Diox kon Moisés ndala, gatsowe gagak men zha nali lo Diox, gataat Diox tedib diiz kuu nak trat kub. 8 Per ne Diox nalit nda re mena, kona tenzhee nzhab Diox kwent chaan re zhaʼa lo xkeets Diox:

Too thib wiz, tsowʼn thib trat kub kon re goo, zha Israel ne zha Judá.
9 Lee trata nagte taxal kuu mtsowʼn kon re tey goo zha ndala,
leettsa mzhen na yaa zha ne mloon zha yezlyu Egipto;
ne tak mbint re zha diiz gatsow taxal nak trat da,
ta mod mlan zha, ne Zha Nabee.
10 Lee trat kuu tsowʼn kon re zha Israel bluz, tenzhee gake ne Zha Nabee:
Keen ley da leen xgab zha,
ne kee nay leen leettsoo zha.
Ne lee na gak Diox zha,
ne lee re zha gak zha yez da.
11 Ne yent raa cho loo lo tedib zha;
neeka lo re altaa zha neeka lo wets zha gabt raa zha:
“Ndoblo lebeeʼa Zha Nabee”,
tak reta zha lebeen,
asta zha kuu mas nataagt ne asta zha kuu mas nataak lo re zha.
12 Ne lat leettsoon nen zha lo re kuu went kuu mtsow zha,
ne thitanax nithlazʼn re falt kuu mtsow zha. [Jer. 31:31-34]

13 Ne leettsa nzhab Diox: “Taa Diox tedib trat kub”, leey nak, tak mtsow goxa Diox trat kuu ner. Ne lee kuu gox mera lux.

<- Hebreos 7Hebreos 9 ->