―Xran, bénnea' nazrí'inu' quebe chawe' zue̱'.

4 Ca ben Jesús da nigá, na' gunné̱':

―Da dxé'ene̱' quebe naca na da gútete̱ na le̱'. Naca na chee̱ gulé'e lau na xel-la' szren chee̱ Dios, ne cá'anqueze chee̱ gulé'e lau na xel-la' szren chia' neda', Zri'ine Dios, ne̱ chee̱ xel-la' we̱' na'.

5 Lácala nazrí'i Jesús Marta, ne bi bile̱', ne Lázaro, 6 gate benne̱' quebe chawe' zua Lázaro na', begá'ane̱' naga zue̱' xechupa zra. 7 Ca gudé na' guzre̱' benne' ca' dxusé̱dene̱':

―Le chu'u naga nababa Judea xetú.

8 Nadxa benne' ca' gulé̱'e̱ Le̱':

―Benne' Wese̱de, ná'asca benne' judío ca' zaj zre̱'e̱ na' gulaca lazre̱' xelútie̱' Lue' nen xiaj. ¿Dxaca lazru' chéaju' na' xetú?

9 Jesús guzre̱' benne' ca':

―¿Quebe nun Dios dute̱ te zra gate dxelún bénneache zrin? Che nu benne' dxedé̱' te zra, quebe cheajchazie̱' lu da ste̱be lawe' da dxelé'ene̱' xel-la' naxaní' da nuzúa Dios lu xe̱zr la xu nigá. 10 Che nu benne' dxedé̱' chizrela, dxechégüe̱' lawe' da quebe zúale̱ xel-la' naxaní' le̱'.

11 Ca gudé na' guzre Jesús benne' ca':

―Benne' ljwézredxu Lázaro ba dxásie̱'. Cha'a neda' cheajsebana' le̱'.

12 Nadxa benne' ca' gulé̱'e̱ Jesús:

―Xran, che dxásie̱', wexaque̱'.

13 Da nigá da gunná Jesús zéaje̱ na ba gute Lázaro. Benne' ca' dxusé̱dene̱' guléquene̱' gunná Jesús dxáseze̱'. 14 Nadxa Jesús bzéajni'ine̱' benne' ca', gunné̱':

―Ba gútequeze Lázaro. 15 Dxebeda' lawe' da quebe zua' na'. Caní gácadxa chawe' chee̱le le'e, chee̱ chéajle̱le chia'. Le chu'u cheajnnadxu Lázaro.

16 Nadxa Tomás, bénnea' lé̱queze̱' bilide', guzre̱' xezícala benne' ca':

―Le chú'uqueze dxi'u chee̱ gátedxu tu zren nen Jesús.

―Xran, chela zu' nigá, quebe gute bi zana'. 22 Neda' nezda' Dios gunne̱' Lue' bítete̱ze da nabu'.

23 Jesús gunné̱':

―Webán bi zanu'.

24 Nadxa Marta guzre̱' Le̱':

―Nezda' webane̱' lu zra xelexebán benne' gate ca', zra bze̱be na'.

25 Nadxa gunná Jesús:

―Neda' naca' benne' dxusebáne̱' benne' gate ca', ne benne' dxunne̱' xel-la' nabán li lazre'. Nu benne' dxéajle̱'e̱ chia', lácala gatie̱', webane̱', 26 na' xúgute̱ benne' zaj naca bane̱', ne dxeléajle̱'e̱ chia', québequeze xelatie̱' tu chi'ize. ¿Dxéajle̱'u da nigá?

27 Marta guzre̱' Jesús:

―Awe', Xran. Neda' dxéajle̱'a nacu' Cristo, Zri'ine Dios, Bénnea' guche̱be lazre' Dios sel-le̱'.

―Ba bla' Benne' dxuse̱de, ne dxenné̱' lue'.

29 Ca ben María da nigá, na' guxase̱' guzé̱'e̱, xeajnné̱'e̱ Jesús. 30 Jesús quebe ne chu'e̱ xe̱zre na', na' zue̱' naga bezraga Marta Le̱'. 31 Benne' judío ca' zaj zra' xu'u na' dxulunézruje̱' María xel-la' zren lazre', gate belelé'ene̱' guxasa María, ne chadí bdxúaje̱', na' xjácale̱ benne' caní le̱', dxeléquene̱' zéaje̱' dxu'a ba zeajchezre̱' na'.

32 Gate bzrin María naga zua Jesús, na' bzu zribe̱' zran ni'a Jesús, gunné̱':

―Xran, chela zu' nigá, quebe gute bi zana'.

33 Gate ble'e Jesús dxebezre María, ne cá'anqueze dxelebezre judío ca', benne' zjácale̱ne̱' María, na' bexíajele̱'e̱ne̱', ne guzúe̱' ste̱be lu lázrdawe̱'. 34 Na' bche̱be̱' benne' ca':

―¿Ga bcáchele bénnea'?

Na' gulé̱'e̱ Le̱':

―Xran, gudá le'enu'.

35 Na' gudxezre Jesús. 36 Nadxa gulenná benne' judío ca':

―Le nna'xque cátite̱ nazrí'ine̱' le̱'.

37 Bal-la benne' ca' gulenné̱':

―Benne' nigá bexune̱' benne' la chul-la. La zue̱' nigá, ¿quebe guzéquene̱' ájala gune̱' chee̱ quebe gute Lázaro?

―Le xecá'a xiaj nigá.

Marta, bi zan benne' gate na' guzre̱' Jesús:

―Xran, ba dxelá bénnea' tula, lawe' da ba guca tapa zra na'a gutie̱'.

40 Na' Jesús gunné̱':

―¿Quebe gucha' lue' che chéajle̱'u chia', walé'enu' xel-la' szren chee̱ Dios?

41 Nadxa belexequé̱'e̱ xiaj ta'a na'. Jesús guné̱'e̱ xabáa, gunné̱':

―Xrae, dxapa' Lue': “Xcalenu'” lawe' da ba bennu' chia'. 42 Neda' nezda' tu dxénzquezenu' chia'. Dxennéa' da nigá chee̱ gaca tu da ba neza chee̱ benne' caní, chee̱ xeléajle̱'e̱ chiu' nasel-lu' neda'.

43 Ca gudé gunné̱' da nigá, na' gunné̱' zizraj:

―¡Lázaro, bedxúaj nigá!

44 Bedxúaj benne' gate na', nadxéaj ni'a ne̱'e̱ nen ládxe'dau' da buluchele̱' ni'a ne̱'e̱, na' lawe̱' dxela na ladxe'. Jesús guzre̱' benne' ca':

―Le xese̱zre̱', ne le gusane̱' xexíaje̱'.

―¿Ájazra gundxu? Benne' nigá dxúnle̱'e̱ xel-la' waca da za xabáa. 48 Che ca' güedxu Le̱' lataj, xúgute̱ bénneache xeleajlé̱'e̱ chee̱' chee̱ xuluzúe̱' Le̱' ca wenná bea, na' xelelá' benne' Roma ca', benne' zjaque̱' wedil-la, na' xuluzría xi'e̱ xudau' chee̱dxu, ne xe̱zr la xu chee̱dxu.

49 Nadxa tu benne' le̱' Caifás, bxruze blau iza na', guzre̱' benne' ca':

―Le'e québequeze bi nézele, 50 ne quebe dxeque be'ele gácadxa chawe' chee̱dxu gate' tuze benne' ne̱ chee̱ xe̱zre nigá, ne quegala ca naca xe̱zr la xu nigá cuía xi na.

51 (Quegá gunná Caifás da nigá cheé̱zqueze̱'. Lawe' da naque̱' bxruze blau iza na', bchálaje̱' waláz chee̱ Dios, gunné̱' gate' Jesús ne̱ chee̱ xe̱zr la xu judío. 52 Quegá gatie̱' tuze ne̱ chee̱ xe̱zr la xu naze. Cá'anqueze chee̱ xutupe̱' lu na' Dios xúgute̱ benne' zaj naque̱' chee̱ Dios, benne' zaj nase dínnaje̱', benne' ca' zaj nababe̱' xúgute̱ cue' xe̱zr la xu.) 53 Ca'an guca, ca lu zra na'te̱ benne' judío wenná bea ca' belune̱' tuze dizra' xelútie̱' Jesús.

54 Chee̱ le̱ na' Jesús québedxa gudé̱' naga zaj zra' benne' wenná bea ca' chee̱ judío ca', na' guzé̱'e̱ naga nababa Judea, na' guxíaje̱' xe̱zre Efraín naga zua gáguze tu le̱'e̱ xixre' lawe' lataj. Begá'ane̱' xe̱zre na' nen benne' ca' dxusé̱dene̱'.

55 Ba zua gáguze zrin Laní Pascua chee̱ judío ca', na' benne' zan chee̱ xe̱zre ca' xjaque̱' Jerusalén chee̱ xulucá'ana chawe' cuine̱' nédxudxa ca zrin Laní Pascua. 56 Guledé̱' dxelexílaje̱' Jesús, na' gate zaj zre̱'e̱ chale'aj xudau' na', buluche̱be ljwezre̱':

―¿'Ajazra dxéquele? ¿Wide̱' laní, che quebe xide̱'?

57 Benne' fariseo ca', ne benne' xíchaje̱ ca' chee̱ bxruze ca' ba gulebéaje̱' dizra' che nu benne' ca' nézene̱' ga zua Jesús, na' xelé̱'e̱ benne' ca' chee̱ gaca xele̱l-le̱' Le̱'.

<- San Juan 10San Juan 12 ->