Languages
28
Sibaṉsac Jesús loj rebeṉgut
(Mr. 16:1‑8; Lc. 24:1‑12; Jn. 20:1‑10)

1 Che gudejd sabd, dxej ni ruzilajz rexpejṉ Israel, che gusloj cayänij lo guedxliuj te jiu' stee xmaan, bidzujṉ Marii Magdaleṉ näjza stee Mariiga, siädhuiireni lo baa. 2 Luxh alagujc te xuro ni basniib lo yuj, sa'csi biääd te angl xten Dios xhaguibaali te badzucajni guij ni niäuu ro' baaga, dxejc gurejni yejc guijga. 3 Rdimbichaduxhni si'c najc che rdinya', luxh xhajbni najc nolbäj si'c najc yejg ni riajb. 4 Che bahuii resoldaadni, bichebduxhreni, sädiidxreni, gujcreni si'c beṉgut. 5 Dxejc räjp guixhajg xte Diosga loj regunaa:

―Na'c guidxejbtu. Ananä caguiiltu Jesús ni cuaj lo crujz. 6 Rutini ree sa'csi agubaṉsacni sigajc ni najni. Coḻtahuii cadro gojtni. 7 Coḻguxuṉ, coḻchaye'tz loj rexpejṉpacni agubaṉsacni loj rebeṉgut. Luxh ṉaj agunijdni lojtu sääni región xten Galilee. Ro'c suhuiitu lojni. Dee najc diidx ni rniä lojtu.

8 Dxejcti rusquenduxh regunaaga, biriireni ro' baaga. Cadxejbreni, cabalazduxhzareni sanäreni diidx loj rexpejṉpac Jesús. 9 Chela bidxaagreni Jesús lo nejz, räjpni: “Xchan”, lojreni. Sas gubigreni loj Jesús, bazuxhijbreni, gudääzreni guenni'ni, gojṉrenini. 10 Dxejc räjpni lojreni:

―Na'c guidxejbtu. Coḻchanä diidx loj rexpeṉä, chääreni región Galilee, sa'csi ro'c suhuiireni loä.
Rediidx ni räjp resoldaad

11 Laḻni sää regunaaga, bidzujṉ gaii soldaad ni huicanäj ro' baa lo guejdxga, huisa'nreni diidx lo rebixhojz ni rnibee xcuent guiraa ni guzajc ro' baaga. 12 Dxejc rebixhojz ni rnibee bachagsa'zareni con rebeṉgool te bia'nreni diidx gudeedreni xhiroob meel lo resoldaad, 13 räjpreni lojreni:

―Scree coḻye'tz lo rebejṉ: “Laḻ ni nagayesnu, canäjnu ro' baa, biääd rexpejṉpac Jesús guläxhiga'tzreni tiejxhni.” 14 Palga jiendiajg gubernadoor dee, siohuiinuni te di yu' xhi gunni la'tu.

15 Dxejcti cua' resoldaad meel, bejnreni si'cni räjp rebixhojz. Luxh si'c bire'ch diidx loj guiraa rexpeṉ Israel. N̲ajli canisijcreni si'c.

Baxhaḻ Jesús rexpejṉpacni
(Mr. 16:14‑18; Lc. 24:36‑49; Jn. 20:19‑23)

16 Dxejcti sää retzubiteeb xpejṉpac Jesús lo región Galilee, lo dajn cadro bia'n Jesús diidx guidxaagnireni. 17 Cheni bahuiireni loj Jesús, bazuxhijbreni, gojṉrenini, per yu' reni ractio'p lajzreni. 18 Dxejc gubig Jesús lojreni, guninäjnireni, räjpni:

―Arapä guiraa yäḻrnibee xhaguibaa näjza lo guedxliuj. 19 Ni'cni, coḻchäj, guideb guedxliuj coḻchagajn bejṉ gac xpeṉä, coḻgutiobnisreni, con laj Gueb Dios, näj laj Xi'n Dios näjza laj Sprit Dxan xten Dios. 20 Coḻguluiireni gusoobreni guiraa rediidx ni guinibeä. Luxh lagajc narä suganää́ la'tu guiraa redxej, dxejli che nitloj guedxliuj. Sugacni si'c.