Languages
14
Cantoꞌ ciento cuarenta y cuatro mil bee bene enu ucañi Diose

1 Leꞌca ulañia nú nzu Corderoꞌ Diose equie dañi nú lee Sión. Liꞌinu nzununu ciento cuarenta y cuatro mil bee bene, nu yebeella nequie nombreꞌ Cordero cuaꞌ nu cuna nombreꞌ Paꞌnu tequie beella. 2 Nu ubenea nú rula enza liñibe xi neca chenu rula rlaca huaxi inza o xi rula chenu rlaca beziuꞌ o xi neca chenu rula huaxi bene huaxi bee arpas. 3 Nu ungula beella tucu canto cuqui lu bene enu rnibiyaꞌ nzucu lu xleta ante lu dacu bee enu nehuañi nucuaꞌa zeꞌe nu ante lu ala chetaꞌcu bee bene uxu. Nu lecati unga canto zeꞌe, yetsia lu cuarenta y cuatro mil bee bene enu utsilaꞌa lubee bene iliulabe ungula canto zeꞌe. 4 Nu bee niyu cuaꞌ neca bee enu lá riꞌilí eluhuexe, nu uhuañi beella sin nú riꞌibeella dula, nu liꞌibeella neca beella enu nzenala Corderoꞌ Diose catse elu nzanu. Leꞌca liꞌibeella neca beella enu utsilaꞌa lubee bene iliulabe, nu neca beella xi neca primero uꞌna rlu para Diose nu para lu Corderoꞌnu. 5 Nu leca xunga uni beella eluquichiaꞌ nu la luꞌcu beella dula lu Diose.

Bee bedichiaꞌ nú uni yuna bee ángele

6 Che ulañia stucu ángele enu rcuecuꞌ enza liñibe nuyaꞌ bedichiaꞌ nzeꞌca nú leca xunga laxu, para nú ixiuleꞌenue lu ye bee bene enu nucuaꞌa luyuu iliulabe, nu lecaxi riꞌi tunu xi dialu rni beella, nu xi familia neca beella, nu xi eyeche enta beella nu xi nación enta beella. 7 Nu che chiquiꞌ fuerte uni ángele zeꞌe:

―Ulliquihua Diose, nu uniꞌhua bedichiaꞌ nzeꞌca lunu, xne uriñala hora nú hualunue lu cuendaꞌ bee bene. Uluꞌcuhua ulaꞌna lu enu urecheꞌ iliulabe, liñibe, inzatuꞌ nu elu rliñi bee inza.

8 Nu che uni stucu ángele zeꞌe:

―Unitilula, unitilula eyeche llene Babilonia xne xi neca chenu rduꞌ niqui bee bene saꞌ bene, scua uzequienu eyeche llenecuaꞌ ye bee bene iliulabe para nú riꞌibeei ye clasiaꞌ eluhuexe.

9 Che chu nzenala stucu ángele rriuna enu fuerte uni:

―Tunu nuꞌ tá tucu bene cha luꞌcu ulaꞌna lu monstruo cuaꞌ nu lu imagenꞌí nu zela nú quie señaꞌí tequiee urre ya, 10 bene zeꞌe deteꞌ Diose castiya nú chiquiꞌ fuerte, nu chiquiꞌ nehuana zecalla luquii, nu lu azufre ante lubee ángeleꞌ Diose nu ante lu Corderoꞌ Diose. 11 Nu leca xunga yala quii elu nehuana zeca bee bene. Nu niꞌ bichia nu niꞌ rulaꞌ la tsulachi bee bene enu luꞌcu ulaꞌna lu monstruo nu lu imagenꞌí enu quiee señaꞌí tequiee. 12 Enzeꞌe bee enu neca bee beneꞌ Diose bee enu sucuꞌ stichiaꞌnu nu nzeli arquiꞌ Jesucristo. Rquiꞌña nú riquiꞌ beella lunú xi seca beella.

13 Che ubenea tucu chi enu uni lua enza liñibe, nu uni:

―Uquieꞌe nú nia lulu: “Desde nee nza nzeꞌcae lu cuendaꞌ bee bene enu unguti nu uyali arquiꞌ Jesucristo.” Che uni Espíritu Santo, neli nucuaꞌ, xne nze tsulachila beella equie nú nehuana ulleꞌca beella, xne ye lunú neca nzeꞌca uriꞌibeella rluꞌcu cuenda Diose.
Ulaꞌcu nú aca luyuu iliulabe

14 Che ulañia tucu xcabe nequichi nu equie xcabe zeꞌe nzucu tucu bene enu rnaa xi rnaa bene enu uxeꞌla Diose lu iliulabe. Nu equiella nzucu tucu corona nú neca oro, nu nzenella tucu sierra nú nelatsa. 15 Nu che uchiuꞌu stucu ángele liñi indu nu fuerte uninu lu enu nzucu equie xcabe zeꞌe, nu uninu lulla:

―Uduꞌ sierra cuaꞌ leta bee ulaꞌcu nú nuꞌ lu iliulabe, nu uchieꞌcuꞌe, xne necala tiembu para nú yeteꞌ saꞌe.

16 Nu enu nzucu equie xcabe zeꞌe udeteꞌlla sierraꞌlla luyuu iliulabe, nu che uquieteꞌ saꞌlla ye ulaꞌcu nú nuꞌ lu iliulabe.

17 Che uchiuꞌu stucu ángele liñi indu nú nzucu liñibe, nu leꞌca nzene ángele zeꞌe tucu sierra nú chiquiꞌ nelatsa. 18 Nu che uchiuꞌu stucu ángele ruꞌu ecuꞌcu liñi indu zeꞌe enu rluꞌcu poder lu quii, nu fuerte uni ángele quieꞌ lu ángele enu nzene sierra nú nelatsa zeꞌe:

―Uchieꞌcuꞌ bee uva nú nuꞌ lu yuu iliulabe xne unguyeꞌelane.

19 Che uchiecuꞌ ángele zeꞌe uva lu iliulabe cuna sierra zeꞌe. Nu uduꞌ ángele zeꞌe bee uva liñi tucu tanque llene elu tsiꞌi bee uva. Leꞌca scua neca castiya llene nú xeꞌla Diose nú zeca bee bene. 20 Nu ruꞌu eyeche zeꞌe utsiꞌi bee uva zeꞌe nu chenu utsiꞌi bee uva zeꞌe uchiuꞌu rene. Nu rene cuaꞌ uriꞌchia luyuu zeꞌe tucu trecientos kilómetros, nu uliquine aya hasta elu nziꞌqui artaruꞌu tucu huayu.

<- Apocalipsis 13Apocalipsis 15 ->